benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Union di Ladins de Gherdeina: plan de laour 2006
scrit ai 02 January 2006 da les 19:56:59 da noeles

Gherdeina

 

Cesa di Ladins: la situazion é grieva 

Tl 2006 végnel porté inant n ampl program cultural - L majer festide resta l derturament dla Cesa

La ULG é enjigneda per l 2006. Ampl l program cultural, cin publicazions interessantes. L president Vinatzer é content con l consei nuef. Proscimamenter dezijiva l’enconteda con la politica en cont dla Cësa.

De fauré él vedù dantfora na enconteda con i ombolc de Gherdeina per jí inant con i laours de derturament dla Cesa di Ladins. Da man ciancia: Egon Vinatzer, president dla ULG y i ombolc Ewald Moroder (Urtijei), Roland Demetz (Selva) y Bruno Senoner (S. Cristina).



 
L consei nuef dla Union di Ladins de Gherdëina se à urté te curt temp bele trei iadesc per mete ju l program per l ann 2006 y plu inant.
La partezipazion, l interessament y la creativité ativa dl consei nuef sodesfej defin les aspetatives dl president Egon Vinatzer. “I é vedù che con l consei nuef à la Union di Ladins Gherdëina giaté n sofl de aria frescia y da colour. Bele tles prumes sentedes él sté meso de vedei fora tl consei na gran vueia de fé y al é perchel sté meso de se mueve con n vare scialdi segur, dinamich y aslum tl porté dant propostes emportantes y dantaldut fatibles tl ciamp cultural ladin. I on n consei che cuer duta la valeda, al é conseiers de desferentes etés sibe eles che ence ei; chest é per la organisazion dl’ativité y per garantì na raprejentanza dles desferentes minoghes, dessegur de gran emportanza”, dij Vinatzer.
Tla ultima senteda tegnuda en mercui ai 28 de dezember él vegnú dé pro l program per l 2006. Al sarà n valgunes manifestazions y publicazions che se ghira plu temp de laour y perchel él vedù dantfora n rai de doi o trei agn. Tla medema senteda, una dles plu longes de chisc ultims agn, ti él ence gnù sourandé al consei enciaries ti desferenc comités de laour.
Egon Vinatzer, Manuela Piazza, Alex Moroder, Günther Pitscheider, Ewald Karbon y Stefan Kasslater é tla redazion dl Calënder de Gherdëina 2007. Manuela Piazza raprejenteia la Biblioteca ladina tl comité dla biblioteca Comunala San Durich. Ewald Karbon raprejentarà la ULG tl consei dl Museum de Gherdëina, entant che da defora ti él endò vegnù dé la creta al Prof. Karlheinz Mureda. Tl consei dla Generala resta, desche dant, Egon Vinatzer y Manuela Piazza. I comités de laour per les majeres manifestazions culturales vegnirà metus su do y do.

 
Cin publicazions é vedudes dant fora ti proscims agn
Entant che an laoura bele pro l Calënder de Gherdëina dl 2007, ésen bele tant che a la fin de enjigné ca n liber per mendri te trei rejonedes, al se trata de “La luna de ciajuel”; scrit y dessegné da Daniela Mattei. N auter liber che vegnirà ciamò fora tl 2006 sarà dediché a Johann Dominich Mahlknecht alias “L Vedl Pana”. Chest é vegnù reporté tl ladin-gherdeina y laoré fora dal dot. Toni Sotriffer. N’autra publicazion che an cialarà de publiché ciamò chest ann é n liber sun i 150 dla streda Purger. Chilò ti vegniràl sourandé i laours de stude al prof. Edgar Moroder y la documentazion unica vegnirà deda a desposizion da Albert Moroder Sodlieja.
N liber che vegnirà scomencé, ma jirà inant almanco doi agn y chest en colaorazion con l Museum Ladin, sarà sun i molins de Gherdëina.

 
Cursc, referac y se fé conesce
N aspet daldut interessant é samben la pert culturala dla Union. Entant l ann pitarà la ULG desferentes poscibeltés de ruvé plu davejin a la rejoneda y a les raijes di ladins de nosta tera. Al vegnirà tegnú cursc de ladin dantaldut per jornalisć y per chi che é interessés, an cialarà de na seira de chedri a colours sun nosta identité, n cuiz cultural tla plata internet y n’azion de sensibilisazion de lieje publicazions ladines. Tres radio metarán a jí na ora de informazion sun la rejoneda unificheda. Esperc se metarà a disposizion al publich per respone a de vigni sort de domandes.

 
Enconteda con i politics per rejoné dl davegnì dla Cësa di Ladins
Per la pruma edema de fauré él vedù dant fora na enconteda anter l consei dla ULG con les raprejentanzes politiches per rejoné dl davegnì dla Cësa di Ladins. “La situazion é ria, i son a la fin. Al va debujegn de n gran sostegn y nia demé a bocia, sce an ne vuel nia fé jí sot na gran tradizion y na realté emportanta tl mond ladin. La Cësa di Ladins é da passa 50 agn dla Union di Ladins de Gherdëina, ma ala é ence bele da agn for a desposizion de duc chi che à debujegn de valch salament. I ne ston nia a mazé na tel frabica emportanta”, dij Vinatzer. La senteda dess ence ester dezijiva per l davegnì dla Cësa.

 
I laours de Gramofon 2 scomencia
Anter les manifestazions culturales de majer laour y empegn él ciamò vedù dantfora:
Sun Mont de Pana l di de cultura, sport y benefizënza – (en colaorazion con la scola de jí a ciaval M.Pana) –« Cianté con nos » festival di cors de mutons - Na seira leterera o de cabaret. An scomenciarà i laours de programazion per doi CD’s. Al se trata de “Gramofon 2” y de na colezion de cianties populares tipiches  storich-culturales de Gherdëina.
 

Ladin Standard


 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.403 seconc