benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

100 agn Union Ladina: festa a Dispruch
scrit ai 13 November 2005 da les 22:20:20 da noeles

Politica

 

La festa é passeda, sen méssen laoré

Discuscion con oms politics entourn meisa - Deiaco (SVP) se aoda che l comité di ombolc se enconte almanco un n iade al meis  - Willeit (LADINS): ai ladins ti màncel na identité politica

En juebia domesdì ai 10 de november 05 él sté a Dispruch gran festa per i Ladins. Al é vegnù recordé te deplù referac i 100 agn dla nasciuda dla “Union Ladina” fora Dispruch. Discuscions à mostré su les vedudes desvalives sun l davegnì y la posizion dla Generela.
 
 
 


Relazions sun la storia di ladins
 
Feter rodunt da les does domesdì capitòvel adalerch tl gran salf dal palaz dal « Land Tirol » a Dispruch cotant de jent da vigni pert dla Ladinia y de Tirol. Persones de vigni categoria enteressedes a audì i ladins cie che al ti sta sun l magon per l davegnì. Do 100 agn él dessegur sté gran ora da se damané plu sot: co vàla pa inant con i ladins, con la Generela, cie vuelen pa pié a mans y arjonje! Chesta domanda s’á la Generela bele fat n grum de iadesc da sies sentedes, endunades y manifestazions entratant chest centené passé. Ma davia che l mond se brodola tant debota inant, él debujegn da se fé cindetant chesta domanda – olà volonse pa ruvé, cal é pa nost travert?
 
L salf dl gran ciason s’à tost abù emplì ite de ativisć sun l ciamp dl ladin, de jent enteresseda a la vita di ladins, de studenć y academics ladins y da lafora. L moderadour dl domesdì prof. univ. ddr. Günther Pallaver à daurì la manifestazion con prejenté i reladours. Desche prum à rejoné l prof. univ. dr. Guntram Plangg  sun l romanist Theodor Gartner y i ladins. Chest gran studié che ensegnova a Dispruch à dé n gran contribut a la geografia linguistica che ova porté de gran novités tla materia ladina. Gartner à abiné adum n grumon de tesć ladins y metù adum na gramatica. L professour Pallaver enstes à conté dla storia di ladins encer l 1900, a cie moda che al é nasciù tl Seminar da Persenon la lia di teologs “ La Gran Naziun” . Chi agn conesciòven bele i scric ladins de Tita Alton , de A.Trebo y  de Matî Declara, la gramatica de Vian. An é ruvés al 1905 con la creazion dla “Union Ladina”, demé che chesta sort de picera aisciuda ladina ne ova nia porté al nadel de na aministrazion autonoma ladina; i trentins se  parova tres contra na maiour autonomia ladina y i todesc tegniva spo dai talians, ajache ai minova de tegnì a chesta fosa i trentins bi prosc, che ai ne se lasciassa nia su contra Tirol. L prof. Georg Mischi da Selva à rejoné dl temp anter les does gran veres che à porté a na talianisazion totala dla scola y di cognoms y toponims ladins. Na gran sfenuda anter i ladins à porté les opzions con les conseguenzes da messei dé su l sotet ladin; per gauja che la vera jiva per Hitler tres piec é la gran pert romagnus chilò, ence davia che la Talia ne ova nia tant de scioldi luecri da compré i mesc (luesc) che i optanc essa lascé endò. L contrat de Paris dl 1946 à ignoré i ladins do che Degasperi s’ova da d’aisciuda dl 1945 spazé da despartì i ladins da nuef te trei provinzies (dal 1943 – 45 fova i ladins stés adum tl “Alpenvorland”). L prof. Lois Trebo à fat n tiradum dla storia di ladins dal 1948 a aldidancuei, contan su cie che i trei statuć de autonomia à porté. Cis melcontent se àl desmostré con l 3. Statut dl 2001, davia che al rejona demé dla poscibelté che l raprejentant ladin pò gnì assessour, sourastant dla provinzia empede che al ti fossa garantì al raprejentant ladina l dert da tó ite chestes enciaries. Lois Trebo à conté su n valgugn ponc, cie che i ladins de Südtirol adora: certl lital ladin, comunité de val ladina, potenzié les trasmiscions ladines y l ensegnament dl ladin te scola, sposté l Istitut Pedagogich tla Ladinia, crié tla Ladinia deplù posć de laour provinziai per jent studieda, podei gnì fora deplù outes a l’edema con l foliet ladin. Al é ence vegnù recordé cie che i fascians é stés bogn da  arjonje: ladin te scola, comunité de val ladina, certl lital ladin, raprejentant fascian a Trent. Chi de Souramont à demé podù pié do contribuc per la cultura y enfinamai chi él sen 34 d’autri comuns ( declarés ladins) che i pizia dancialà. La lege n. 482/1999 daurissa na finestra per laoré plu intensivamenter adum y mouje Roma, sce la Generela vegnissa reconesciuda da les trei provinzies desche portaousc culturala di ladins. Depierpul che Trent à fat chest vare, se strafej Bulsan dutaorela zenza na dreta gauja. An spera che valch bun agnul i lasce capì ai oms dla politica che la salveza de na mendranza é de cotant plu emportanta che l enteres de valch partì strent ite. Lois Trebo à dit cler che la salveza di ladins é demé tla unificazion de duc i ladins pro Südtirol, davia che Aunejia ne ti darà mai ai ladins da Souramont na dreta sconanza, ma dagnora demé sbrosces y de piceres paisses per i tegnì ju bi chiec.
 
