benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Prejentazion dl toch de teater en ocajion di 100 agn dla Union Ladina
scrit ai 19 September 2005 da les 09:08:05 da noeles

Manifestazions


"A la enrescida dl ladin perfet", teater te cater pertes

N toch de teater de Simon Kostner y Daria Valentin - cinch raprejentazions tles cinch valedes ladines 

Simon Kostner y Daria ValentinI savon duc che i ladins é despartis da de gran pareis de pera dolomitica. Les valedes ladines se destira pu fora entourn l massif dl Sela via plu o manco sciche na steila. Enscì sciche sie teritore é despartì da chest material tant dur y freit, enscì éla ence con la jent che l abiteia. I badioc va sia streda, i gherdeines la sia, l medem fej ence i fascians, i fodoms y i ampezans. Co fòssela pa sce an provassa na outa da i mete duc canc adum sun la medema paladina? Co fòssela pa sce an i lasciassa joblené tl medem pez de teater?

Simon Kostner y Daria Valentin l ann passé entratant la prejentazion dl liber "Lüch d'arjënt" de Daria Valentin

 



Chesta é steda una dles reflescions che i autours dl toch de teater “A la enrescida dl ladin perfet” se à fat can che ai à scrit chest pez. I son pu duc canc fredesc, i fajon pu duc canc pert dla medema familia, perchel podonse dessegur ence nes permete da nes enconté n iade te na forma n puech  autramenter, chela dl teater per ejempl.
“A la enrescida dl ladin perfet” é n toch de teater modern (che va datrai enchinamai tl fantastich o tl assurd); al toca deplù argomenc, che va dal ambient a la economia, da la politica a la cultura. Con chest pez àn volù prové da mostré su ciunes che é les dificoltés che i ladins dles Dolomites podessa avei te mez n secul tl mantegnì sia identité, sia cultura y sie lingaz.
L lingaz tol dessegur fora na gran lerch te chest toch de teater, ma nia te sia forma plu strenta. Comuniché pon te truepes manieres, les formes de comunicazion che an à a desposizion é pu tant truepes. Ciuna é mo mai chela proponuda tl pez de teater “A la enrescida dl ladin perfet”? El l ingleis druché tres da la LULSII, la Lia per la Uniformazion Linguistica tl Sant Inom Ingleis? El una dles variantes dl ladin, l ladin dolomitan o él dut valch d'auter?
A chesta domanda pò demé respone i cinch moschetiers ladins, ajache demé ei à l coraje da se espone, da se mete tl pericul y da se enconté n iade al meis sun l Jouf de Sela per giaté na streda da ruvé sun piza de Boà olà che al viv l Gran Reto, l Pere de duc i ladins. El poester à la dreta medejina per salvé i ladins da sies despartizions, da siei confins y da dut chel che ne ti permet nia de vive en pesc y en armonia sot al medem tet ite.


I cinch moschetiers dl Sela
A LA ENRESCIDA DL LADIN PERFET

Teater te cater pertes de Simon Kostner y Daria Valentin

Raprejentazions:

  • sabeda, 01.10.2005, da les 20.30 a La Ila/Val Badia tla Ciasa dla Cultura (prenotazions Michaela Anvidalfarei, 0471/839935-3391104086)
  • domenia, 02.10.2005, da les 20.30 a Reba/Fodom, tl Centro Servizi (prenotazions Franco Deltedesco, 338 4306071)
  • juebia, 06.10.2005, da les 20.30 te Anpezo tl Cinema Eden (prenotazions Cooperativa 0436 861245 orar de boteiga 8.30-12.30 y 15.30-19.30)
  • sabeda, 08.10.2005 da les 21.00 a Ciampedel/Fascia tl Teater (prenotazions Union di Ladins, 0462/764545 da les 9-12 y 14-16)
  • domenia, 09.10.2005 da les 20.30 a Urtijëi/Gherdëina tla Cësa di Ladins (prenotazions Union di Ladins 0471 796870 da les 9 a les 12)

100 agn él passé da can che duc i ladins entourn l Sela via ova fat sia gran manifestazion contra la despartida tles trei provinzies: sen él finalmenter vegnù chel famous 2046 che parova permete tant ben per l mond dolomitich.
Ma la realté é n’autra: mudamenc climatics, veres y crises economiches à sciuré la popolazion te na gran meseria. I ladins é governés da na nueva potenza, ria y da temei, che proa a vigni maniera da ti tò sie lingaz y sia cultura.
Demé n valgugn puec, plu avisa un per valeda se à entenù dl pericul y proa da se fé pensiers sun l gran dann che la perduda de 2000 agn de laour per mantegnì en vita l ladin comportassa. Enscila se enconta chisc oms sun l Jouf de Sela per se studié fora la dreta maniera da ti jì permez al Gran Reto, l Pere de duc i ladins, per l prié do aiut.
Ma sarà pa nosc cinch moschetiers bogn da defene la Ladinité da chel gran pericul raprejenté da la LULSII, la Lia per la Uniformazion Linguistica tl Sant Inom Ingleis? O sarà pa ence ei destinés a messei dé ju dut sie avei, sia tera, sia economia, sia politica, sie savei ai patrons dla globalisazion?

Joblers: Johannes Gaspari (Anpezo), Martina Demattia y Ivan Foppa (Fodom), Daniela Rasom y Vigilio Iori (Fascia), Wally Mussner y Alex Runggaldier (Gherdëina), Veronica Vallazza y Eduard Zingerle (Val Badia), y Pepi Kostner.

Regia: Simon Kostner

Organisazion: Ilda PIzzinini, Werner Pescosta (Union Generela di Ladins dla Dolomites), Unions Ladins dles Valedes, Irene Zingerle, Daria Valentin, Simon Kostner

Projet: Union Generela di Ladins dla Dolomites


 
Liams emparentés
· Deplú sun l tema Manifestazions
· Chier te noeles


L articul plu liet te chest tema Manifestazions:
Festa de benefizenza sun Mont de Pana, n gran suzes


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Cultura

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Prejentazion dl toch de teater en ocajion di 100 agn dal Union Ladina (ponc: 1)
da giatfosch ai 19 September 2005 da les 11:21:09
(Infos sun l utilisadour | Ti mané n messaje privat)
"savon duc che i ladins é despartis da de gran pareis de pera dolomitica". No, chel ben no. I pareis ne despartesc nia, dailó n'esistessel degun Tirol de nia. A despartì él i cês dla politica, B. Mussolini dan da agn, incö d'atri.


Le teater é na bona iniziativa.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.347 seconc