Cristina Lezuo a cef dla Union di Ladins da Fodom
Na publicazion nueva per les scoles elementares deda fora con i fonds dla lege 482/99
Les scoles elementares da la La Plié à dé fora da puech na publicazion plajoula entitoleda "Lejende fodome". Coche an capesc bele dal titul, se tràtela de n liber che cuei adum undesc liejendes de nosta val de Fodom. L laour à podù vegnì scomencé via de gré ai finanziamenc dla lege 482/99 che preveid la poscibelté ence per les scoles de podei pié do contribuc per projec endrezés al stude y a la conservazion dl lingaz de mendranza.
Cuertl dla publicazion nueva.
Dutes les liejendes é vegnudes coiudes adum, scrites y ilustredes dai tosac enstesc, sot a la coordinazion dles maestres Giuliana Draman, Gemma Demattia, Antonella De Toffol, Florina Detomaso, Emanuela Gabrieli, Sofia Lorenzini, Teresa Pezzei y Daniela Templari. Vigni storia é conteda per fodom, con dessot la traduzion per talian. "Conservé nost muet de descore che vegn da dalonc tl temp" scriv tl pream la assessoura a la cultura Teresa Pezzei, ne vuel nia dì se saré te nos enstesc, ma se daurì al mond defora con credenziales nostes, con nosta identité y capazesc de fé pert de na comunité rica de storia."
Cristina Lezuo president nuef dla Union di Ladins de Fodom
La nomina enchestadì, tla senteda do les lites
Ciamò dant Nadel s'à abiné l consei nuef dl'Union di Ladins da Fodom, vegnù fora da les lites ai 4 de dezember. I dodesc componenc nuefs ova da lieje fora emprumadedut les enciaries nueves. Chela de president nuef é tomeda sun Cristina Lezuo, che ova bele te chisc ultims doi agn mené inant l'Union desche vizepresidenta, do les dimiscions de Nani Pellegrini, clamé a cef dla Generela. Cristina à ciapé la creta dl consei per sia gran pascion y dedizion a l'ativité dl'assoziazion y per la cultura ladina. Dlongia ti starà permez desche vizepresident Nani Pellegrini. La edema che vegn se abinarà l consei endò per lieje fora i verdaconc, per dé pro l preventif 2006 y per mete adum les desvalives comiscions de laour. Al sarà ence l'ocajion per la neo-presidenta de ti lascé al savei ai aconsiadours l program de laour per i agn che vegn. "Per entant", dij Cristina "volessi ti auguré n bon ann a duc i fodoms. ( ls )
Cristina Lezuo
