benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

A recordanza de Simonin Maza
scrit ai 13 February 2006 da les 17:15:37 da noeles

Persones

 

A recordanza de Simonin Maza: da chel ciuch cresciaràl plantines nueves y vita nueva

Te nience n ann à l moviment ladin de Fascia perdù trei oms ”simbul”: n pionier, Danilo Dezulian dal Garber, n poet, Luciano Jellici del Garber, y en ultima n maester, Simonin Chiocchetti del Maza. Chi che resta, nia demé chi de ciasa ma duc canc nosautri, nes sention orfegn, soui, con l vuet daite, beleche zenza paroles.



Sun scomenciadiva y de gré al Grop Ladin da Moena ne é l Maester Simonin nia vegnù recordé demé do che al é sté mort, ma ence ai 18 de dezember dl ann passé per festejé si 90 agn y per ti dì a chesta persona omla ma cis preziousa per Moena Ladina, per Fascia y per duc i ladins la reconescenza al om, al maester de scola y de vita, a chel “gran de peiver” desche l Chim à dit.

Belavisa te chela ocajion ova l Maester Simonin dit che la ladinité é per el “n sentiment de amor per mia tera, mie paisc”.

Ie vue l recordé con les paroles che al me à scrit chest auton passé en ocajion dla Festa dl Rengraziament dla Union, festa olache al ne ova nia podù tò pert. «Sé l calvarie che la Union à cognù far per esser recognosciui desche popul ladin… e ades do 50 egn de fadìe a l’Union ge tocia ensema co l’Istitut Cultural Ladin de portar inant la bandiera ladina no demò co l’autoritèdes de Stat e Region, ma ence e soraldut per viventar anter noscia jent chela coscienza ladina menaciada e sofeada dal gran benesser economich che la Val de Fascia a abù col turism.

Foto: endana na festa dl Grop Ladin de Moena.

E cognon crer, ence se somea na “utopia” che no saron mai veramenter n popul se no troeron la unità de cà e de là dal Sela e dal Pordoi, desche entità e strutura politich-aministrativa, soziala e culturala.

Podon ge dar l’inom che volon, ma l fin, ence se par na “utopia” ancöcondì, doman sarà la realtà de duc i ladins de la Dolomites”.

Chest tant volove ti dí a nosta jent, che al ne suzede nia che nosautri per l massa benester y per la schersa coscienza ladina, messassanse rodolé ite la bandiera ladina che con tanc de sforc y de sacrifizes l’Union y l’Istitut Cultural à porté inant enfinamò.

Con speranza y gaissa ence ie, col cuer toli pert ai 50 dl’Union di Ladins.”

Chest é dalbon la maiour arpejon, l testament spiritual, moral y politich che l Maester Simonin Maza ne ti lascia nia demé a sia comunanza da Moena ma a duc i ladins de Fascia y dles Dolomites.

Cer  Simonin, cie vuet che i lasceis!

Purempò sciche tl bosch canche vent, tormen o manera dl boschier fej tomé n gran alber, lascia chest al scomenciament l vuet, ma do, con l jì di agn, con i rais dl soredl, con la pluevia y la neif, créscel da chel ciuch plantines nueves,  vita nueva.

Ladins duc canc, ne lascion nia morì fora la semenza y jì a la nia l ideal dla Unité Ladina!

A vos, Maester Simonin, ciamò n Develpai de cuer y n braciacol.

Antone Polam dal Maester

President dla Union di Ladins de Fascia

Moena / Sèn Jan, ai 9 de fauré dl 2006



 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.436 seconc