benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ladin standard metù te 'ciazuela'
scrit ai 29 January 2003 da les 08:12:37 da noeles

Ladin Standard

 

La dezijion de scluje fora l standard é perdret bele tomeda de setember dl 2002 tl Consei d'Istitut con a cef Hugo Valentin

La delibera dla jonta provinziala de Bulsan en cont dl'adoranza dl ladin ne fej nia marevueia, sce an conesc la situazion politica, ma marevueia fej l'impostazion dl Consei dl Istitut Ladin. L president dl proiet Spell Valentini Erwin: "Al é veira che i ne son nia vegnù informé de dezijions toutes tla senteda ai 17 de setember y de sies conseguenzes per l LS. De de tel dezijions, che ie ne conesce nia, n'él vegnù rejoné no al Colloquium Retoromanistich a la fin de setember a San Martin, no al Covegn Soziolinguistich de dezember a Urtijei, no te d'autres discuscions anter i enc responsabli de SPELL. Ma sen capesci miec les ghiranzes dl Istitut per cie che reverda l davegnì de SPELL". Per capì miec cie che al é sozedù reportonse ciamò n iade l protocol dla enconteda danter les majeres istituzions ladines y i politics ai 20 de messel 2002 a Urtijei.



Erwin Valentini: "Tla enconteda anter SPELL y i raprejentanc dles istituzions politiches y culturales ladines ai 20 de messel a Urtijei ova l assessour Mussner encundé chesta intenzion y enlaouta se ova ence l diretour dl istitut "Micurà de Rü" declaré decontra".

Sun envit dl projet SPELL s’à abiné ai 20 de messel a Urtijei i raprejentanc dles istituzions politiches y culturales che sostegn l projet de elaborazion dl ladin standard: dr. Florian Mussner, assessour per i laours publics, scola y cultura ladina, cav. Gino Fontana, assessour per i raporc con les mendranzes linguistiches, dr. Carlo Willeit, vizepresident dl Consei Regional y dl Consei Provinzial de BZ, signoura Ilda Pizzinini, presidenta dla Union Generela di Ladins, dr. Luigi Brunel y dr. Fabio Chiocchetti, president y diretour dl Istitut cultural ladin « majon di fascegn », dr. Hugo Valentin y dr. Leander Moroder, president y diretour dl Istitut cultural « Micurà de Rü », dr. Franz Vittur y dr. Theodor Rifesser, president y diretour dl Istitut Pedagogich Ladin. Ie enstes, sciche diretour dl projet SPELL-TermLes, é abù l’onour de prejenté i resultac di laours y de porté dant n valgunes propostes per l davegnì dl ladin dolomitan o ladin standard (LS).
L resultat plu positif é steda zenz’auter la enconteda enstessa: do agn de critiches y de polemiches plu o manco ideologiches él sté finalmenter meso de se abiné duc adum entourn a na meisa per rejoné concretamenter dla natura, dles finalités y dles potenzialités dl LS. La Cësa di Ladins ti à pité ai partezipanc n forum neutral per porté dant sies idees y per audì les minunghes y i interesc di autri. Na novité nia picera te nost pice mond dominé da mile contrasc’ y ciampanii!
L obietif y tema prinzipal dla enconteda, che à duré zirca cater ores, fova chel de studié la poscibelté de adoré l ladin scrit unifiché ti contesc’ desvalifs dla sozieté ladina. Pian via da la domanda: l prototip de ladin standard é sen operatif, cie fajonse pa empera?, s’à la discuscion atira slargé fora al ciamp plu ampl dla politica linguistica ladina. L messaje che é vegnù fora é cler: duc é a una che l projet vae inant. Ma al n’é nia da se fé de marevueia sce an à ence audì nuances y priorités desvalives per cie che reverda la posizion dl ladin standard tles strategies di istituc culturai y di assessorac a la cultura ladina dles provinzies de Trent y Bulsan.
Ie é abù l’onour, sciche dit, de daurì la discuscion y de prejenté la vijion de n "insider" de SPELL. Nos duc savon che la realté ladina é foradevia complicheda y perchel vàl debujegn de na strategia linguistica unitara per la Ladinia. La situazion de encuei n’é de chest vers nia ideala: la cooperazion interladina é debla y ala se archita gonot sun i confins provinziai. Per truepes organisazions à la colaborazion anter les valedes demé na emportanza secondara en confront a les ativités locales, cheles destinedes a "sia" valeda, a "sia" rejoneda, a "sia" provinzia. Ma empò él n pont frem con chel che vignun mess fé i conc: "I ladins se determineia sciche grup etnich idependent tres, y demé tres si lingaz y la cultura lieda a si lingaz " scriv O. Gsell tla Introduzion a la Gramatica dl Ladin Standard. Da chesta costatazion sautel fora almanco does ghiranzes fondamentales:

(a) la promozion dla cultura ladina ghira na strategia interladina y na cooperazion strenta anter les valedes y sies istituzions;

(b) la (re)vitalisazion y modernisazion dl lingaz é na conditio sine qua non per l souravire dl ladin tla sozieté moderna.

