Noeles.net - Informazion ladina - Politica comunala te Gherdeina: ejempl Selva y Urtijei

Coche Ewald Moroder coiona i conseiers de comun

La senteda voluda da la oposizion chérdel ite da les 8.00 da doman y chela dla jonta l dí do a n orar normal da les 16.00, ma zenza l pont volù da la oposizion - La Lista LADINS à encondé na plura a la procura - Ence a Selva comportament anti-democratich

Pro l'ultima senteda de comun te Sëlva à la lista LADINS fat anter l auter la proposta de auzé les indenités per la streda dles rodes y dai ski, de se cruzié dàn n contribut a chi che fej l laour dla restaurazion dles stazions da Daunëi ite te Val y de cialé che duc i conseiers ae la documentazion completa dl comun per podei se enjigné endretura y che i grups dl consei posse ruvé adum te valch salament de comun a rejoné fora anter ei y con i zitadins enteressés chestions plu emportantes che reverda l comun.

L ombolt de Urtijei (Svp) y la lista Urtijei (ex-Verc) ne vuel nia avei sun l orden dl dí la "viabelté sun la streda Tresval" y fej jí a vuet does sentedes dl consei voludes da la oposizion.

La jonta y sia maioranza à dit de no a chestes propostes zenza se dé ju sceriamenter emmpera.“Nos on bele fat y i fajon pa ben - al ne va nia debujegn“, chestes respostes standard ne dij nia auter che al mancia la vueia y la disponibelté de laoré deberieda. Che la mensa dles scoles sie na chestion caimò da studié y pro les stazions de val ciamò da sclarí chi che se cruziará é da capí, ma la ostinazion y les vertoles per ne ti dé nia la documentatazion y la poscibelté de reunion ai conseiers y si grups ne à degun fondament y va contra les regoles dla democrazia y dla trasparenza. Fora de luegia é les scuses dla burocrazia, di cosc', dla creta o les acuses de volei demé fé politica, per ti tó la poscibelté de fé sie dovier da conseier a la oposizion o per tegní socret l'ativité dla jonta y dla maioranza.

A Urtijei s'à la lista LADINS damané de cherdé ite l consei per fé na discuscion emportanta sun la viabelté y l ombolt cherda ite l consei per les 8 da doman con un n pont soul acioche al ne ruve nia adum la maioranza prescrita; l di do chérdel ite na senteda „normala“- con l orden dl di dla jonta. La convocazion damaneda dai conseiers vel tant che chela dl ombolt, ne mess nia ester de prescia y l orden dl di pò jì adum con chel dla jonta. Ence chest comportament é n segn cler contra la colaorazion democratica dl consei de comun.

Carlo Willeit


Vos ne seis nia loghé ite. [ Loghé ite ]