benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Recordanzes a André Hofer
scrit ai 15 February 2006 da les 19:47:45 da noeles

Storia

 

André Hofer, n combatent che volova tegnì dut a la vedla

André Hofer, aldidancuei superé? Al ova combatù contra reformes che ne fossa nia stedes mel

Vigni ann végnel recordé ai 20 de fauré n toch dla storia de Tirol che ti à fat onour a nosc antenac, davia che ai à prové da se paré contra l nemí che ova dl 1805 tout ite Tirol. Chet nemí fova l re de Bayern. Chest ova porté te Tirol n grum de reformes modernes tl ciamp dla scola, dla magistratura, la liberté de religion, la destouta di privilegs nobiliars. A la gliejia ti fòvel gnù tout feter dut: truepes festes de gliejia fova gnudes toutes ju, l jí con crousc y l soné al temp fova gnù proibì, les Madovines sburledes a da doman. A chesta fosa fova la gliejia, ma ence la popolazion contra l re de Bayern. La revolta dla jent de Tirol fova gnuda organiseda per percuré demez i saudés de Bayern. Chi de Napolion fova permó gnus adalerch can che chi de Bayern i ova cherdé en aiut contra Tirol.



Reformes melvedudes
Truepes reformes dl emparadour Ojuep II. fova endò gnudes retrates sun la sburla da pert dla gliejia che ne les ova mai cis azetedes no glotides. Bayern ova prové da modernisé Tirol. Nosta  popolazion fova ciamò scialdi tles mans dla gliejia y chesta se ova paré con piesc y con mans. La revolta de nosc antenac fova perchel rota fora contra les reformes che l re de Bayern ova envié via. Tirol ne ova nia volù se lascé comané da jent foresta che ova prové da porté te Tirol na vita plu moderna, con valgunes idees toutes da la Revoluziun franzeisa. La gauja dla revolta dla jent de Tirol dl 1809  é: les reformes te Tirol da pert dal re de Bayern. Endut él sté dal 1809 trei combatudes al Berg Isel: ai 12 d’auril, a la fin de mei y ai 13 d’aost; do chesta ultima fova André Hofer gnú patron dla Hofburg a Desproch y podova comané de Tirol. Ma do la Pesc de Schönbrunn ai 12 d’otober dl 1809 anter la Francia y l’Austria ova l emperadour endò messú ti sourandé Tirol a Napolion. Napolion ti ova garantì bonacia a la jent de Tirol, sce ala essa dé ju les ermes. Hofer ova ben vedú ite che se paré ne fossa plu sté per nia, ma chel mascena de capeziner Haspinger l’ova baié su da prové da nuef da paré demez i franzeisc. Ala fova juda mel. Haspinger s'en fova sciampé fora en Austria y Hofer sun na mont, olache an l ova pié y condut a Mantua per gní sclopeté.
 
Hofer y nost temp
Sce an conscidreia la storia da enlaouta plu a fonz, spo méssen dí che les combatudes dl 1809 é gnudes souravalutedes en confront a cie che nosc vedli à messú sté fora da la 1.Vera y da la 2. Enlò sce él pa sté strabac, meseries, glaciades, meisc y agn a la longia tles cavernes di glaciers su per montes y crepons, ite per les planures y i palus rusc con neveres mates, ju per i deserc africans y su per les contredes dla Scandinavia. Baudi che puec ladins à scrit su y conté sies esperionzes de vera, ma cheles che i conescion à fat gran imprescion. Al temp de Hofer volòven se paré contra reformes sforzedes su da n patron folestier, ence sce ales ti essa fat ben a Tirol. Enlò ne fossa deplú revoltes y revoluzions (stedes plu tert ) nience levedes su. I ideai dla jent da enlaouta ne podonse nia ti strité ju: ai ova na religion ben encogneda, ala tegniva adum per se paré contra n patron folestier, tegniva dut sun l ester enstesc patrons te sia tera, la solidarité anter les valedes fova grana. Bel chest ideal adorassa i ladins – la solidarité anter i ladins dles Dolomites, tegnì adum empede vene fora sia tera a foresć per raspé ciamó chi trei sciolds che é a la fin la ruina de nost paisc. Tré ca André Hofer y depierpul fé na politica de svenuda dla tera ladina, lascé mazé i ladins dles autres valedes y raforzé sie ciampanil, chest vuel dí -  ti dé tla musa a chi che à combatú per stravardé nost raion dal nemí. Al  fossa ora da lascé da fé teater con nosta jent, ala à debujegn de vegní trateda a la per di autri vejins. (lt)
 

 

Ladin Standard

 André Hofer enlaouta y encuei?
 N pice cheder storich sun i avenimenc a Spinges
 La Muta da Spinges: 150 agn da sia mort, fac die asconus via

 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.379 seconc