Discuscions y vijions
 
Do i referac i àla toché ai oms politics da tó posizion sun l tema: “ I ladins y la Union Generela – él n davegnì deberieda?” L moderadour dr. Pallaver ti à passé la parola al assessour ladin F.Mussner che veid l davegnì di ladins tl rejoné ladin tles families, tles tradizions, tl ladin te scola. Al à conté su les istituzions ladines: Intendenza ladina, l Istitut Ladin y l Istitut Pedagogich Al veid plutost tourbl per cie che reverda la identité ladina a Souramont y aladò de Mussner é la sposteda de confins na cossa nia realistica. Al s’la à baudieda che la Generela se desmostra gonot contra la SVP y che al i mancia la finamira. L deputat fascian Bepe Detomàs s’á declaré a una che la Generela fej gonot propostes sun l davegnì dl ladin y di ladins; la Ladinia à prospetives, la unité interladina mess vegnì plu vitala adoran n troi mesan y che an dess tré ju i pareis, fa les seides plu trasparentes. La referenta culturala de Belun dr. Daniela Filon à  valuté l lingaz ladin che fej cresce la identité ladina, ma che (ala à trat ca l referendum dl comun Lamon) l mudé termegn ne é nia la dreta soluzion. Ala à aprijé l laur dla Generela che à fat truep per i ladins dles Dolomites, per i tegnì adum y renforzé la identité ladina, sce an pensa al foliet ladin. Laoré adum soura les seides fora arata la Filon positif y che i ladins podessa giaté na sort de autonomia interladina. L viez-sourastant dla SVP Pepi Deiaco à recordé cie che la SVP à arjont per i ladins; al rata che i ombolc ladins audissa da se abiné cotant plu gonot che demé na outa o does al ann, ciuldì pa nia vigni doi meisc a traté i problems deberieda. Al à recordé che al mancia ti comuns da Souramont la volenté de na autonomia, che al é demé valch ativisć che la damana. Deiaco é per laoré adum anter duc i ladins, demé che al vuel ester comprenjion per i problems di autri. Deiaco: chi de Souramont é benvedus te Südtirol. L raprejentant dla UAL de Fascia R. Zanoner veid te leges nueves l troi segur per renforzé i ladins y che i termegn ne dess nia ester gaujes da nia laoré adum; al vuel ester raporc stersc anter duc i ladins sun l ciamp dla cultura, dla politica. I ladins dess pié ite sie destin con forzes nueves  y deberieda per jì n troi nuef che porta a la unité ladina. Leander Moroder, portaousc di Verc de Bulsan, veid tla Generela n davegnì deberieda con duc i ladins per enstradé na politica ambientala y dl trafich, soziala y economica; la cultura é da tré ite tla ativité dla Generela tres deplù; aladò de Moroder ne é la despartizion ladina deguna soluzion per la mendranza ladina. Al volessa ester strutures deberieda per la aministrazion y al vuel ester vijions, an mess endespré speranza. L foliet ladin dess gnì adoré cotant deplù per crié n maiour liam anter i ladins. Carlo Willeit, esponent dal Moviment Ladin, à afermé che la situazion di ladins ne é daldut nia da rueses con dut l bensté, la chersciuda dla economia; a la fin depen i ladins dal aparat aministratif y politich; l lingaz ladin vegn adoré cotant massa puech per volei l renforzé, raporć culturai interladins messéssel ester cotanc deplù. Willeit à dit che al ne ti vegn conzedù ai ladins deguna poscibelté da se raprejenté da soui tla politica, tla aministrazion, deguna autonomia ladina. I ladins vegn strumentalisés, al mancia ence na identité politica ladina che podessa ti saré l usc a la dependenza. La Generela é aladò de Willeit l’anima di ladins y che i ombolc ne podessa mai regosé la Generela. L sourastant dla Generela Michil Costa ti à responù al assessour ladin dijan che la Generela n’à nia contra la SVP, ma che ala podarà ben fé propostes per l ben di ladins; la Generela à ence idees y prospetives, sce ala rejona y proa da lié tres deplù adum i ladins con de vigni sort de manifestazions. La sourastanta onorara dla Generela Hilda Pizzinini à dit che an mess vedei ite che i pregiudizes defront ai autri ladins àn demé, davia che an ne se conesc nia o cotant massa puech. Perchel él essenzial da emparé a se conesce miour per se capì miour y avei spo n raport anter les valedes ladines plu da amisc empede ester desfidenć. Dessegur fòvel enlaouta che duc i ladins fajova pert de Tirol plu saurí che encuei con la despartida te trei provinzies che trata i ladins melamenter. La Generela à aodanzes, propostes, idees y chi che vuel les audi pò les audì. Al vuel ester la volenté de laoré adum y da mioré la situazion ladina. Al vuel ester la volenté politica da pert de chi che à l podei y perchel é duć enviés da laoré adum, cie che la Generela à tres fat. Una na cossa ne dess i ladins nia fé: se rassegné ! Al vuel ester ti dé coraje ai ladins da pert de chi che raprejenteia i ladins y an dess lascé da na pert i conflić vedli che audissa da ester varis pro. La pert ofiziala se à ruvé entourn les 6 da seira. (lt)
 
