benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Cesa di Ladins: la streda mess ciamò vegní splaneda
scrit ai 25 August 2005 da les 19:34:37 da noeles

Cultura

 

La volonté é dant man, ma nia i scioldi

L president dla Union di Ladins de Gherdeina à enconté i trei ombolc dla valeda 

Egon Vinatzer y i trei ombolc de Gherdeina, Ewald Moroder, Egon Vinatzer y i trei ombolc de Gherdeina, Ewald Moroder,Coche empermetù dal ombolt de Urtijei,Ewald Moroder, él vegnù metù a jì sun sia proposta na enconteda anter l president dla Union di Ladins de Gherdeina (ULG) y i trei ombolc dla valeda, Ewald Moroder, Bruno Senoner y Roland Demetz, per rejoné sun la chestion dla Cësa di Ladins che someia de ne avei deguna fin.

Da man ciancia: Egon Vinatzer y i trei ombolc de Gherdeina, Ewald Moroder, Roland Demetz y Bruno Senoner.



Les speranzes descededes dal assessour provinzial Florian Mussner de abiné na soluzion de finanziament per la restruturazion dla Cesa ne fova nia piceres, l'enconteda con i trei ombolc à endò sciautrì ju y fermé l entusiasm. La volonté é dant man, ma i scioldi nia.

Ence sce i trei prums zitadins dla valeda à desmostré gran interes y volonté de abiné deberieda na streda per daidé a corì les  speises de restruturazion dla Cësa di Ladins, él empò ciamò sauté fora de gran problems pratics.

"Al ne é nia da desmentié o da sotvaluté la emportanza dla Cësa di Ladins. Na fabrica che con sie Museum unich te sie stil y contegnù, testemonieia la cultura, la storia y les raijes dla popolazion de Gherdeina, sen él gran debujegn de plu lerch. Ence la redazion dla USC mess laoré te na strentura con condizions de lerch scialdi scletes, nia miec ti vala al teater de Urtijei, a la Union di Ladins de Gherdeina enstessa y tamben a la biblioteca ladina. La Cësa é oramai plena y sclopa, sce al ne é nia defata plu lerch. Ie spere che les aministrazions dla Provinzia y di Comuns de Gherdeina sae da sciazé la emportanza y la richeza de nosta prejenza y ativité. Porté inant nost laour cultural per l ben dl patrimone ladin, sarà demé plu poscibel sce la Cësa vegn restrutureda. Gherdeina pò ester capazia dla Cësa di Ladins, na picera fabrica che simboliseia lonc y lerch i ladins dles Dolomites con sia tradizion y identité," dij Egon Vinatzer, president dla ULG.

Egon tegn l projet tles mansEwald Moroder, ombolt de Urtijei é a una con la emportanza dl Museum y dles assoziazions desferentes con les ativités che vegn portedes inant tla Cësa. "I cialaron zenzauter de abiné duc deberieda na soluzion da fondament y dreta per la cossa, l assessour Florian Mussner nes à bele te deplù ocajions empermetù de daidé inant. Ence la jonta y la comiscion de fabriché à dé pro la conzescion de mascima per l projet, chest desmostra nosta volonté de daidé, la Cësa se la merita", chestes  é stedes les paroles da pert dl ombolt Moroder.

L prum zitadin de S. Cristina Bruno Senoner à dit bele dant fora che l mender comun dla valeda ne podarà nia sostegnì finanziamenter l projet, nia sclut fora ne saràl valch pice contribut  straordinar per daidé empera. "An messarà cialé de abiné ence da autres pertes valch finanziament. Miec jìssela sce la pert nueva dla fabrica vegnissa sourantouta da la provinzia a la condizion che la gestion  y i derc dla Cësa reste empò inant a la Union", é dl auter vers la minonga dl ombolt de S.Cristina.

L ombolt Roland Demetz é fermamenter dl'idea de renforzé la proposta dla Union de laoré inant sun l projet y de abiné na soluzion olache la Cësa reste duta canta, l toch nuef empera,  de proprieté dla ULG. "I cialaron al plu prest de nes enconté, doi o trei ombolc con l assessour provinzial Florian Mussner y do da chel  ence con l president dla provinzia Luis Durnwalder. I messon chirí deberieda na soluzion ideala per finanzié la Cësa. Al é bele na storia che va da massa giut inant y al é ence tost ora de ruvé a na conclujion", enscì l ombolt de Sëlva Roland Demetz.

Do does ores ésen empò ciamò ruvés a la conclujion che trei o cater milions de euro ne é nia na soma proibitiva per contribuì a na realisazion de na restruturazion de na ciasa che anter é dagnora vegnuda mantegnuda y adoreda ben, ma dantaldut se tràtel de na fabrica che a sia maniera simboliseia la ladinité tles Dolomites.

La Cësa vegnirà fata. N iade cialaràn de abiné n plan de finanziament zenza messei se temei de dé via la puscion, ma al ne sarà nia saurì. Chesta é la minonga conclusiva de dutes les autorités prejentes a la senteda entourn la meisa ovala tl ofize dl ombolt de Urtijei.

"I messon abiné i finanziamenc zenza l festide y la tema de messei dé su la puscion dla Cësa, chest ti sonse debit ai fondadours che à si temp à fat gran sacrifizes donan ence scioldi privac, l dut per vedei empé la senta dla Union. Tant de respet per nosta jent che à laoré con tant de idealism, messonse avei", à ciamò n iade sotlinié Egon Vinatzer. 

Al ne sarà zenzauter nia saurì da abiné i finanziamenc per corì les speises, ma olache al é la volonté, ilò él dagnora ence la soluzion. I ne podaron dessegur nia scomencé i laours enfin che dutes les speises nes é asseguredes. La Union di Ladins de Gherdeina é na lia culturala y ne à degugn scioldi per de tel projec. Nos messon y podon demé se lascé sun la coscienza y la volonté de nosc politics che nes pò daidé inant dassen. Samben chiriaronse valch mender finanziament ence da autres pertes, al nes é bele vegnù pité de pici aiuc da privac y da sozietés desferentes che veid nosta ativité de bon uedl. Ma la speranza y la segureza é demé deda sce la Provinzia y i Comuns dla valeda é do su con convinzion. I ombolc de Gherdeina à desmostré entant la senteda de avei sensibelté y vueia de daidé, speron che les paroles se tramude te fac y porte a na realisazion de n projet che é sté agn a la longia gauja de truepes discuscions. I aron dessegur ciamò  truep da fé", miena Egon Vinatzer president dla ULG.

Foto: Egon Vinatzer, president dla ULG, con l model dla Cesa tles mans.

Ladin Standard

 Cesa di Ladins a Urtijei: 1 n milion de euro é assegurés
 50 agn Cesa di Ladins: restruturazion
 50 agn Cesa di Ladins a Urtijei - valch fora dla storia
 50 agn Cesa di Ladins a Urtijei: restruturazion
 L projet de engrandiment dla Cesa di Ladins
 Derturazion dla Cesa di Ladins a Urtijei
 Cësa di Ladins: L assessour Mussner tol posizion

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 4
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.356 seconc