Resultac dla enconteda di ombolc ladins y di sourastanc dles provinzies
“L'econteda é la pruma pera de fondamenta per na bona colaborazion anter i comuns ladins” dij Reolon
La creazion de n organism de raprejentanza per i Ladins entourn l Sela é sté l argoment prinzipal dla enconteda dl President dla Provinzia Durnwalder, dl President dla Provinzia de Trent Dellai, dl President dla Provinzia de Belun Reolon y dl assessour Mussner con i trei ombolc ladins de Fodom, Col Santa Lizia y Cortina, i set ombolc de Fascia, i ot ombolc de Gherdeina y dla Val Badia y l ombolt de Ciastel sciche raprejentant di interesc dles frazions ladines de sie comun. N organism metù adum dai 19 ombolc di comuns ladins dess tl davegnì sourantò la raprejentanza dl grup etnich ladin entourn l Sela.
I ombolc se darà ju con i problems desvalifs di Ladins y cialarà de giaté soluzions, à dit Durnwalder. „Canche la Conferenza di ombolc metarà a jì projec ti setours desvalifs y laorarà fora programs podarài tré ite les organisazions y les istituzions locales che laora bele da agn te chisc ciamps, sciche per ejempl La Union Generela di Ladins, i istituc pedagogics y de cultura y e.i. per l ciamp dla cultura” à splighé Durnwalder. “Con chesta enconteda ésen ruvés n puech plu dlongia a l’unité di Ladins ajache te chesta enduneda s’à duc i ombolc di comuns ladins y i Presidenc dla Provinzies dé ju deberieda con i interesc di Ladins” à auzé fora l President dla Provinzia de Trent Dellai. L istituzion de na Conferenza di ombolc é na poscibelté emplù piteda da la lege per ester bogn da raprejenté miec i interesc di Ladins, à dit Dellai. Ence l President dla Provinzia de Belun Reolon é sté content dla enconteda y di resultac arjonc. „Chesta enduneda é steda n moment d’enconteda de gran emportanza olach’al é vegnù metù“, enscì à dit Reolon, „la pera de fondamenta per na bona colaborazion anter i comuns ladins soura i confins provinziai fora“. Durnwalder, Dellai y Reolon à te chesta ocajion bele podù mostré su n ejempl concret per la colaborazion anter les provinzies: ai à sotescrit l protocol d’acordanza interregional per la candidatura dles Dolomites a patrimone natural mondial dl’Unesco. Ala se trata de n’acordanza dles provinzies de Bulsan, Trent y Belun adum a les provinzies de Prodenone y de Udin. Te chest protocol é les aministrazions publiches locales dles cinch provinzies a una de tegnì adum per cie che reverda la candidatura dles Dolomites a patrimone natural mondial. (osp)
