Dede ju vosta ousc!
La delibera dla provinzia sun l'adoranza dl lingaz ofizial, sostegnuda con n bonarat dal Istitut, ne ti à plajù a trueps nia (ciala ence articui dessot). Ence te internet végnel debatù da edemes sun chest tema y nia demé sun chest sit, ma ence tl forum sun www.stol.it. Na picera curiosité, la delibera é demé vegnuda ortieda fora per todesch y talian con letra d'acompagnament per ladin olache les istituzions vegn cherdedes a souravidlé y a se tegnì a chestes desposizions.
Sul retrat: una dles truepes publicazions dedes fora sun la tematica. Chesta é dla Union Maestri Ladins dl 1993. L argoment ne à nia plu bria de vegnì aprofondì "scientificamenter". Al é straconesciù.
Dret demarevueia é propi la dezijion dl Consei d'Istitut che à danter si fins statutars chel de renforzé la coscienza ladina. La creazion de n lingaz standard ladin é na vedla aspirazion che va zeruch ai temps de Micurà de Rü (1800). L'Istitut, metù su dl 1977, ova ence sourantout chesta funzion. L ex diretour Craffonara Lois - do l'esperienza garateda ti Grijons - ova riesc tout su contac con H.Schmid, l ideadour dla "Wegleitung" dl standard ladin (1993) y ova enviè via la colaborazion con l Istitut de Fascia. I temps fova bogn chi agn, a desvalianza de encuei, dl 1985 en gaujion dl Ann di Ladins, fova n standard scrit ladin, na "einheitliche Schriftsprache", vegnù metù sun la lista dles priorités dl govern tla provinzia da Bulsan (ciala sfuei publiché da la provinzia enlaouta, an adorova enchinamai ciamò la bandiera ladina, che dova deventé con at formal dl govern ence ofiziala). Do l 1994 él vegnù fora publicazion do publicazion, ence da pert dl Istitut tla tematica, dizionars provisors tl standard dal 1997 inant y e.i. Perchel ne pon nia dì sen che al ne é nia operatif tl setour aministratif o se tré sotfora dijan che la cossa ne é nia madura, o che al ne vegn nia azeté da la jent y e.i. La chestion é bele da passa 15 agn sun meisa y straconesciuda. L ladin standard é operatif y po vegnì adorè de gre en gre olache al se pieta sciche soluzion ideala (p.ej. material dles lites, comunicazions per trames les valedes y e.i.). A mandreta sot "enrescida" tl menu sun pruma plata podeise dé ju vosta ousc o dé ite n comentar.
Da mete averda: sce vos voleis dè ite n comentar, messeise ves registré al sit, na bona ocajion!
