benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Pelegrinaje a Weissenstein en ocajion di 100 agn dla Union Ladina
scrit ai 20 September 2005 da les 14:48:06 da noeles

Manifestazions


Weissenstein: n di de liberté y unité

en domenia, ai 25 de setember 2005

Maria WeissensteinAnter les manifestazions per i 100 agn dla Union Ladina él ence prevedù na manifestazion religiousa a Weissenstein, n zenter dassen conesciù y anuzé da la spiritualité di ladins, almanco da chi de Gherdeina, Val Badia y Fascia. Ence sce vigniun de chestes trei valedes fej vigni ann sie pelegrinaje a Weissenstein, vuel ester chest pelegrinaje n viade deberieda, ence con chi da Souramont. L pelegrinaje sarà en domenia che vegn, 25 de setember, con l orar y program publiché dessot. Al moment él ciamò la fede che nes lieia adum ence sce ala va bele dassen do ju ence tles valedes. La fede é l patrimone dles persones scemples y senzieres, davertes y a una de sté y tegnì adum.

 



I gragn interesc lieia demé valgugn grups economics, ma pro chisc toma demez la solidarité y souradut la identité ladina. Chisc grups se damana folclor, sfiledes per tré jent y scioldi. L pelegrinaje a Weissenstein é n di de liberté per la persona, de descorida di drec valours, de poscibelté d’ester n bon iade ledesc dai condizionamenc y ester se enstesc. N di de contat con i ladins dles autres valedes, de esperienza dl sentiment religious coletif, de orazion te nost lingaz. N di de fraternité dalonc da les veres da vigni di, n di de superament di confins y de invajion de n vedl teritore ladin. Tanc é i motifs per tò pert al pelegrinaje, dantdaldut chel dla speranza de podei mantegnì la richeza religiousa, spirituala. I patres dl santuar conesc ben i ladins y i aspeta dagnora gen. En gaujion de chest pelegrinaje saràl ence valch novité: la enaudazion dla Via Crucis renoveda anter Deutschnofen/Nova Ponente y Weißenstein. La restaurazion é gnuda realiseda per intervent dla Union di Ladins de Fascia deberieda con l comun y la compagnia di scizeri de Deutschnofen. Bela chesta colaborazion, segn de fede!

PROGRAM:

  • Da les 11.30: abineda ilò dal Mesc Kehr dlongia Deutschnofen. Salut dles autorités, sonedes dla mujiga de Deutschnofen y prejentazion di scizeri.
  • Da les 12.00:Peia via la prozescion dla Via Crucis con la benedescion dles catordesc stazions. Al vegnirà prié per ladin, todesch y talian.
  • Da les 14.30: An ruva su dal Santuar Santa Maria de Weissenstein y la prozescion vegnirà saludeda da les autorités y touta ite dai grups de folclor, dai scizeri de Fascia y da la Mujiga de Moena.
  • Da les 14.45: La prozescion va al santuar: omaje di Ladins a Santa Maria con valgunes cianties y ponuda de ciofs.
  • Da les 15.00: Santa Messa per ladin y per todesch dita dal degan de Badia, siour Franz Sottara. Al ciantarà l cor dla cura da La Val (dla Val Badia). Do Messa n bel dilan a duc canc chi che à colaboré al renovament dla Via Crucis.
  • Da les 16.00: Tl salf di congresc: salut di raprejentanc dla Union Generala di Ladins. Prejentazion dl liber: “La religiosità popolare nelle valli ladine”. Vijita a la mostra dles operes dla Scola d’Ert de Poza.
  • Da les 16.30: Conzert dla Mujiga de Moena
  • Da les 17.00: Picia marena per duc chi che à tout pert.

N program interessant. Na bona ocajion per na reflescion sun nosta fede y religion. Na festa n puech autramenter, che nes dà valch da nes tò con nos per la vita da vigni dé. Na benedescion y na daurida ai valours spirituai. Dassen sciode che les ploanies n’ae nia anunzié te gliejia l event con l invit a tò pert. (uc)


 
Liams emparentés
· Deplú sun l tema Manifestazions
· Chier te noeles


L articul plu liet te chest tema Manifestazions:
Festa de benefizenza sun Mont de Pana, n gran suzes


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.322 seconc