Na colaborazion interregionala per cie che reverda les azions strategiches y les infrastrutures (lingaz, scola, musei, etc.) é essenziala nia demé per rejons de economia (sinergia dles forzes inteletuales y economiches a desposizion di 30.000 ladins), ma dantaldut per rosedé la tendenza zentrifugala y porté ite te nostes valades n element atif de integrazion, de "convergenza identitaria". Sce i ne fòssen nia bogn de rosedé chesta tendenza ne sarà nosc sforc per nia. L lingaz standard (Schriftsprache) pò ester n antidot concret contra la parzelisazion y desintegrazion di ladins y n model de referiment segur tl prozes de revitalisazions di idioms dles Dolomites.
Ma la politica é, sciche an sà, l’ert dl poscibel, y ala mess tegnì cont de bujegns y interesc sozioculturai gonot contraditores. Dit te does paroles: Trent à en general na posizion plu daverta a l’adoranza dl standard tla aministrazion provinziala y regionala che Bulsan. L assessour Fontana, che à dagnora sostegnù publicamenter l projet SPELL, à auzé fora anter l auter che l’adozion dl standard sciche lingaz scrit comun di ladins daidassa sclarì ence la posizion di "neoladins" de Trent y de Belun. Per el, sciche per me, fej pert de na comunité etnica-linguistica chi che se reconesc tl medem lingaz; l’adozion dl ladin standard pitassa a duc na bona ocajion per desmostré con i fac sia ladinité. Na chestion nia irilevanta tla discuscion politico-culturala da una y da l’autra pert di confins storics dla Ladinia!
La situazion ciala fora cotant autramenter te Sudtirol: chilò ne vionse nia demé en contat con does cultures "forestes" ma i rejonon y i scrivon ence doi idioms ladins desvalifs, l gherdeina y l badiot-mareo (o badiot de mesaval). L assessour Mussner é ju ite en particolar tl bujegn de normé con n at formal (na delibera dla jonta provinziala) l’adoranza dl ladin ti documenc y tles informazions de enteres diret pert per la popolazion ladina, desche les normes d’atuazion dl Statut se al ghira. Sia proposta é chela de reconesce y adoré "a rotazion" l gherdeina y l badiot sciche variantes ofiziales dl lingaz ladin (aldò de na esperienza bela fata - y arbandoneda - ti Grijions), convalidan enscì "de jure" cie che esist bele "de facto" tla provinzia de Bulsan. La proposta à fat levé su nia pueces reazions: al é vegnù sotrissé che na tel delibera lasciassa fora i autri idioms y che ala ti tolessa l flé al sforz de (re)unificazion linguistica dla Ladinia. Te sie intervent à l dr. Moroder racomané de lascé ester la delibera per l moment o almanco te ti pité a les asoziazions culturales la poscibelté de fé propostes de miorament a na moda che la delibera ne ti sere nia dl dut la porta a l’adoranza de na koiné interladina. Na tel "paussa" podessa dapò vegnì nuzeda da una na pert per testé sistematicamenter l prototip atual de LS y da l’autra, desche al à sotrissé l dr. Chiocchetti, per svilupé inant la dialetica anter varieté (y richeza) di idioms y unité dl lingaz ladin. L assessour Mussner à mantegnì sia entenzion de dé fora chesta delibera ma al à empò empermetù che al tolarà en conscidrazion propostes de miorament de chest vers. Nia de revoluzionar, donca, ma empò n segnal de dialogh!
Domandes y osservazions él vegnù fat da plu pertes sun les modalités y i ciamps d’adoranza eventuai dl LS. Les inovazions linguistiches, p.ej. cheles ortografiches, à dagnora enconté desfidenza y perchel ne pòn nia s’aspeté che l LS vegne tout su atira con gran entusiasm da la jent. L ex intendent dr. Vittur à sotligné l bujegn de renforzé la cultura linguistica sciche condizion preliminara y nezesciara per l’azetanza dla koiné ladina. Perchel él da mete a jì azions de sensibilisazion nuzan duc i mesi dl marketing politich-cultural (parola che ne ti à nia plajù a chi dl’economia) a desposizion aldidancuei. L’iniziativa y l sforz maiour dess vegnì dantaldut dai istituc culturai che à la capazité de auzé l prestije dl LS a duc i liviei dla sozieté. Al é cler che l standard ne pò nia vegnì scrit dant con la forza y dut te un n iade; l’adozion messarà ester progressiva, metan man dai setours olache an pò se aspeté manco resistenza, sciche lege y aministrazion, scienza y tecnologia, economia moderna. Da una na pert à chisc ciamps n prestije aut, ajache ai vegn identifichés con l podei (politica), l savei (scienza y tecnologia) y l avei (economia). Da l’autra pert n’à l lingaz aministratif y tecnich nia chela ciaria emozionala sciche l lingaz da vigni dì y perchel végnel ence azeté plu saurì da la jent. L vizepresident Willeit à porté dant plu avisa l cheder giuridich a livel provinzial y regional te chel che l "dert de parola" di ladins pò y dess giaté atuazion. Al é ence vegnù tout en conscidrazion l ensegnament eventual dl standard te scola, tema che fina sen é resté n tabù.
La enconteda se é scluta ju con l’entenzion di partezipanc de se abiné danuef do les vacanzes da d’isté. Per evité che chest prum vare ne reste nia na bela declarazion d’entenzions él vegnù fat fora de mete su trei grups de reflescion, con l’enciaria de enjigné ca idees y propostes plu menudes en cont de adoranza dl LS. I raprejentanc dla politica studiarà plu avisa les condizions y implicazions giuridiches a livel provinzial y regional, i istituc de cultura les azions de sensibilisazion linguistica nezesciares y i esperc de scola l ensegnament eventual dl standard te scola y a l'université. Sce dut chest essa da garaté fòssel no demé n gran vare inant per l ladin standard ma ence n segnal de na maioura volonté de colaborazion anter persones, enc y istituzions da vigni pert dla Ladinia. L rendez-vous é per la fin de setember. A se audì! E. Valentini.

