Enconteda per mete endò en pe na lista ladina a Bulsan
per les lites de comun ai 6 de november 2005
En doman da les 18.00 saràl la pruma cherdeda di candidac ladins pro les lites de comun da Bulsan, che vegnirà tegnudes ai 6 de november. Persones nueves che à vedù ite l bujegn de dé na man a salvé cie che al é ciamò meso de podei salvé a livel de lista “Ladins”, che é nasciuda a Bulsan y che à madurì tant de scomenciadives y de propostes per l mond politich ladin. Les ultimes lites comunales a Bulsan é stedes feter per duc i partis na sort de faliment, ma souradut per i ladins.
La Ciasa de comun a Bulsan.
L tandem con la Margherita ne n’à nia funzioné, ma nience chel con la SVP y con i DS. I ladins pò demé speré de arjonje valch sce ai tegn adum. Perchel él gran ora de rejoné de “Sammelpartei”, n partit soul che tole ite dutes les ares dla popolazion ladina de Bulsan. Almanco doi candidac pro les lites da denant é sen a una de se mete adum per arjonje n post te comun. Al é grandiscima ora de fé deberieda n descurs te chest vers. I ladins da Bulsan auda endò da vegnì l strument propulsif dla politica ladina. La cossa à suzes sce an laora deberieda, sce duc à coscienza di problems. Ti sourandé l compit a na persona soula é massa sfadious y an ne pò nia ruvé ai resultac che an spera. Cotant miec spartì su i doviers a na moda che feter duc vegne a contat con i problems. Un de chisc é chel dla Ciasa alberch per studenc y laoranc ladins. Sen ésen tant inant che an ne n’é propi nia plu segurs che la Ciasa ti reste ai ladins y en discuscion ence sia aministrazion da pert di ladins. L dr. Debertol nes darà les informazions. Sciche al pér vegnonse tratés piec di extracomunitars. Al é ora de nes fé audì y de scrive. N auter problem é chel dl proporz che reverda i posc´ per i ladins. De chest y d’auter vegniràl rejoné pro la senteda, ma souradut dla volonté d’ester endò ladins, de tò te nostes mans nost destin. La senteda é cherdeda ite dai Agacins y vegnirà tegnuda tl alberch “Pra meisa” tla Streitergasse al n. 21. N vent nuef, che vuel jì endò ai temps di agn 1978-’80, canche al fova n gran interes per la cossa ladina con conferenzes. (jp)
