Lites parlamentares 2006, degun certl lital ladin
Cie che conta é l orden di candidac fissé dal partí - Informazion regolara tl davegnì
En juebia ai 9 de fauré s’ à enconté na deseina de colaboradours/res dl Moviment Politich Ladins a Calfosch per rejoné dant daldut dles lites politiches d’auril 2006 Carlo Willeit à splighé les regoles nueves per les lites politiches de chest’aisciuda:
Per la lita dl Parlament él prevedù l sistem proporzional, olà che l litadour pò demé lité la lista dl partì, ma al ne pò nia dé sia preferenza a 1 o plu candidac. Cie che conta é l orden di candidac fissé dal partì.
Laprò él vegnù metù n lim de 20% dles oujes dla Region (zirca 120.000 oujes) per gnì lités. Te chestes condizions é na reprejentanza autonoma dla popolazion ladina taieda fora, y chest con l consens dla Südtiroler Volkspartei!!
Per la lita dl Senat vélel l sistem uninominal, chest vuel dì 1 n candidat per lista; y ence chilò él demé la poscibelté de lité n partì. Te Südtirol él trei certli litai, un de chisc é la Val de Puster y la Val d’Isarch, olà che al toca laprò la Val Badia y la Val Gherdeina. Ence chilò é na reprejentanza autonoma dla popolazion ladina taieda fora, ajache con la lege nueva él vegnù enjomé via l’ocajion de crié n certl lital che unesce i ladins dles Dolomites, certl che ti dess la poscibelté de lité anter ladins n reprejentant tl Senat.
Te chestes condizions giuridiches é la popolazion dles valedes ladines scluta fora da na competizion democratica. Y l moviment ladin messarà tegnì cont de chesta ria situazion can che al prejentarà sia indicazion per les lites politiches dl’aisciuda 2006.
An é spo passés a programé l’ativité per chest’aisciuda, formeda da desvalives encontedes y manifestazions, che vegnirà lascedes al savei de en gré via che ales vegn organisedes, sides tla Val Gherdeina che tla Val Badia.
A la fin él vegnù rejoné y pensé do sciche an podessa mioré l contat con la jent. Al é sté fat fora de informé regolarmenter i mass media sun dutes les sentedes.
Contat: Moviment Politich Ladins, Lois Castlunger, tel. 0471847200
