benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum a souramont per gní permez a la provinzia de Bulsan
scrit ai 13 December 2005 da les 22:40:06 da noeles

Politica

 

Tirol ne é nia sinonim de todesch

L faliment dl pre-referendum dl 1991 ta Fodom - Ma chel che conta é la unificazion di ladins

Chel che é suzedù a Lamon à endò descedé ence pro i ladins da Souramont la discuscion soura n referendum per jì con Bulsan. Lois Trebo à a rejon auzé fora la ingiustizia che ti é vegnuda sforzeda su ai ladins da Souramont da pert dl fascism. Chi che passa sourafora a chest fat, dijan che i temps é mudés se ascon do na vertola. An sent ciamò aldidancuei les conseguenzes dles desvalivanzes de sconanza anter ladins. Per chest sonsi dla medema minonga de Lois Trebo canche al dij „Souramont dess avei nosta solidarité, nosta simpatia y al fossa n ben per duc i ladins, sce ala jissa da trè adum la familia ladina eliminan termegn metus dai fascisc’.“                                               

 Dl 1991 ova la populazion de Fodom dit a maioranza no te n pre-referendum de tegnì n referendum per jí permez a la Region Trentino-Südtirol y a la provinzia de Bulsan.



 

Con l comentar de Travers al articul de Trebo vegnù fora sun noeles y sun la plata ladina ne sonsi endere nia dl dut a una. Al à rejon canche al dij che cerc esponenc dla SVP se astila bendebot con aroganza, da „sourajù“, ti confronc di ladins da Souramont, ma al se desmentia de n fat emportant: Al ne é nia per via dla SVP che i ladins da Souramont dess vegnì con Bulsan. Chel che conta é la reunificazion di ladins. La SVP ne é nia Südtirol y Südtirol ne é nia la SVP.

L clima de desfidenza, de mancianza de unité y de perspetives anter i ladins é na conseguenza direta propi dla tripartizion dl raion ladin. Demè sce chest spidiciament vegn eliminé, pòn perdret pensé de laoré adum.

Che Südtirol, aldò Travers, ne vuel per trueps da Souramont dì nia auter che scioldi vegn confuté dal ombolt da Col enstes che dij „le motivazion de Lamon per damané de jì nte na provinzia autonoma (...) i é demè per cuestion de sciòldi (...) chële nòste (...) i é souradut stòriche.“ Al é fodoms che se sent tiroleisc o che almanco sent l liam storich y cultural con Südtirol/Tirol. Al é emportant tegnì ben separés les does denominazions <tiroleis – todesch>. Ai ne é nia sinonims. Tiroleis é n conzet che indicheia na popolazion da mont indipendentementer dal lingaz che ala baia: ladin, talian o todesch. L pere de mia oma fova da Tieser tla val de Flem y al se sentiva tiroleis, enscì sie pere y sie neine. L medem vel per mi antenac fodoms y todesc. I ne podon donca nia definì la parola „tiroleis“ (che bonamenter vegn dal ladin „teriòl“) tiran ca la scempla ecuazion tiroleis = todesch ma al é n conzet truep plu ampl che tol ite realtés desvalives, realtés che à empò ponc de contat sciche la storia, certes carateristiches culturales, l raport con l teritore.

I son a una con Travers sce al dij che al é na scemplificazion ti dé la gauja dl faliment dl referendum dl 1991 demè al preve da Reba da enlaouta. Ence sce al ti à porté pro a chest resultat negatif, é la gauja prinzipala da chirì pro i ladins enstesc.

