Ladin standard: Intendenza ladina á la bocia sareda
Ti Grijons él bele gran discuscion sun la introduzion te scola - Les istituzions ladines l boicoteia depierpul, fej desche nia ne fossa
Sce la Union di maestri dla Surselva se declareia, desche an á podù lieje, clermenter y ativamenter per l Rumantsch Grischun (RG) ence te scola, spo él d'autri raions rumanc plulere decontra y n valgugn ence dassen decontra, anter chisc i maestri dl paisc de Schlarigna (tla Engiadina) che defen de vigni vers y con manifestazions sie idiom "l puter". Che duc ne sie nia a una él saurì da entene, ma almanco él discuscion, nia demé anter les unions di maestri de valeda, ma enfinamai pro la "Conferenza generala ladina" (CGL), tegnuda a Sent, á abú l tema dl Rumantsch Grischun bendebot de resson.
Roland Verra, ladin standard degun tema tla Intendenza a les scoles ladines.
Al vegn rejoné persoura l Rumantsch Grischun, al vegn contesté, al vegn defenú, laudé y strité ju. Al é n tema davert. Al vegn scrit y fat mozions a la Jonta di Grijons a na moda che ala tole posizion y deide do al sliament dl problem. Chest suzédel te n clima democratich, olàche vignun pò dí la sia. L argoment belavisa unfat de "ladin dolomitan" (LD) o "ladin standard" (LS) é tla provinzia da Bulsan deventé depierpul n tabù. I maestri dles scoles elementares, mesanes y autes ne rejona daldut ne nia de chest argoment. Ai se astila enscí truep per comodité, per ne avei nia bria de l emparé y de l ensegné. Tla intendenza per les scoles ladines ne sán bonamenter nience cie che al vuel dí. La Union di maestri dla Val Badia é vegnuda damaneda da la Union Generela sce ala é a una de sostegnì l LS. La resposta é steda positiva, ma fat y dit ne végnel nia: mai na touta de posizion de valch vers. La gauja de chesta unfataria y passivité é dastramp saurida; a dut pensa l assessour Mussner. El taia curt dijan: "L problem ne esisteia nia: I gherdeines rejona sie idiom, i badioc l badiot de mesa val. La Intendenza, l Istitut cultural y pedagogich á la bocia sareda da Mussner y rodunt Mussner, assessour a la cultura ladina, dij de volei tiesce contac con i Grijions. Cai pa? (jp)
