No a la scluta di joufs, no a n daz

Ressoluzion deda pro en gaujion dla reunion generala dl Moviment Politich Ladins ai 26 de november 2005 a Selva

Natura: les stredes di joufs é l meso plu emportant de comunicazion anter les valedes y per la comunité culturala y sozio-ecunomica che viv tl raion entourn l Sela;

funzion: les stredes di joufs mess resté davertes coche infrastrutures y servisc publics per:
les relazions personales, de familia, de raport interpersonal, de scola y formazion, de laour, de colaorazion culturala y soziala, de svilup dl’economia locala tl raport con les regions entournvia, de sport y de aorelacurta;

 

Les prescions dla SVP per scluje i joufs entourn l Sela deventa tres maioures, dantaldut a livel comunal. Selva y Corvara é sun l our de dé pro. Sun la foto: l massif podoul da oláche al peia via a steila les valedes ladines, vignuna te na autra direzion.

rejon soziala y debujegn economich: mantegnì, mioré y asseguré les stredes samont y de coliament con les autres valedes é na rejon soziala y n debujegn economich dla populazion entiera entourn l Sela, perchel ne é deguna proibizion de passé o daz da paié giustifiché, per chesta populazion;
sconanza dla natura y dl ambient de vers di fulestiers, dl turism y dl sport demé tant inant che ala é compatibla con i derc di residenc!
Sce an assegureia la zircolazion ledia di aciasés dles valedes y la poscibelté de passé per i folestiers che ruva adalerch y se en va, dantaldut la sabeda y la domenia, é la scluta di joufs per puecia ores al dí, i meisc de messel, aost y setember na limitazion da azeté; l medem vel per manifestazions sportives, coche l giro, la maratona o l di dles rodes;
vigni forma de daz é da refudé coche couta per la streda, aument di cosc’ y mesura che ne arbasseia nia l trafich plu che entant no tla valeda y bonamenter nience sun i joufs.
les plazes di auti dlongia les stredes di joufs é da enjigné ca, ales dess ester publiches y poester a paiament.
per smendrì l trafich tles valedes, ti paisc, sun i joufs vàl debujegn de soluzions plu amples
che reverda:

1) la zirconvalazion di paisc, les encrujedes, i soura-y sotpassajes, les plazes di auti, i trois dles rodes y da jì a pe, na bona manutenzion y l miorament dles stredes enstesses;
2) l trasport integré anter bus y emplanc portamont; trasport publich ence te paisc y d’isté; trasport de linia plu ampl y bencoordiné anter les valedes;
3) regolamentazion y control dl trafich y dl trasport tl temp de sajon y fora de sajon con n servisc coordiné a livel de valeda y anter la valedes;
4) azions de promozion de n turism zenza auto;

Les mesures de sconanza straordinara di joufs dess tegnì cont de dutes les stredes dla provinzia y, per cie che reverda i joufs dla Dolomites, vegnì coordinedes con duc i comuns plu enteressés ence dles autres provinzies.
L moviment politich LADINS se resserveia de envié via n referendum per damané la populazion dles valedes ladines o di comuns plu enteressés sce ala é per o contra la scluta o l daz sun i joufs.