Ivan Lezuo

 

 

 Referendum a souramont per gní permez a la provinzia de Bulsan
 Ladins dles Dolomites o Ladins de Persenon/Tirol
 Ladinia brixino-tiroleisa: n valgugn sclarimenc
 La Rocia: Ladinia brixino-tiroleisa
 

 

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum a souramont per gní permez a la provinzia de Bulsan (ponc: 1)
da Jandaniel ai 13 December 2005 da les 22:52:59
(Infos sun l utilisadour | Ti mané n messaje privat)
I termegn ne é nia demé vegnus metus dal fascism dl 1923-1927. Dedò, dl 1964, à ence la gliejia, plu avisa la diozeja de Bulsan-Persenon daidé do. Ala à fat n marcé - desche i todesc à plu gonot fat con i talians a dann di ladins (recordon ence les cumpeides pro cheles che i ladins vegniva dagnora ratés talians), per podei mete zenza problems i raions todesc che audiva pro la diozeja de Trent sot chela da Bulsan-Persenon. A la jent de Fodom y de Ampez ne ti él vegnù dit net nia. Na gran mueia fòvel enlaouta, aldidancuei desfanteda, ma la jent é resteda insciautrida, na gauja per l pre-referendum ju sbuja.



Re: Referendum a souramont per gní permez a la provinzia de Bulsan (ponc: 1)
da Alex_Girardi ai 13 December 2005 da les 23:28:00
(Infos sun l utilisadour | Ti mané n messaje privat)
Ie son a una con Ivan Lezuo. Tiroleis te si dret significat ne vuel nia dí todesch, avisa desche "svizer" ne vuel nia dí todesch. Svizer contegn desche nozion dagnora "todesch Y franzous Y talian Y rumanc"; y per le vegl Tirol (y la Euregio d'aldédaincuei) velel le medemo: todesch Y talian Y ladin. I ladins muessa tigní alaut chest lian storich. Sce al ne fossa dl '23 nia sté la spartizion fascista, spo ne fossel dl '64 gnanca sté chela dla gliejia. Viva le Tirol ladin!



Re: Referendum a souramont per gní permez a la provinzia de Bulsan (ponc: 1)
da giatfosch ai 13 December 2005 da les 23:47:24
(Infos sun l utilisadour | Ti mané n messaje privat)
de un n vers él sigü vei, mo dl ater vers él da i ciaré ala realté: l terminus "Tirol" ven dai todesc odü sciöche sinonom a "todesch", y chesta idea de egemonia nazionalista é dassenn ti cês. Cun l'idea dl "Tirol todesch" va ince a üna l'idea che i ladins sides "Kulturdeutsche", che ai n'ais nia na söa cultura (romanica), mo sides pert dl monn germanich.
L vedl Tirol ne i à reconsciü degünes rajuns ai ladins, y ince i gran "Tiroler" aldedancö n'à degüna lerch por i ladins.



Re: Referendum a souramont per gní permez a la provinzia de Bulsan (ponc: 1)
da Alex_Girardi ai 14 December 2005 da les 00:01:09
(Infos sun l utilisadour | Ti mané n messaje privat)
Perchel diji pu che i Ladins muessa dagnora se reclamé ete tl Tirol, zenza féjon le sogo di nazionalisc' todesc. Ciodí pa renunzié a chest patrimone storich o le desmentié? Ti derc "Tiroleri" ái dagnora vedú truepa simpatia per i Ladins. Y la situazion tl Tirol dân le 1870 muesson vedei con d'autri uedli che con i nosc. Te n temp olache an ne savova nia ciamó ci che la sconanza de mendranzes fova, se stova i ladins tl Tirol dessegur miec che d'autres mendranzes de d'autri stac.



Re: Referendum a souramont per gní permez a la provinzia de Bulsan (ponc: 1)
da giatfosch ai 14 December 2005 da les 09:24:24
(Infos sun l utilisadour | Ti mané n messaje privat)
no, nia renunzié, mo nia le meter fora sciöche unica medejina. De bun ödl é i ladins mâ odüs can che ai renunzieia a na identité söa. La storia sot al Tirol é de chesc vers negativa, nia por ultim da recordé l tentatif da meter impè scores porì todesces: tentatif gnü sciüré zoruch con l'aoüt de Roma dla 1976 ! Töa idealisaziun é dalunc dai fac storics y politics.



