benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N daz sun i joufs entourn l Sela
scrit ai 05 October 2005 da les 14:08:00 da noeles

Politica

 

N daz sun i joufs: chi che vuel chestes sieves vuel desfé les relazions anter i ladins

I joufs dles Dolomites ne pòn nia mete a la pèr de n Stilfserjoch y de n Timmelsjoch

de Carlo Willeit

Encer l daz via él chiet; al someia na cossa fata fora; n auter ann de beles stazions dl daz y l ann do la vigneta dal dí, da l'edema, dl ann, per duc, ence per i aciasés encer l Sela via. Chi che va vigni di via y ca, chi da les uties y dai emplanc portamont, aministradours y controladours, y valch auter racomané y nia racomané giatará ben sia autorisazion debant.

Messarà tl davegnì i conseiers dla Generela y i ombolc, sce ai vuel se enconté, daurí l tacuin y paié n daz, sce ai vuel jí tla valeda vejina? Mussner vuel mete i contac interladins a paiament.

 



Nia demé i ostiers foransom la val y chi che rata da messei se tegní i sciors te sia valeda, ma ence trueps d'autri someia che sie a una da fé paié o da scluje (d'invern, can che l daz ne se paiará nia, podaran ence scluje plu saurí la streda entiera), ma nia duc ne é a una y con de bones rejons:

Manco auti – Su per i joufs pòl ester valch auto y motor demanco, ma tla val, tai paisc, olàche l problem dl trafich, dla vera, dl stuep é scialdi maiour, ne en sarál nia demanco sce ai ne pò o ne vuel nia jì inant y sce al ne vegn nia fat les zirconvalazions.

Na couta en plu -  Ici, Irpef, Iva, Irap, couta de frabicazion y de zircolazion, adizionales sun coutes, servisc publics paiés al 100% y tickets - coutes per studié, sanité, previdenza y assistenza,…ne basta nia, ence la streda mess se paié l zitadin? Ma al é ence na entreda, me dijareise! Na entreda fora dles tasces dla jent y dai sciors che dà fora valch deplù y che l comun giatará demanco fora dla cassa de duc, sce al essa da giaté chisc dac. Sce ai vegn adorés per mantegní la streda i giatará ben chi che mantegn la streda - la provinzia. Tant trueps ne en saràl perauter nia da partì su, trates ju les speises.

Na scleta propaganda per la sajon da d'isté. Da agn bele é la sajon da d'isté dolarata scleta, curta y con na gran concorenza. L turist vegn propi per se giaude les montes y al ne va nia vigni di encer l Sela via con l auto, ma da vegnì y da s'en jì y da sté chiet méssel paié. Gen ne paia dessegur nia, no l scior da n dí, no chel da chinesc dí.

Na sief per la jent - Pensan en pue plu lonc él ben da daudé, sce chi che viv sun l post, mess paié per podei laoré, paussé, rodé, jí a se ciaté, jí a sté anter sia jent, sun sie grunt; scí sie grunt, ajache la streda ne é nia dal stat, dla provinzia, dl comun, ma dla jent y de chi che la adora. L daz, l lasciapassé, l control, les straufonghes é na sief che tegn su les relazions ledies anter la jent y laprò ence i cefs, les idees, la colaorazion, l sentiment. Chi che vuel a vigni cost chestes sieves, vuel ence desfé les relazions anter les valedes ladines. Che Bulsan met i joufs dles Dolomites che colieia na comunité soziala y economica y laprò etnica y culturala, a la pèr dai joufs de Stilfs Timmelsjoch y Staller Sattl, che é per sia natura scluc trei cherc dl ann y ne colieia degunes comunités omogenes, dij assé. Che al ne vegn nia fat unfat con d'autri joufs(Costalungia, Lavazé, Mendel, Gampen, Pens, Jaufen, Munt de Crusc…) méssen ence conscidré.

La conferenza di ombolc ladins dije pu la sia! Sce ala dess avei na funzion, che ai dije pu la sia, chesta conferenza; ala va pu dl coliament anter les valedes ladines, dla enterferenza dles provinzies sun l teritore di comuns, dl tratament dla jent aciaseda te chisc comuns. Co che ai feje da se merité la creta con ti fé paié l daz sun streda - per n chert o mez en jouf magari - ence a si zitadins, fossi propi ence ie corious!