Degugn ne s'à plu lascé audì, degun grup de reflescion ne n'à plu laorè y degugn ne n'à dit plu nia tla chestion, la dezijion dla jonta provinziala é perdret bele tomeda tl gremo dl Istitut ai 17 de setember 2002, dant l gran Colloquium Romanistich y dant l Convegn Soziolinguistich a Urtijei.


 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 5
Oujes: 10


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Ladin standard metù te (ponc: 1)
da giatfosch ai 29 January 2003 da les 08:34:01
(Infos sun l utilisadour | Ti mané n messaje privat)
chilò mancia l minim de fairplay,
nia ma vigni curaji zivil.
le l.s. é na condiziun pur che l ladin suravires. y ci fej Valentin y Mussner?






Re: Ladin standard metù te (ponc: 1)
da Dolasila ai 29 January 2003 da les 08:53:40
(Infos sun l utilisadour | Ti mané n messaje privat)
l Istitut Ladin à l'inom dal prum ideatur de n lingaz unitar.
Purchel dess l cunsei y l president avei tan de dignité y tan de cherianza da dè les dimisciuns.




Re: Ladin standard metù te 'ciazuela' (ponc: 1)
da Janpire ai 29 January 2003 da les 15:50:49
(Infos sun l utilisadour | Ti mané n messaje privat)
Per capì ciamò miec duta la chestion, la composizion dl Consei dl Istitut:

Hugo Valentin - rapresentant dla jonta provinziala

Christian Moroder (Urtijei) y Florian Mussner (Selva) - rapresentanc dles unions culturales de Gherdeina

Lois Trebo (Badia) y Edith Ploner (La Val) - rapresentanc dles unions culturales dla Val Badia

Bruno Senoner (ombolt de S. Crestina)

Albert Palfrader (ombolt de Mareo)

Roland Verra (Intendent)

Theodor Rifesser (rapresentant dl IPL)

Leander Moroder (diretour dl Istitut), ma zenza dert de ousc



Re: Ladin standard metù te 'ciazuela' (ponc: 1)
da Dolasila ai 29 January 2003 da les 17:03:07
(Infos sun l utilisadour | Ti mané n messaje privat)
te ci lia culturala é pa Mussner ?



!!!WOW!!!50236 (ponc: 1)
da mmnum39973 ai 22 March 2008 da les 20:19:58
(Infos sun l utilisadour | Ti mané n messaje privat)
Hey. I'm from Zimbabve


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.388 seconc