benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Devers dles lites: l teater entourn la SVP - n comentar
scrit ai 22 February 2006 da les 09:27:06 da noeles

Politica

 

La comedia dla raprejentanza ladina a Roma

Vignitant manacia la SVP "ladina", ma al é dut demé teater  - N comentar

BULSAN. La comedia dla raprejentanza ladina a Roma é grana y da se daudé. Da chilò enfora veiden a cie livel de scerieté y de competenza ch'al vegn traté y rejoné tla Svp ladina. N slogan dij fora dut: "Sce la SVP ne nes tol nia sun l scer, spo s'en jonse". Olà vuelela pa jì? Do i joufs via? A chirì autres alianzes plu sceries? Do da 50 agn de coienaries fóssel pa ben ora de mudé aleé politich.

 



          A la SVP ladina ti él gnù asseguré per la proscima legislatura n cuint post che en curt vuel dì deguna raprejentanza. Ma al é empò na consolazion, végnel dit anter chisc bi oms, davia che sce pro chesta legislatura, che met man tl 2006, ésen bele al cuint post, spo sarán dessegur al cuart post pro chela che gnirà do. Entratant végnel enjigné ca dassen n bel, che de ladin n'à net nia, ma truep y ence massa contra. Ma chest ne fej deguna marevueia per la Svp ladina che rejona y scriv demé per todesch, al contrar al é n titul de onour. Al dess ence ester n assessour a la cultura ladina che se cruzia de saré su i joufs, perchel ch'al ne sie mine contac anter les valedes. De n comité coordinatif y interladin de ombolc ne auden plu net nia. Per fortuna se dál ju truep con l peton, sce no éssel bele desdrut la cultura ladina.
 Na raprejentanza direta ladina a Roma fossa dessegur na bela cossa. Ma denant che rejoné de raprejentanza direta, méssen se damané sce ala pò fé y dì valch. Enfin a sen ne éssela podú fé nia. Ala essa demé podú dì cie che al ti fossa gnú dit dant dal aut, dai todesc. Empruma de dut va defenus i interesc di todesc. Entratant chesta legislatura él gnú fat la reforma dla lege litala. L raprejentant fascian, Bepe Detomas, à prové de arjonje n certl lital per l grup ladin dles Dolomites. Al ti à damané n aiut ai parlamentars todesc de Südtirol. Chisc ne ti à nience dè na resposta y ai se à batú per si interesc y basta. I savon sciche la lege é tomeda fora. Per ei é i ladins da Bulsan todesc y de d'autri ladins ne vuelei nience audì rejonan. Chesta é ence la teoria y la pratica dla Svp"ladina" y dl assessour da sen. Vigni oposizion a la linea todescia va desdruta. Al n'é nia chestion de colaborazion, ma de tradiment. Enier fòvel la recordanza de André Hofer che fova solidar con i ladins de dutes les valedes. Enlaouta ne fòvel nia la classificazion de ladins todesc y de ladins lomberc. Chest é l frut dl egoism de encuei.
          A duc él da ti consentì de podei ester n raprejentant simbolich ladin a Roma per podei davagné n pugn de scioldi n plu per cinch agn, ma i ne ti audon a degugn l'umiliazion che ai messessa tegnì fora. Valch de tel pò demé sté fora un che sent al cent per cent todesch.
 La ciampana da soné deberieda é na autra: nia chela dla raprejentanza direta, ma chela dla formazion de n grup unitar a na moda da podei garaté n certl lital soul anter duc i ladins dles Dolomites. Enfin a che chest certl ne n'é nia realté, n'él per nia rejoné de raprejentanza direta. L raprejentant fascian, Bepe Detomas, é da soul y al n'à nia la forza de uega viadedò, ence sce al à derzé fora truep per Fascia y per Trent. I temps gnirà tres plu riei ence per l bel Südtirol, souradut do i intervenc di presidenc dla Region lomberda y de chela dl Venet. I gragn scioldi ne ruvarà nia plu adalerch. Demé la colaborazion anter duc i ladins pò nes salvé. La Talia é deventeda plu sensibla tl vers dles mendranzes tres la lege 482/99 y ala à vedú ite che ala mess dè valch a dutes les mendranzes reconesciudes y nia demé dut a una, a chela todescia, sciche al suzed enfin a sen. An mess ti dé plu emportanza a Bepe Detomas che sará bonamenter ence ti proscims 5 agn l soul raprejentant ladin a Roma. An mess ti sté do unis. Te chest vers messessa la Generela fé cotant deplù. (uc)


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 5


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.387 seconc