 
I ascutadours à giaté na idea de minonghes desvalives anter i ladins enstesc, ma chest é da osservé dlonch fora per l mond, olàche al viv deplù persones adum. La manifestazion à volù ti mete dant ai ascutadours la situaziun ladina, les desvalivanzes de veduda, i fruc portés te majon, ma ence i problems daverc y les plaies che sangoneia dutaorela – la tripartizion ladina. Chesta messessa scassé su i oms politics, davia che ala se trata pu da destó chest gran dann che l fascism ti à fat ai ladins. Sce monumenc fascisć é dutaorela n tel scandal te Südtirol, cie é pa spo la despartizion dla popolazion ladina? Piec che mile monumenc fascisć! Da la discuscion él sauté fora che la Generela é l mantel ladin che va soura les seides fora y che ala mess laoré cotant per conduje deplù adum i ladins, per tó demez murs anter les valedes. Sun chest ciamp audissa emprumadedut i ombolc y i comuns da se dé da fé, ései pu raprejentanć dla popolazion ladina che auda da ruvé adum desche al fossa normal per na familia. Al ombolt ti dìjen pu ence pere y chel auda ben da fé dles dutes che si mutons, i abitanć de comun vegne a arjonje la finamira – ruvé adum con si fredesc che viv tles autres valedes y forme na unité soula. La festa é passeda, vignun é envié da se regucé ite les manies y de laoré sun chel troi che porta a la unité ladina che é la soula che pò salvé la popolazion ladina. Chi che ne laora nia sun chest troi ti ciava la fossa ai ladins, a sia jent!
Do n bon bocon él vegnù soné, cianté y balé. Ghesć fova l cor Raieta da La Val, l cuartet Göma da San Martin y la familia da Pradac da Urtijei.

 

 
 Referat dl dr. Lois Trebo en gaujion di 100 agn Union Ladina
 Relazion dl dr. Mischi Georg en ocajion di 100 Union Ladin
 Dispruch: 100 agn Union Ladina


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: 100 agn Union Ladina: festa a Dispruch (ponc: 1)
da travers ai 13 November 2005 da les 23:26:03
(Infos sun l utilisadour | Ti mané n messaje privat)
La festa e' passeda, i problems resta. La enconteda de Dispruch, sciche les autres manifestazions organisedes via per l ann, e' vegnuda nuzeda dai raprejentanc ladins dantaldut per marche' la posizion de SIA istituzion o organisazion o partit. Plu che de n dialogh anter ladins a'n audi' endo' n iade vijions y terapies paraleles che ne se enconta mai. Les encontedes deventa ensci' sentedes formales zenza n obietif comun; al mancia na identite' y na volonte' de unite' ladina. L unich moment olache an se "enconta" e' chel dl "bon bocon con mujiga".
I problems resta. Sce al ne vegn nia chiri' na soluzion deberieda e'l pericul che ai desdruje cie che al resta dla Ladinia.



Re: 100 agn Union Ladina: festa a Dispruch (ponc: 1)
da giatfosch ai 14 November 2005 da les 09:36:22
(Infos sun l utilisadour | Ti mané n messaje privat)
"veid l davegnì di ladins tl rejoné ladin tles families"
sci, danaldut te Gherdeina, olache tröc rejona todesch te familia.
Mussner ne dess nia se crüzié dl identité ladina da soramunt (al ne ti i an po nia) y lascé de na pert sü preiüdizi, plütosc dessel se se crüzié dl identité ladina te Gherdeina, y de co che l Gherdeina ven baié vigni dé, che al é n desaster.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.382 seconc