benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Referendum per mudé provinzia y region
scrit ai 06 December 2005 da les 17:48:17 da noeles

Politica

 

La maioranza di zitadins tl comun de Lamon vuel jí con Trent

Na cogola ciauda per l Parlament a Roma

L referendum vegnù tegnù ai 30 de otober 2005 tl pice comun beluneis de Lamon (al é anter Pedavena y Castello Tesino puech dancialà da la Valsugana) à fat levé su bendebot de stuep nia demé tl Venet, ma a livel nazional L fat che la gran maioranza di abitanc de Lamon à dit cler de volei jì pro Trent, vuel dì che ei é stufs da sté tla region Venet, ajache ai é dagnora vegnus tratés mel.



L sourastant dl Venet Galan s'à dassen lascé su contra chesta volonté, ma Lamon ne bazila nia y tegn sun la sia. Galan ti dà la colpa a Roma, ajache Trent / Bulsan à na autonomia che ti à porté n grumon de dinés (=scioldi) depierpul che l Venet é feter tla meseria. Galan à dit che l Venet essa 6 outes plu dinés sce l Venet essa la medema autonomia che la Region Trent/Bulsan. Deplù autorités politiches s'à lascé su contra la gran autonomia ( = i trueps scioldi che nosta region giata) y che al n'é nia dret che d'autres regions giata cotant de manco. Chesta é na cogola ciauda che podessa avei conseguenzes tl Parlament. Durnwalder à bele dit che sce al vegn metù en discuscion la autonomia dla provinzia de Bulsan, spo se vedessa Bulsan sforzé de damané n referendum per ruvé pro l'Austria. Chesta manaceda é per trueps talians na peza cuecena, da chest se témei tres; redont perchel é Bulsan vegnù traté tant ben con na autonomia speziala. Roma à pa ben capì che n magon pasciù scouta chiet y raspa y cumpeida dinés. Che chest svilup sie positif per na mendranza él trueps che dubiteia y nia puech.

Desche an à podù lieje tl foliet ladin s'à urté i ombolc da Souramont - Gianni Pezzei, Paul Frena y Giacomo Giacobbi per rejoné de na poscibelté da tegnì n referendum per vedei sce la popolazion da Souramont essa interes de ruvé sot al variuel de Südtirol desche ala é steda enchin al 1923. Chesta enconteda vuel dì che i comuns se dà ju con la idea dal referendum y che al sarà zachei viadedò che sburla. I savon che l referendum vegnù tegnù ai 3 de  mei dal 1991 te Fodom n'ova nia porté la maioranza per jì con Bulsan, ma chel resultat ne dess sprigolé degugn; chel referendum fossa ju fora dut autramenter, sce la popolazion fodoma fossa vegnuda informeda  endertura sun l per y contra Bulsan. Veir él che da chela soula abineda dla popolazion a Reba à ben n valgugn da cafora rejoné, ma da laite ova demé l preve talian de Reba tout la parola contra Bulsan - degugn dl comun Fodom n'ova daurí bocia y l resultat messova tomé fora negatif. Ampez ova valch ann dedò lascé laoré fora da Zeller-Carrozza na sort de dossier sun les pertes negatives y positives per na juda da Souramont pro Bulsan. Chest laour ova l comun tegnù  t'armé y da n valgugn agn pèrel che dut se fossa destudé via. La signoura Manuala Zorzi à fat sia tesa de laurea sun chest tema, l à n puech amplié y la Union di Ladins ampezana à publiché sie laour dal titul " Storia di un'utopia" , n liber che i ti aconsiasse a duc da lieje chi che s'interesseia di ladins. La Zorzi veid la cossa dl referendum positiva y aladò desche Ampez é ence vegnù traté dal Venet messessa la popolazion da Souramont ester plu che a una da jì pro Bulsan. Durnwalder à dit plu iadesc che i ladins da Souramont fossa benvedus pro Bulsan, ma ei mess se dé da fé. Chest vuel dì che les seides de provinzies se lascia comedé y Souramont podessa vaghé n referendum per podei ruvé pro Bulsan. Jì pro Bulsan fossa la cossa plu normala, ajache i ladins da Souramont é contra sia volonté vegnus destachés dai fascisc' dai autri ladins y da eliminé chesta ingiustizia fòssel gran ora. Cler él che i ladins se salvarà demé sce ai ruva duc adum. I fascisc' i à pu spidicé su per i endeblì, per i eliminé plu saurì. Al é da s'aodé che i trei comuns da Souramont con sies Union di ladins se dae truep da fé per informé endretura la popolazion tant plu ben che ala vegnissa a sté da ruvé sot a Bulsan. Chest valessa per dutes les categories economiches - soziales y culturales. L fat che an mess te nosta provinzia savei trei lingac ne podessa sprigolé degugn, ajache i talians da chilò à ence abù agn a la longia da emparé l todesch; na vara de temp ti vegnissa ence conzeduda a chi da Souramont. Souramont dess avei nosta solidarité, nosta simpatia y al fossa n ben per duc i ladins, sce
ala jissa da tré adum la familia ladina eliminan termegn metus dai fascisc'.

