Encuei (27.01.2003) é tomeda fora la delibera persoura l'adoranza dl lingaz ofizial ladin te Sudtirol sciche an savova perauter bele, en curt: al ne vegn nia nominé l ladin standard, ma per cie che reverda la Val Badia, ladin dla Val Badia, per cie che reverda Gherdeina, l gherdeina, per cie che reverda trames les valedes déssel vegnì baraté ju n iade gherdeina y n iade ladin dla Val Badia. Chesta dezijion fova bele tl'aria de jugn fora, ma nia ciamò metuda ju te na delibera ofiziala dla jonta provinziala de Bulsan. Encuei sàn sciche ala ciala fora. Sen romàgnel demé plu la speranza che Fascia vae dantfora con l'ejempl. Nia ciamò regoleda ne é l'aplicazion a livel regional. Sun l retrat: la fontana de Laurin dant l palaz dla jonta a Bulsan.

La delibera à giaté la "benediscion" con n arat aprové da l'unanimité dl Consei dl Istitut Ladin Micurà de Rü, bele ai 17 de setember 2002, puech dant la prejentazion dl dizionar standard definitif. L president Durnwalder à rejoné de na norma transitoria enchin che l projet SPELL à sclut ju si laours tla "Kunstsprache" sciche al vegn dit, ma an sà che i strumenc é bele dantman y che l projet à sclut ju si laours ai 31 de dezember 2002, praticamenter ne esisteiel nia plu. L Istitut, enscì l ultim president dl Spell Erwin Valentini, vuel do l mote sburlé dut "a les calendes greches", plu dalonc che al é meso. Do 15 agn de laour de preparazion fossa l ladin standard zenzauter madur per l'aplicazion concreta de gre en gre te leges, te formulars, per l material dles lites, ence sperimentalmenter empruma. I on bele valgugn ejempli: danter auter fòvel vegnù publiché l statut de autonomia te ladin standard. Entratant  él sozedù zacotant de varesc emportanc: al é vegnù dé fora la gramatica dl Ladin Standard y l dizionar dl Ladin Standard te edizions definitives. Ma sciche al é vegnù recordé al radio Ladin: a nia ne à  jové chisc gragn progresc. L Ladin Standard resta a livel inofizial. La politica te Sudtirol ti à out l spinel. Megra la consciderazion che la scienza po laoré inant empera, enscì les paroles dla jonta. Al vegnirà  adoré dai "fis dles nioles" (i idealisc'), davia che en pratica reconéscen demé l lingaz dla politica. Chesta delibera se encadreia ite tla volenté dla SVP de Gherdeina che ti l'à ciamò n iade sticheda. A nia ne vel tré ca la vertola che chest valova bele per l ejam de trilinguism y an messova fé aldò. Deliberes pòn zenzauter ence mudé ju o ales pò vegnì  integredes, ma denant messarà  bonamenter i litadours baraté fora les persones tla politica ladina. N gran laour per l ladin standard, fat con truepiscim idealism per oramai 15 agn alalongia, é vegnù pesté sot con gran indeferenza/unfataria politica. L assessorat a la cultura ladina a Bulsan desmostra enscì sia imposcibelté de ester autonom y che al depen dal partí de maioranza, emprumadedut dai amisc de Gherdeina. Chilò veiden ence duta la comedia de volei daidé chi da souramont dijan de volei ti lascé lerch pro la televijiion ladina. An é ruvés tant inant che an ne reconesc nience plu sie idiom sciche ladin, ma souradut giata n sclaf la volonté de comunicazion interladina. A chesta moda ne deiden nia mantegnì l ladin da souramont y nosc liams con ei, al contrar àn spidiceia su ence te Sudtirol l lingaz de na mendranza bele dassen debla. La speranza de avei n assessour a la cultura ladina é tomeda con chesta dezijion completamenter te ega.