Carolina Kostner ne venc nia na medaia, ma i cuers
La jadinadessa ladina de Urtijei/Gherdeina se à plazé al 9. post tl jadiné artistich sun glacia - N sport olache l suzes é sun l fil dla lama
Carolina Kostner, 19 agn apeina complis, se à plazé al 9. post a les Olimpiades a Turin en juebia seira ai 23 de fauré 2006, mioran sia posizion dal dí denant olàche ala se ova plazé al 11. post tla proa ledia. Ence sce n valgugn fai ti à costé bendebot de ponc, réstel la convinzion che al sarà una dles campionesses sun la glacia da endoman. Al é 27 agn che l'Italia ne ova nia plu abù na tel bona atleta tl jadiné sun glacia.Carolina Kostner con sie alenadour. Sie debut a chestes Olimpiades ne à nia condut a na medaia, ma les previjions dij che al é na steila sun la glacia tl nasce.
Carolina Kostner à a poura nia entusiasmé desche pueces autres atletes l publich talian y mondial. Sun vigni canal sie talian che todesch àn podù audí paroles de apriejament: n jadiné asvelt y elegant. La prescion sun ela fova dassen sterscia. Desche an à podù vedei tla cur é l garaté y l melgaraté di sauc y dles piruetes dret damprò, an jadineia sun l fil dla lama y al basta dret puech per "slisolé" tl fauz moment y descompone la tecnica empareda ite te truepiscimes proes. Ence a les prumes plazedes do la proa ledia, la pruma, la americana Sasha Cohen y la seconda plazeda, la russa Irina Slutzkaja, à abù dificoltés te sia "cur". Enultima à davagné la japoneisa Shizuka Arakawa che se à mioré dal 5. al 1. post. Avei podù ti cialé a la "cur" de Carolina Kostner é zenzauter sté n plajei, con dut valch glais. Ala à smuet i cuers con sia impostazion, dijan de ester empò dut adum contenta, contenta de avei podù tó pert y che ala tol su positivamenter chest resultat per fé miec tl davegní.
Carolina Kostner porta a ciasa da Mosca la medaia de bron