Lois Trebo



 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Referendum per mudé provinzia y region (ponc: 1)
da Jandaniel ai 06 December 2005 da les 17:58:51
(Infos sun l utilisadour | Ti mané n messaje privat)
Ie creie che chela de damané n referendum per vegnì metus permez a Bulsan ne sie nia plu la miour streda, massa truep é chi da souramont y ence i Fascians vegnus ensciautris plu iadesc rodunt da pert dla politica dla SVP tla provinzia de Bulsan. Dl 1968 àn destaché da la diozeja de Persenon-Bulsan i comuns de Ampez y de Fodom, sceben che al ne jiva nia debujegn y che autró él ejempli olache diozejes va soura les seides provinziales fora (p.ej. Sappada auda pro Udin, ma é tla provinzia de Belun dutaorela). Da l'autra pert àn samben trat ite les pertes todesces che audiva pro la diozeja de Trent. Sce al fossa sté todesc colavia ne fossa valch de tel al 100% nia suzedú. La SVP ne à nia sostegnì i fascians de vegnì pro Bulsan dl 1973, dl 1991 é n pre-referendum ta Fodom ju fora negatif per na anescion, bonamenter àn da se aspeté chest ence per Ampez. Y spo la politica dla SVP ladina, cie féjela pa, na outa dessegur dles dutes per tegnì en pe i confins y ence i deslarié, p.ej. refudan l ladin standard a livel interladin y e.i. Ie me damane da olá che i ladins da souramont messessa tó la motivazion per na tel mudazion ..... Chilò vuelel ester de pici varesc per crié confidenza, sce an vuel veramenter chest. A vedei cie che an fej con la lege 482/99 y chest organism de coordinament che ne é nience do 6 agn da la emanazion dla lege en pe ...



Re: Referendum per mudé provinzia y region (ponc: 1)
da travers ai 06 December 2005 da les 22:30:30
(Infos sun l utilisadour | Ti mané n messaje privat)
Sci', ence ie creie che la idea de Lois Trebo de organise' n referendum a Fodom y Ampey ae fondamentes plutost melsegures. L obietif de abine' adum duc i ladins te na medema strutura provinziala-regionala e' samben na cossa sacrosanta ma canche LT rejona de reunificazion ladina pensel ence a na reunificazion tiroleisa y chest me per n agoment valgamia debl per la jent de Souramont. Da una na pert e' i fascians vegnus y vegn tres ciamo' rebutes dal comportament arogant de Bulsan y dla SVP "ladina " (l assessour Mussner ne perd mai l'ocajion de ti tre' dant ai fascians - y de ti l di' sun l mus - che ai ne rejona nia o rejona mal l ladin, da l'autra pert messonse nes damane' cie che Tirol vuel di' aldidancuei per la generazion jona de Fodom y Ampez. Per trueps ne vuel "Sudtirol" di' nia auter che scioldi, begnester economich, ma basta pa chest per ghire' l'unificazion di ladins? La maioranza dla popolazion ampezana ne a' deguna raisc ladina: a cie moda messesela pa se senti' ladina y tiroleisa?
Enultima me per la spligazion dl insuzes dl referendum dl 1991 a Fodom n puech scempla. Ti de' la gauja al preve talian de Reba ne sta nia empe', i fodoms sa' pa ben da rejone' con sie cef. Con chesta vertola vegnel scute' via l fat che i raprejenanc ladins che e' jus a fe' propaganda a Fodom se a' comporte' con la sciolita sensibelte' de n panzer: ti scriv dant a chi "pueri" fodoms cie che ai ova da fe', alias se adate' al model di "drec" ladins de Badia y Gherdeina. Chesta forma de aroganza vegn tres ciamo' metuda en mostra, magari zenza che ai se en entene, dai badioc y gherdeines, y finamai dai raprejentanc dla
a UGL, canche ai a' da fe' con Fascia.
Trueps se desmentia che la unite' ladina po' deme' vegni' da la unificazion y condivijion dles carateristiches, dles tradizions y di bujegns de dutes les valedes ladines y no da un Anschluss de Fascia, Fodom y Ampez a Sudtirol!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.573 seconc