Tl Consei vueia de fé informazion sun l LS
Al é da se aodé che al ruve endò ite moviment - Setember 2002, na data foscia
L articul chilò dessot, revardent la Union di ladins de Gherdëina, nes fej conesce sie program per l ann 2006. Na forma d'informazion che plej, davia che an vegn al savei ciunes che é les priorités d'azion dla Union, sie am (spirit), sie entusiasm. Dassen bela l'informazion che l consei nuef é animé da na gran vueia de laoré y de tó su enciaries. N program cultural bendebot ampl.
Ma cie che fej ciamò de plu marevueia é sie coraje dles novités, enfinamai chela de risié na sort de scomunica da pert dla Svp de Gherdeina per mete sun meisa ence l ladin standard. An pò lieje che tres radio vegniràl sport informazions sun les dretes finalités y l utl dla rejoneda scrita unificheda.
Na scomenciadiva che ti stessa ben soura ence a la Union di ladins dla Val Badia y dantdaldut al Istitut cultural ladin "Micurà de Rü". Al se trata de na iniziativa spontana dla Union de Gherdeina con dut che ala conesc les intrighes entournvia, sclut ite l gran amour de Mussner per l Standard scrit ladin. Na azion daverta che pò vegnì demé da jent ledia, da n spirit reidl ladin, depierpul che d'autri ciala de l ascone via y che al ne dae nia demassa tl uedl. Per ejempl l president dla Union di Ladins dla Val Badia, Werner Pescosta, ne á nience firmé les undesc teses. An ne sa nia sce l program de ativité dl 2006 contegn valch sensibilisazion de chest vers.
Al é da se aodé che con chestes iniziatives dla Union di Ladins de Gherdeina rùvel endò ite moviment y enteressament nuef te chesta chestion de gran emportanza, ajache tla Provinzia de Bulsan él da setember 2002 encà dut chiet, do che l Consei dl Istitut "Micurà de Rü" ti á trat sotfora la basa de svilup istituzional y ofizial con sia delibera touta a l'unanimité (na data foscia).
La Union de Gherdëina se merita n gran "de gra" per chesta sia sburla y per la discuscion che vegnirà empieda y atizeda. N 2006 che peia via con valch da nuef y che enteresseia duc i ladins. I gherdeines met endò man de trainé, desche ai á bele fat plu iadesc tla storia. (jp)
