La Ladiniatour fej endò la roda

Do 6 agn de paussa edizion nueva con trei seires de conzert  ai 18, ai 19 y ai 20 de otober: una a Poza, una a S. Cristina y una a La Ila 

Poza de Fascia, S.Cristina y a La Ila, respetivamenter ai 18, 19 y 20 de otober 2005, é i trei luesc olache la Ladiniatour 2005 fej stazion. Al é passé bele sies agn da l’utima edizion Ladiniatour 99, dutaorela tla recordanza de trueps. L gran enteres per la mujiga moderna ladina à descedé grups nuefs da duta la Ladinia y perchel fòvel temp de fé na edizion nueva.

Egon Vinatzer y Marion Kostner entant i ultims preparatifs dla tourné  

La Ladiniatour nasc con l sostegn dla Union Generela di Ladins dles Dolomites l ann 1989 y é juda inant per diesc agn con 5 edizions, dutes dagnora con gran suzes de publich y de critica.
“Da la ultima edizion él passé truep temp, agn che é jolés aslum,  ma an pensa dutaorela gen a  tant de grups de duta la Ladinia sibe dolomitica che dal Friul y da la Svizera che à fat pera y che é nascius aposta per l’ocajion y ence a tant truepa jent che é for vegnuda a scuté su. Chesta é la motivazion dl percie che i volon endò jì inant con la Ladiniatour”, dij Egon Vinatzer un di promotours y organisadours dla lingia de conzerc nueva de chest auton.

La Ladiniatour é nasciuda con l fin de sensibilisé y de tré su i joegn a cianté y a scrive cianties nueves modernes per ladin. La Ladiniatour é per trueps steda la cuna dla mujiga, n grum de grups nuefs se à metù adum aposta per soné y cianté pera a la tourné. Entant duc chisc agn él vegnù a se l dé bendebot de cumpeida de produzions con cianties modernes nueves tla rejoneda ladina che arichesc y deida da ti dé gran emportanza a la cultura y a la mujiga moderna ladina. Sce do la rata dant 16 agn en fòvel  ciamò puec che se enfidova de cianté dant n publich mujiga moderna per ladin, dapò pòn dì che aldidancuei él chest n fenomen plu che normal. Un di grups de gran inom che é nascius con la Ladiniatour y per la Ladiniatour é i “Acajo” de Urtijëi. Ei se à metù adum propi per caje, per fé pera a la lingia de conzerc y l soul grup che à fat pera pro dutes les edizions.
 
“I son contenc che nosta idea y scomenciadiva, nasciuda istintivamenter y spontaneamenter l ann 1989, à souravivù ence do na paussa de n valgugn agn y che ala é chersciuda, madurida y é deventeda na pert viventa y emportanta dla cultura ladina de aldidancuei. Te chest spirit speronse che ala vae inant ence tl davegnì, nos cherdon a la Ladiniatour”, enscí l organisadour Egon Vinatzer.
 
N mertesc, ai 18 de otober 2005, scomencia la tourné tl tendon a Poza de Fascia, en mercui, ai 19 de otober 2005, vàla inant tla gran sala dla Ciasa de Comun te S.Cristina y en juebia, ai 20 de otober gran finala tla Ciasa dla Cultura a La Ila, for da mesa les nuef da seira.
 
I grups che fej pera é:
da Gherdëina: i Acajo, i Comminais, y i Secco;
dala Val Badia Hubert & Compagns, Alexander dal Plan & Copagns, Iaco Rigo & Copagns y i Emmmaus;
da la Val de Fascia i Pazedins y
dal Friul la grupa “Quella Mezza Sporca Dozzina.”
I prejentadours dles seires é: a Poza de Fascia Maura Chiocchetti, a S.Cristina Armin Moroder y a La Ila Markus Valentin.