Tirol - Ladins: ambivalenza (ponc: 1)
da Jancarlo ai 14 December 2005 da les 14:04:26
(Infos sun l utilisadour | Ti mané n messaje privat)
Comparidlé Tirol con la Svizra é dastramp vaghé. Tla Svizra à duc i grups linguistics dagnora abú sie reconesciment, ence i rumanc ova da empruma ensú sia scola, sie lingaz te gliejia, sies publicazions regolares da entourn l 1825 inant. Te Tirol depierpul nia de dut cant chest, a pert l Trentin talian, piec ciamò, aldefora dl 1848 ne é i ladins mai vegnus cumpedés y perchel ratés ladins a livel ofizial, ma talians. An pò se imaginé che l irendentism talian ova perchel n trionf tla man per reclamé l teritore ladin. Do la II vera à la SVP y si funzionars "ladins" fat dles dutes per avei na scola todescia tles valedes ladines. Dl 1964 él vegnù destaché soura nuet i decanac de Fodom y de Ampez da la diozeja de Persenon, demé per giaté permez les plovanies todesces sot a la diozeja de Trent, na cossa che ne jiva nia debujegn. Soura nuet n pe tl cul a centenés de storia, zenza pensé ben die do a les grieves conseguenzes per i ladins, bele spidicés politicamenter y aministrativamenter. Grana fova la mueia ta Fodom y dantaldut a Ampez oláche an ova enfinamai boicoté per n pez a la longia la messa dla domenia. Per podei mete su scoles todesces te Badia y te Gherdeina à la SVP ence fat n recurs a la Court Costituzionala che ti à dé tort. Viva Tirol??? Al resta na ambivalenza sota, sota. Dessegur à i ladins vivù centenés a la longia te Tirol y gran pert dl teritore tiroleis é vegnù de en gré via germanisé, tla eté moderna p.ej. l'auta Val Venuost. Nia demé i ladins à sourantout cultura "tiroleisa todescia", ence tl lingaz, ma ence i todesc à sourantout cultura "tiroleisa ladina", chest ne déssen nia se desmentié. Dessegur él na certa benvolenza envers i ladins, ma tant lonc pa? Demé enfin a che ai ne ghira nia y fej demeztroi ac de fedelté desche la enscidita SVP "ladina" fej? Dagnora contra i interesc di ladins (ultimamenter p.ej. la lege litala, l votum dl Istitut Cultural Ladin y dl assessorat contra l ladin standard, la niazion de na comunité de val, contra n ampliament dl ladin te scola empede encorajé y e.i.i. la lista é dret longia ...)



Re: Referendum a souramont per gní permez a la provinzia de Bulsan (ponc: 1)
da Alex_Girardi ai 14 December 2005 da les 14:49:07
(Infos sun l utilisadour | Ti mané n messaje privat)
Chilò végnel fat confujion anter definizions y cie che jent à fat d'infora. Ie reste dla minonga che "tiroleis" é per definizion na nozion plurilinguistica, deache l Tirol n'é mai sté demé todesch. Al é dagnora ince sté Talians y Ladins che á daidé formé ci che é deventé l Tirol, avisa desche la Svizera se definesc desche nazion con plu lingac. Sce al é dapò sté esponenc de partis politics che é jus de n auter vers, ne l'ái dessegur nia fat tl inom dl Tirol plurilinguistich, mo al plu tl inom de n Tirol todesch che ei a volù se cherié zenza respet dla storia. Al n'é nia veira che i Ladins ne vegniva nia cumpedés sot a l'Austria: ai vegniva metus te na categoria dal titul "talians-ladins" (tanche: ai fova nominés a pert, y al é cler che tles valedes ladines ne vivóvel laota nia talians). Per l rest: deplù "posters" chilò identificheia la SVP con l Tirol tout court. Ince sce zacai ess ion sce ara foss inscí: tan inant ne sonse ciamó nia.



Re: Referendum a souramont per gní permez a la provinzia de Bulsan (ponc: 1)
da Jancarlo ai 14 December 2005 da les 15:16:01
(Infos sun l utilisadour | Ti mané n messaje privat)
Te na sot-rubrica "talians - ladins" él demé vegnú fat pro la cumpeida dl 1910, ma tres talians. Ofizialmenter audiva enscì i ladins pro i talians. Demarevueia che dl 1848 fova i ladins vegnus cumpedés desche ladins tl vedl Tirol, desche grup etnich autonom, ergo savòven cie che an fajova. Dedò sot a la prescion di talians-trentins ne l àn nia plu fat. N patajament anter talians-todesc che vegn tres endò dant, p.ej. ence dl 1964 con l destach di decanac de Fodom y de Ampez. Defat fova l vedl Tirol plurilingh, ma dessegur nia te n contest politich-istituzional desche la Svizra.