 

 Siour Fonjo Clara: i joufs lieia les valedes
 Reunion generala dla Moviment Politich Ladins
 Smendrì l trafich sun i joufs
 Joufs entourn l Sela: ostiers scetics
 Scluje i joufs entourn l Sela: Fodom dij nò
 Stude sun la fatibelté de scluje l jouf de Frera
 I joufs ladins: Mussner vuel mete su les stanges
 Joufs a paiament: an met man con l Timmelsjoch y l Stilfserjoch
 Joufs selans: AT de Gherdeina y Alta Badia a una

 

 Relevazions EURAC sun l trafich soura i joufs 




 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: N daz sun i joufs entourn l Sela (ponc: 1)
da Jepele ai 05 October 2005 da les 14:16:04
(Infos sun l utilisadour | Ti mané n messaje privat)
A mè me sàl na grana che la USC di Ladins ne à mai ciamò tematisé redazionalmenter chest argoment, sceben che al é bele da meisc che al vegn rejoné sun duc i foliec ... Nia da creie!



Re: N daz sun i joufs entourn l Sela (ponc: 1)
da Jepele ai 05 October 2005 da les 14:30:12
(Infos sun l utilisadour | Ti mané n messaje privat)
I volesse ence damané Willeit, sce chest provediment dla provinzia de Bulsan ne é nia anti-costituzional y sce al vegnirà fat n recurs al Tribunal.
Emprumadedut é n tel provediment contra les relazions ledies anter les valedes ladines. I zitadins ladins messessa paié per l servisc dles stredes n sourapriesc che autró ne messi nia paié. Al ne é nia na valivanza de tratament. Les rejons de Mussner & co. ne é nience ecologiches, ma porì egoistiches per Gherdeina.



Re: N daz sun i joufs entourn l Sela (ponc: 1)
da giatfosch ai 05 October 2005 da les 14:32:41
(Infos sun l utilisadour | Ti mané n messaje privat)
1. la tripartizun ven raforzada, la jent ladina despartida: Mussolini rengraziass sc'al foss ciamó n vita
2. con n daz ne sparesc degün auti ingnó.
3. les somes netes che romagn da n daz sarà tan basses c'an ne podarà sogü nia fà impara strotöres nöies!



Re: N daz sun i joufs entourn l Sela (ponc: 1)
da Jancarlo ai 06 October 2005 da les 15:34:37
(Infos sun l utilisadour | Ti mané n messaje privat)
L colm é ben cie che l president dla Generela, M. Costa, à dit y scrit tla USC: la enconteda anter i ladins dess ester plu tl cef che tla mobilté fisica :-)) ... chilò me végnel ben demé da dí, parafrasan "pordona, ajache ai ne sà nia cie ai se dij"



Re: N daz sun i joufs entourn l Sela (ponc: 1)
da travers ai 06 October 2005 da les 19:44:17
(Infos sun l utilisadour | Ti mané n messaje privat)
Mah, M. Costa rejona sciche na sort de Dalai Lama dles Dolomites. La idea che l coliament
spiritual (tl cef) anter ladins e' plu emportant che l coliament fisich pieta na soluzion dldut originala per i popui despartis. La Germania y l Vietnam se a' unifiche' tres la forza politica o miliara, la Corea podessa se ispire' al messaje dl president dla Union Generela di Ladins.



Re: N daz sun i joufs entourn l Sela (ponc: 1)
da giatfosch ai 06 October 2005 da les 21:12:06
(Infos sun l utilisadour | Ti mané n messaje privat)
al é por nia i dé ados a M.C.
da critiché é le gran promotur dl daz che jess a completé l'operat fascist: i contac interladins sarà tl dagnì a paiament.



Re: N daz sun i joufs entourn l Sela (ponc: 1)
da travers ai 06 October 2005 da les 21:40:12
(Infos sun l utilisadour | Ti mané n messaje privat)
Sci ma Mussner ne é nia soul y certes ambiguités ti porta ega a si molin.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.389 seconc