Tl 2006: Bulsan enconta la Ladinia
Program de ativités dla Comunanza Ladina a Bulsan - Per evité pregiudizes envers l LS rata la Comunanza che al sie de gran emportanza na campagna de informazion
L program de ativité dla Comunanza Ladina a Bulsan per l 2006 é vegnù metù adum dal consei y porté dant pro l assemblea generala ai 15.11.2005. Adenfora dl'ativité tradizionala sciche la messa ladina che chest ann vegnirà tegnuda a Baisenstoan (Peralba), i cursc da cujiné y da depenje, n curs de ladin gherdeina, l viade cultural y la festa dla fin dl ann vuel la Comunanza mete a jì n teater per ladin, l projet "Bulsan enconta la Ladinia" per les scoles elementares y mesanes dl comun da Bulsan, na ciastagneda y la prejentazion de publicazions ladines.
Nadel 2005: a la festa da Nadel tol dagnora pert trueps tosac, l davegnì dla Comunanza.
"Bulsan enconta la Ladinia" vuel ester na scomenciadiva per ti fè conesce plu damprò, y apriejé, la cultura, la storia y l lengaz ladin ai scolars di autri grups linguistics.
Tl ciamp lingustich vuel la Comunanza mené inant l projet dl LS l adoran dantaldut te si raporc con i sozes, les istituzions y i media. L fat che la Comunanza pieta ence cursc di idioms de valeda é la desmostrazion che ala tegn dassen tamben a sie mantegniment. Per evité pregiudizes envers l LS rata la Comunanza che al sie de gran emportanza na campagna de informazion. Sce la popolazion é ben informeda él truep plu rie da la manipolé.
Per mioré la colaborazion anter les lies y les unions ladines propon la Comunanza per l 2006 na enconteda de si reprejentanc con l obietif de se confronté deberieda soura temesc fondamentai dla ladinité, de ruvé pro n consens y de ti jì do a na linia unitara.
N dilan de cuer ti và a duc i sostegnidours dla Comunanza, samben al consei che à tres laoré adum con gran entusiasm, ai sozes dla Comunanza, a la Consulta per i problems ladins per sia colaborazion, al assessorat a la cultura dl Comun da Bulsan y al assessorat a la cultura ladina dla Provinzia Autonoma de Südtirol per si contribuc.
Foto: tl 2005 él endò vegnù metù a jì n curs de acuarel con l maester Markus Schenk da Urtijei
La Comunanza Ladina a Bulsan aoda a duc canc tl ann nuef dut l bon y dantaldut sanité.