Re: Referendum a souramont per gní permez a la provinzia de Bulsan (ponc: 1)
da Alex_Girardi ai 14 December 2005 da les 15:56:47
(Infos sun l utilisadour | Ti mané n messaje privat)
Mah, i ne sé nia ... chilò él jent (i Ladins da Souramont) che à na bona minonga / n bon recort dl Tirol y veiga te chest lian storich ence na poscibelté per n lian atual ... y impede sostegní chesta iniziativa, vegnel demé auzé fora cie che é vegnú fat damat!? Chel fej pu bele i autri! Chi che crei tla unité ladina muessessa tegní su i centenés de storia che i ladins á abù deberieda ... Lians tan stersc che chel storich n'á la comunité ladina zenza nia trueps, dal moment che cinamai tl ciamp dl lingaz n'él de chi che dij che al n'é nia n ladin, ma demé badiot, gherdena, fascian, fodom y ampezan ...



Re: Referendum a souramont per gní permez a la provinzia de Bulsan (ponc: 1)
da giatfosch ai 14 December 2005 da les 17:01:32
(Infos sun l utilisadour | Ti mané n messaje privat)
"tiroleis" é per definizion na nozion plurilinguistica, t'as rajun. L problem é che lag rangran maioranza di todesc dl Tirol à n conzet monolinguistich dl Tirol, y dantadöt dl egemonia tl todesch. Tirol ist deutsch, also sind die Italiener in Südtirol keine Tiroler. Na definizion che iö à aldì plü gonot. Y chi che se fej portausc dl Tirol (Alt-Tirol) lascia tl 99 % di caji fora i ladins: l Tirol é pur ei nia mâ todesch, mo ince antitalian. Y antiladin, mâ che dailò fejon i farisei y cunta de beles ciacoles.



Re: Referendum a souramont per gní permez a la provinzia de Bulsan (ponc: 1)
da Alex_Girardi ai 14 December 2005 da les 17:23:24
(Infos sun l utilisadour | Ti mané n messaje privat)
Ci muesson pa dapò ti dí ai Fodoms y ai Ampezans, canche ai porta dant l'argoment storich per rové indò plu damprò ai autri ladins ... lascede demé ester, le Tirol é pu mâ todesch!!?? Al é ence dovei di ladins desmostré che ala n'é nia inscí, no demé fá puede tan riei che i autri é ... W le Tirol ladin!



Re: Referendum a souramont per gní permez a la provinzia de Bulsan (ponc: 1)
da Jepele ai 14 December 2005 da les 17:37:04
(Infos sun l utilisadour | Ti mané n messaje privat)
I son dant ai spidic dla Ladinia. Ie ne capesce nia les auorités talianes da enlaouta che à tout chesta dezijion, bonamenter fòvel demé na gran vueia da raspadura da pert dl Venet, de se englobé ite la "Perla dles Dolomites, Ampez". Les cosses essa podù jí cotant autramenter, sce Ampez, Fodom, Fascia, Badia y Gherdeina fossa restés tla provinzia de Bulsan, fossa la cumpeida de ladins damprò dal 10% y i éssen na parificazion sun duc i livei, desche lingaz ofizial. Baudi éla juda autramenter.



Re: Referendum a souramont per gní permez a la provinzia de Bulsan (ponc: 1)
da Jan ai 14 December 2005 da les 18:11:27
(Infos sun l utilisadour | Ti mané n messaje privat)
Brao Alex, te penses positif. Sce le Tirol é per i todesc' monolinguistich, él nost dovier da ti fè capì che al ne é nia enscì y che enscì ne él tla storia mai sté. Meton man dantaldut te nosc cefs a mudé valch.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.387 seconc