benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Veles comunales a Bulsan ai 6 de november 2005
scrit ai 24 October 2005 da les 15:13:41 da noeles

Politica

 

Raprejentanza te consei de comun a Bulsan: n moment zite

En juebia, ai 27 de otober 2005, da les 20.00 prejentazion dla lista tl salf dl Rainerum 

Al vegn comuniché che l comité per les lites comunales de Bulsan met a jí per en juebia seira, ai 27 de otober 2005, da les 20.00 inant tl Rainerum na seira ladina con poscibelté de parché: entreda di auti da Via Cappuccini. Al ciantarà  l trio Göma da San Martin. Anter na ciantia y l'autra podaràn audi valch pensier y en valgunes racomanazions dai candidac dla lista ladins per les lites de comun. Na ocajion per avei n contat diret con ei y conesce y souradut per i encorajé y ti damané n consei.

L cuartet Göma, l pice jouf con viadedò Pütia.



Ala se trata de persones scemples che se à sacrifiché dassen per mete endò en pe la lista. Na ocajion ence per ti dí n bel dilan. La gran pert dla seira sarà samben touta ite da la conferenza dl deputat Bepe Detomas che nes contarà dl patajament anter SVP y Roma en gaujion dla aprovazion dla lege litala nueva a livel nazional, olàche i todesc de Südtirol à endò podù se asseguré si parlamentars a Roma, sclujan fora categoricamenter per i ladins la poscibelté de n sie raprejentant, davia che l lim dl 20% a livel regional é assolutamenter massa aut. Per ei se fej fora i todesc i lims che ti scusa y Roma é galantom con ei. Autramenter é l comportament dla SVP chilò te Südtirol con la oposizion, en particolar con la lista LADINS, oláche al proa te vigni maniera de desdruje l Moviment Ladin. Roma democratica ne à mai desdrut la mendranza todescia de Südtirol, Detomas tocarà ence la chestion dla reunificazion de duc i ladins tres la lege statala 482/99, che darà la poscibelté de mete su n organism interregional de coordinament per mete en pe n valgunes scomenciadives deberieda.
            Da pert de Trent y de chi de souramont végnel conté truep sun chesta lege per envié via na lignola de ativités con vantajes per dutes les valedes. La soula provinzia che scouta via l problem é propi chela de Bulsan, con la vertola che al mess na outa vegnì mudé l statut de autonomia. Na seira n pue autramenter, de enconteda, de aorela curta, ma ence de discuscion. I ves aspeton per sté n pue adum con n pice bocon.        

 

La letra dla lista LADINS maneda fora a duc i aciasés ladins a Bulsan:

Stimés  Ladins dl comun de Bulsan,

la lista "LADINS" é endò en pe. I candidac y l comité per les lites á fat n gran laour, ai se à sacrifiché dassen y la cossa é juda a bon fin. La lista "LADINS" é enjigneda y i Ves prion de Vosta creta.
Stimés Ladins, cialon de desmueve les coscienzes, empié l sentiment ladin, envié a tegnì adum per arjonje l fin: avei nosta raprejentanza te Comun de Bulsan. Nos volon ester raprejentés da nos enstesc.
"LADINS" vuel ester n partì de racoiuda de duc i ladins che viv y laora  tla zité de Bulsan, n pont de referiment per i ladins de dutes les valedes, de duc i raions: Badia, Gherdeina, Fascia, Fodom, Col Santa Lizia y Ampez.
"LADINS" tol ite dutes les opinions politiches, tegnan cont dla pluralité di ladins. L spidiciament anter plu partis desdruj la poscibelté de na raprejentanza.
"LADINS" de Bulsan é interladin y interpolitich, davert al dialogh con duc i partis, ma te na condizion de parité y nia de suditanza. Per garantì l souravive dla Consulta per i problems di Ladins de Bulsan, strutura dl Comun, messonse avei na raprejentanza, nosta, nia lieda a d'autri partis, che fajessa na outa si enteresc.
Pro la letra giateise ence na zedola-ejemplar per lité. Preibel, pro la lita scrivede enfin a cater inoms. La lista "LADINS" vegn demé dant tla zedola "rosa" y nia te chela "grija" dles zircoscrizions.
 I aconsiadours dla lista "LADINS" s'á tres cruzié de mené inant ativités desvalives tl ciamp sozial, cultural y de agregazion, dl sté adum. Ai á defenù i enteresc di ladins chilò a Bulsan y ai á fat da mediatours anter i gran partis y la jent  dàn ence aiuc concrec. Te chisc chindesc agn de nosta raprejentanza te Comun onse arjont la costituzion dla Consulta per i problems di Ladins de Bulsan y l'indenité de trilinguism per l personal che laora pro la Consulta, la denominazion ladina sun la tofla de "Benvegnus" a les entredes dla zité, i on tout pert  a les deliberes dl Consei de Comun con nostes propostes y i ti son stés do dassen a la realisazion dla Ciasa-alberch y truep d'auter.

