benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Convegn a Selva: i comuns ladins pensa a sie davegnì - II pert
scrit ai 11 September 2005 da les 22:34:05 da noeles

Politica


Bulsan dassen scluta, Trent dassen davert

Lorenzo Dellai: l lingaz é la oma de vigni politica a ben di ladins

Do la ousc di esperc audionse chela di politics. Desche prum á rejoné Florian Mussner. N salut curt per ladin y spo él ju ite atira sun la storizité di ladins dijan cler che i ladins dl Comelich auda pro i Furlans, zenza tò en conscidrazion y almanco desfarenzié la comunité de La Rocia. Con puecia convinzion àl recordè Fodom, Col y Ampez, olache dal cianton dla sconanza dla cultura ladina él ciamò vegnù fat puech y laudan i ladins de Trent che te chisc ultims agn á fat truep te chest vers ál volù i envié a se mueve, a realisé valch de plu.  Da man ciancia: Lorenzo Dellai, president dla jonta de Trent y Luis Durnwalder, president dla jonta de Bulsan.


 



Ence Mussner se fej pensiers sun l problem dla speculazion dl fabriché che é de dann al davegnì di joegn, sforzés a chesta moda de jì fora de valeda a se chirì laour y cuartier. Ma Mussner, desche assessour lié al graton de Durnwalder, ti á volù recordé ai ladins da Souramont che Südtitol é na provinzia autonoma, na particolarité tla region y tl stat talian. La mendranza ladina tla provinzia da Balsan é ence ela na particolarité y enfinamai na particolarité tla particolarité de Südtirol y perchel doi iadesc fortuneda. Ence sce al ne n‘á nia adorè la parola „sacralité“, ál empò dè da entene che chesta particolarité (sacra) ne pò nia vegnì slarieda ai ladins fora de Südtirol. La particolarité tla particolarité reverda demé i ladins da Bulsan. Saurì da capì l‘imprescion ch‘al ti á dè ai autri ladins: de scluta totala. Mussner á sclut ju ti dijan dilan a Marcantoni che á coordiné l laour dla enrescida.

Dut de d'auter spirit l president dla Jonta de Trent, Lorenzo Dellai. Sia pruma aodanza é chela che les Dolomites ruve sot a la sconanza dla Unesco y nia demé les montes, ma ence l ambient y souradut les mendranzes te chest teritore. L stude dles trei publicazions é dassen interessant y al va soura la retorica fora, al é propi n servisc “che ci dà una lettura aggiornata della nostra realtà“. L stude desmostra che n zicle se à sclut  y che la realté da encuei adora scines (binars) nueves, dantaldut zenza stanges de confin. La intercomunicaziun, l trafich y les legislazions mess ester encuei daverc. Dellai á toché en particolar cater ponc:


a) l lingaz, chest é la oma de vigni sort de politica, la basa de vigni esprescion; le lingaz dla oma é l strument linguistich fondamental: al auda te scola, tla informazion y tla aministrazion. Sambegn vuelel ence ester d'autri lingac, ma chel dla oma é prioritar;
b) la cultura, che ne pò nia demé ester folclor, ma pensier, leteratura, costum de vita y espresciun dla mendranza.
c) l teritore, l ambient: chisc raprejenteia la dreta fustia ladina, la prejenza di ladins. Tegní cont y svilupé chisc fatours po volei dí crié n laboratore per poscibeltés economiches nueves  y ativités de vigni sort;
d) les istituzions che á l dovei de organisé dut cant cie che reverda i debujegns dles mendranzes. La sensibelté dles istituzions ti confronc dles mendranzes é de gran emportanza. A eles ti tóchel conscidré i liams anter les mendranzes. Encuei, tres la lege 482/99,  végnel a la lum la poscibelté de n liam nuef y plu sterch anter duc i ladins dles Dolomites.

