Les enciaries nueves tla Union

I volon porté inant nosta volenté de fé pert dla Generela y sostegnì les ativités dl Istitut Ladin "Cesa de Jan" a Col 

Ai prums de november passé él vegnù metù a jì les lites per voté l nuef consei diretif dla Union di Ladins de La Rocia. I doi scagns de Laste y de La Rocia à funzionè per cater ores da les diesc da doman enfin mesdì y da les trei enfin a les cinch, granmarcé al laour de cater joenes che dedò à ence cumpedé fora les schedes.

La Union di Ladins de La Rocia tl Beluneis (Rocca Pietore), paisc conesciù do la Marmolada, vuel vegnì a fé  pert di Ladins dl Sela y dla Union Generela, sun l retrat con la bandiera ladina.

Desche bele suzedù dl 1997 y dl 2001 la jent dl Comun à podù mete sies preferenzes anter na lista de candidac formeda da dodesc persones. Ti permete a duta la popolazion de lité i candidac proponus é sté ciamò na outa la mioura maniera per cialé de fé partezipé l plu poscibel la jent a la ativité de na assoziazion comunala che la laora per l mantegniment de cultura, lingaz y tradizions ladines de nost Comun dal 1980. Dl 1997, con demé n scagn, ével vegnù a voté puech plu de 100 persones, dl 2001 ével vegnù metù en pé doi scagns y i litadours eva cherscius a zirca 150; chest ann a desveduda y fosc ence contra les previjions di componenc medems dl consei dla Union, i litadours é stés zirca 300.

Sun na popolazion de zirca 1400 abitanc y conscidré che i son ruvés a organisé demé doi scagns sun n teritore che à enveze trei frazions y trei plovanies, cherdonse de podei zenzauter dì che chest é sté na gran desmostrazion de maturité da pert dla jent che à capì la emportanza de avei na Union di Ladins forta y raprejentativa.

Al é propi n gramarcé a chi che é vegnus a voté ti agn passés che la Union a podù mete en pé n grum de ativités. Recordon dantdaldut i raporc y les colaborazions tegnus con les istituzions, i istituc culturai y les scoles y les publicazions che i son ruvés a stampé ence con l laour de amisc y colaboradours esterns. I son ruvés a tré ca l segnal de Radio Gherdeina (89.8 mhz) y soraldut a compré n repetidour che nes permet de vedei sun na bona pert dl teritore comunal l segnal de Rai 3 Tv Ladina che trasmet duc i dis da les 19.55 n telejornal per Ladin (canal 68).

Ades che i on vedù che i on n sostegn ciamò maiour da pert dla jent, cialaronse de laoré l miour per ne delude nia chi che nes à dé sia preferenza y i cialaron de sensibilisé duc a na maioura atenzion ti confronc de na maniera de ester che, sce i ne meton nia averda, vegnirà a mancé ti agn che vegnirà, percie che souraldut nost lingaz ladin risia de vegnì “globalisé” dal dialet venet che tres de plu ruva te nostes ciases y i cherdon che n popul ae l dert ma souraldut l dovei de mantegnì cie che nosc vedli nes à lascé..

Tla reunion di 9 de november à i conseiers voté President per la terza outa Andrea De Bernardin y Vizepresident Alessandro De Grandi, duc doi dl Bosco Verde. La enciaria de cassier é steda enveze lasceda a n nuef component dl consei, Cassiano De Cassan da Soracordoul. Conseier per la terza outa é Darman Pino da Staguda, Davare Sandro da Saviner, Schena Teresa da l Còl de Ròcia y Sandro De Bernardin dl Bosco Verde che l fej pert dl consei bele dal 1990. Per la seconda outa tl diretif él Dario Vallata da La Rocia y Giovanni Daurù da Soracordoul. A la pruma esperienza Chiara Dell’Antone dal Pian y Nadia Dalla Torre dal Col. Per via de sie nuef y grief laour à enveze renunzié Lorena Davare che nos rengrazion per sia disponibelté a mete adum la lista.

An dezidarà tles reunions che vegn i inoms di nuefs revijours di conc. L Consei diretif nuef dla Union di Ladins de La Rocia ti sporj donca n gran granmarcé ben cotant a duc chi che à dé sie contribut a la Union ti agn passés, a scomencé da chi volontadifs piés via dl 1980 y souraldut a la jent che nes à empoié te chesta ultima lita.

I speron de ruvé a mantegnì cie che i volon fé, con valch pont prinzipal tl program desche: ti dè sostegn a chi che volessa se dé ju per la ladinité, empoié tres deplù nosta bela realté dl Grop de bal Marmoleda, podei colaboré tres te na bona armonia con la aministrazion comunala y con dutes les assoziazions dl Comun, porté inant nosta volenté de fé pert dla Union Generela di Ladins y scomencé a ester pert ativa tl Istitut cultural de Col de S. Lizia che nes veid sozes adum con l Comun de La Rocia. Granmarcé donca a duc con nosc miours auguresc de serenité.

Union di Ladins de La Rocia

 

 

 La Rocia: Ladinia brixino-tiroleisa

 Ladins dles Dolomites o Ladins de Persenon/Tirol

 Ladinia brixino-tiroleisa: n valgugn sclarimenc