Program per l davegnì:
- la denominazion per ladin di fabricac d'enteres general: comun,
  ofizes  finanziars, teater, université, fabricac dl sport..., per renforzé
  la dignité y la identité ladina tla zité;
-divulgazion dles conties ladines tles scolines y tles scoles
  elementares;
- plu garanzies pro la compra de apartamenc a na moda che i defec
  y cie che al mancia vegne adebité a les firmes che i á costruì; chest
  tres n maiour control dl afidament di laours de costruzion a dites
  fidables; individué tl ambit dla normazion dl fabriché residenzial i
  standards dla tecnica dl fabriché y de sia funzionalité per condizioné
  la conzescion dla lizenza d'adoranza;
- mioré te n valgugn ponc pericolousc l troi dles rodes fora per la zité;
- conscidré danuef l'aplicazion dl'ICI;
- poscibelté de parché te zité entratant l'edema per i pendolars che à
  n cuartier o na ciamena adenfit;
- damané plu servisc publics: architeda di bus damprò da les ciases
  de paussa, mete su n minibus per trasporté i ghesc' dles Ciases de
  paussa te n valgugn zentri prefissés dla zité y  per ruvé plu saurì pro les   ciases de  paussa, les cliniches.;
- plu atenzion pro l'assunzion dl personal destiné a la cura dles
  persones atempedes, di amalés ence per cie che reverda la
  conescenza dl lingaz.;
- enrescida sun la situazion dles persones atempedes soura i 75 agn,
  soules, con poscibeltés economiches minimales, per ti dè na
  consulenza o n teleaiut y auter.

I Ves prion inant de Vosta creta. Preibel, litede la lista "LADINS".

Saluc dai candidac dla lista "LADINS"

 
 La lista LADINS a Bulsan - i inoms
 Lites de comun a Bulsan: l program dla lista LADINS
 Lites: la lista ladins vegn metuda en pe
 Lites de comun a Bulsan: dantaldut unité
 Bulsan: raprejentanza politica te comun

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Veles comunales a Bulsan ai 6 de november 2005 (ponc: 1)
da Janpire ai 27 October 2005 da les 23:52:25
(Infos sun l utilisadour | Ti mané n messaje privat)
Propi na bela seira. Ivan Lezuo, president dla Comunanza Ladina a Bulsan y candidat dla lista comunala LADINS, à fat l pont dla chestion: i ladins ne é nia l terz grup linguistich, ma i son un di trei grups linguistics y i ladins auda da avei i medems derc.
Bel l intervent dl deputat ladin Giuseppe Detomas, Fascia é politicamenter oramai dant y Trent à superé Bulsan.
Complimenc al Cuartet Göma che à descedé con les cianties portedes dant a n aut livel sentiment ladin .....


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.384 seconc