Al é l moment dla „condivijion“ con i autri ladins, de ti judé a valch moda. La lege 482 permet de crié projec interregionai che ae n vantaje per duc i ladins dl raion. Ala se trata de mete sun meisa n valgugn problems che reverda dutes les provinzies che tol ite na pert dla mendranza ladina. An dess pié via con la discuscion. Al vuel ester n organism coordinadour che raprejenteie n pue dutes les valedes. I on bele dant man na raprejentanza unitara, la Generela che podessa  avei chesta funzion. Dantfora vuelel ester n dessegn comun  y i resultac dla enrescida nes dà propi i impulsc te chest vers. Samben vuelel ester strumenc nuefs, ma souradut vuelel ester n spirit nuef, de union y de condivjion, la volenté de laoré deberieda.


Al à spo tout la parola Oscar De Bona, assessour tla Region Venet. Les trei enrescides mostra su desfarenzies enfinamai anter i ladins de Belun. Chesta é la realté. Ma aladò dl stude de Bernardi veiden empò che al vegn fat cotant ence  tla provinzia de Belun: truepes les ativités de fomazion, trasmiscions per radio lascian enscí audì l lingaz ladin che vegn ence adoré ti teatri, te vigni sort de manifestazions. En curt: sce tl raion Trentin/Südtirol él 35.000 ladins, en él almanco tanc ence tla provinzia de Belun. Nos ne son nia chilò per damané scioldi y nience per damané de mete adum realtés desvalives, ma por nes confronté y prové de fé deberieda projec prevedus da la lege 482/99. Chesta enrescida é la pruma prova de n projet realisé deberieda, l prum tentatif de colaurazion y chesta colaurazion dess jì inant. Enfin a sen é les competenzes  per les ativités interregionales tles mans dla Region Veneto, ma i fajaron dles dutes per les fé passé a la provinzia. Emportant él realisé d'autri projec desche prevedú da la lege y chesta lege defen dutes les mendranzes y nia demé n valgunes. L proscim projet deberieda podessa revardé la defendura de nostes montes.


Da ultim à tout la parola Luis Durnwalder, ajache al é ruvé adalerch plu tert. Scì a la colaborazion anter les provinzies. Al é n grumon de problems scers che toca n puech duc. I podon ence rejoné de mete su n program interladin. Deguna indicazion sun co realisé chest program. Dlonch y a vigni livel legislatif végnel dit che les mendranzes auda da vegnì sconades. Ma al mess se traté de mendranzes autentiches. Enfinamai i nonesc é na mendranza? Perchel che na mendranza posse vive y se svilupé, vuelel ester na lignora de iniziatives y de mesures de lege: Na outa vuelel ester na economia segura che ti garantesce a la jent de resté sun l post y de avei sie laour. An dess protejé les viles ("die Weiler") y souradut ti garantì contribuc a la agricultura, che da soula ne permet nia plu de podei souravive. Primum vivere y spo les belezes naturales. Gran emportanza à la cultura, la scola, che mess ester voluda da la mendranza. Samben méssel vegnì garantì ocajions per coltivé l lingaz: te scola, tles aministrazions, tla Université. Al vuel spo ester n istitut aposta per la cultura. Chesta dess ence vegnì svilupeda da les unions, dai mass-media. I cinch menuc de televijion é propi ridicui. Spo la politica che garantesce la raprejentanza dla mendranza. Dlonch ti organs che à da fé con la mendranza vuelel ester sie raprejentant, ence tla Jonta. En curt: Durnwalder à conté su cie che al suzed a Bulsan. Deguna parola persoura la Generela y l organism interregional. (jp)
   

 

Ladin Standard

 Convegn a Selva: i comuns ladins pensa a sie davegnì

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Convegn a Selva: i comuns ladins pensa a sie davegnì - II pert (ponc: 1)
da giatfosch ai 13 September 2005 da les 13:10:43
(Infos sun l utilisadour | Ti mané n messaje privat)
Mussner tl Mittagsmagazin.
Al foss begn gran ora che ince zacai dla SVP dla Val Badia ess chel minim coraji zivil da dì val.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.470 seconc