Da lieje do tl protocol .....

Per completeza sciche al é vegnù a se l dé la dezijion dl Consei dl Istitut M.R. en cont dl'adoranza dl ladin sciche lingaz ofizial tla provinzia da Bulsan onse sen ence dantman l protocol de chela senteda, tignuda ai 17 de setember 2002, tla senta de Selva. L protocol al pont 6 dij: davegnì dl projet Spell: "A la fin dla discuscion fej l president does domandes:

1. Seise a una de jì  inant con l proiet per n lingaz unifiché y con l Spell?

2. Seise a una de sourantò la proposta de adoré entant alternativamenter l gherdeina y l badiot per cie che reverda les traduzions aministratives a livel provinzial?"

Resposta a la domanda n. 1: dut l consei a una

Resposta a la domanda n. 2: dut l consei a una.

Mussner a giaté enscila dal consei l consens. Al é vegnù sburlé ite la parola "entant", sciche al à spo ence dit chisc dis Durnwalder, ma per na pert vuel chest dì entant tan che "dauerhaft".

Sce l Consei crei tl Spell o tl ladin standard, spo éssel bele te chel moment messù tò na dezijion clera: per cie che reverda trames les valedes l standard. Na tel dezijion essa  zenzauter podù  vegnì  fata conesce publicamenter, tant deplù che al fova does manifestazions importantes atira dedò: l Colloquium Retoromanistich y l Convegn Internazional sun la standardisazion de lingac de mendranza a Urtijei.  An savova avisa che l dizionar dl ladin standard ruvova sun meisa de dezember y che l standard é operatif ence tl ciamp aministratif.