benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ladin standard: odù con simpatia tla Val Badia, manco te Gherdeina
scrit ai 26 January 2003 da les 11:48:11 da noeles

Ladin Standard

 

I liams anter coscienza linguistica y simpaties politiches te Sudtirol

L’enrescida de noeles net «Cie nen dijeise pa dl Ladin Dolomitan/Standard?» paridleda con la enrescida profescionala de Gabriele Iannàccaro y Vittorio dell'Aquila 

Valutazion de Erwin Valentini 

La enrescida metuda a jì da noeles.net va inant ma la destribuzion dles respostes s’à oramai stabilisé, y perchel pòn tré bele sen n valgunes conclujions. Les 205 oujes dedes ju fina ai 24 de jené se despartesc su enscì: l 77,07% pensa che l ladin standard dess vegnì nuzé deplù, l 5,37 % é per adoré l standard ma volessa avei plu paroles ladines; l 1,95% é per l standard ma volessa adoré l vocabolar di idioms (chesta domanda creia perdret confujion ciuldì che «standard tl scrive, ma vocabolar di idioms» é n puech na contradictio in terminis); enultima, al 15,95% ne ti plej l standard nia. La resposta dl’enrescida per clera: l 84,39% é per, l 15,61% é contra l ladin scrit unitar. Ma éla pa enscì?



I resultac de vigni enrescida à bujëgn de vegnì interpretés tegnan cont de vigni sort de parametri: obietifs y metodologia dla enrescida, composizion dl «campion», numer dles respostes, y e.i. L’enrescida de noeles.net à na carateristica n puech particolara, no tant per la comunicazion online o per l contegnù dl chestionar, ma per la identité di respondenc. Chi à pa dé ju la ousc y chi o cie raprejéntei pa? Al é cler che sce i 205 respondenc ne fossa nia raprejentatifs dla popolazion spo ne fossa nience les respostes raprejentatives de cie che la jent pensa en cont dl ladin standard.

Na maniera de ejaminé chi che pò avei dé ju la ousc é de analisé chi che «navigheia» sun l sit noeles.net. Sce an liej i articui, comentars y postings, che é per l plu anonims, veiden che la maioura pert di autours é badioc y politicamenter vejins a la Lista Ladins. I gherdeines - per ne dì nia i ladins dles autres valedes - é valagamia sotraprejentés, y sotraprejenteda é ince la «concorenza politica» dla Lista, la SVP «ladina», che tles does valedes abina adum plu oujes che la Lista Ladins (chilò lasci sun na pert i autri partic che ne à nia na gran audience ti paisc ladins) . Nos savon che la oposizion al standard plu forta vegn da una na pert da la SVP «ladina» y da l’ autra dai gherdeines (samben nia duc i «Ladins» é per l standard y nia duta la SVP «ladina» é contra l ladin dolomitan); trames les catetgories é sotraprejentedes anter i clienc de noeles.net y donca ence anter i 205 respondenc dla enrescida. Les simpaties politiches di nuzadours y ghesc’ de noeles.net vegn perauter confermedes da l’autra enrescida oline «Politica: chi defen pa miec i interesc di ladins do vosta minonga?», olà che l 70,18% respon lista Ladins, l 21,93% SVP «ladina», l 1,75 Verc y  l 6,14 «degugn».

Na pruma conclujion che an pò tré é che i dac é sfalzés dl vers de chi che sostegn l ladin scrit unitar. Ma l’enrescida é empò interessanta ajache ala mostra cie liams che al é anter coscienza linguistica y simpaties politiches te Sudtirol. Te chest contest pàiel la mueia de confronté i resultac de noeles.net con chi de na enrescida profescionala fata dant da puech te dutes les valedes ladines dai doi sozilinguisc’ Gabriele Iannàccaro y Vittorio dell’Aquila (i resultac vegnirà publichés tost te «Mondo ladino»; i ti dije dilan ai autours de m’avei mostré i dac). Chilò toli en conscidrazion demé i resultac per la Val Badia y Gherdeina da olà che al vegn la maioura pert dles respostes de noeles.net.

Tl chestionar dla enrescida Iannàccaro-Dell’Aquila végnel fat anter l auter chestes domandes en cont de ladin standard, y con chisc resultac:

(a) Lingaz scrit unifiché per l davegnì dl ladin: plu dl 50% di badioc (Val Badia) rata l standard «de utl» contra zirca l 22 % di gherdeines; zirca la medema perzentuala di gherdeines rata l standard «de dann» per l davegnì dl ladin.

(b) Lingaz scrit unifiché per i idioms: é «n arichiment» per plu dl 50% di badioc contra zirca l 25% di gherdeines; zirca l 31% di gherdeines rata l standard finamai «n pericul» per i idioms.

(c) Cie lingaz unifiché: ladin standard, un di idioms o degun? : zirca l 35% di badioc é per adoré l standard contra zirca l 13% di gherdeines ; feter l 50% de chisc ultims é contra vigni sort de lingaz ladin unifiché.

An pò enjonté che i comuns plu contrars al standard é Urtijei te Gherdeina y Mareo tla Val Badia ; olà che l ladin standard enconta plu simpatia é a Badia tla Val Badia y a Selva te Gherdeina.

Dal confront anter les does enrescides sautel fora les medemes tendenzes. La simpatia per l ladin dolomitan/standard é en gran pert proporzionala a les simpaties politiches dla popolazion, y plu avisa al consens che la SVP y la lista Ladins abina adum te Badia y Gherdeina. La chestion dl standard, y plu en general la coscienza linguistica tla provinzia de BZ per plu n fat politich che soziolinguistich. Plu dessegur él la identificazion politica che determineia la azetanza o no dl ladin standard y no l contrar; ma l condizionament politich per n puech manco sterch y automatich tla Val Badia che te Gherdeina.


 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 4.85
Oujes: 7


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Ladin standard: odù con simpatia tla Val Badia, manco te Gherdeina (ponc: 1)
da EValentini ai 26 January 2003 da les 12:52:15
(Infos sun l utilisadour | Ti mané n messaje privat)
Per slargé fora l cheder pòn mete permez che l gre de simpatia per l ladin standard é te Fascia zirca umfat sciche tla Val Badia. Ie ne savesse nia sce al é na relazion de gauja-efet, ma la prescion politica de partic "foresc'" è encuei debla y al pò ester che chest clima ae daidé pro al dinamism cultural de Fascia.



Re: Ladin standard: odù con simpatia tla Val Badia, manco te Gherdeina (ponc: 1)
da giatfosch ai 26 January 2003 da les 14:40:48
(Infos sun l utilisadour | Ti mané n messaje privat)
sci, mo n'á nia la consultaziun a St. Ulrich costé deplü co ci ch'ai n'ess dè ca pur l Spell?
tla domanda fôl scrit che l ladin dolomitan ess remplazé la gherdeina ... ô dí informaziun falza, bugia.
al fô na domanda tipicamenter "obietiva" aladô dla SVP. Manipolaziun assoluta.

America Latina? No, chemun de St...



Ciuldì pa la desfarenzia danter Val Badia y Gherdeina? (ponc: 1)
da Jandaniel ai 26 January 2003 da les 14:26:11
(Infos sun l utilisadour | Ti mané n messaje privat)
Signour Valentini,
i nes recordon che a Urtijei él enchinamai vegnù metù a jì n referendum sun l LS da pert dl comun per ne messei nia ti conzede n pice contribut al SPELL, i nes recordon ence che ti prums agn '90 fòvel nasciù te Gherdeina tl certl dla SVP la Regula (ma tost juda in broda), i savon ence che dan da puech (auton 2002) la SVP de Gherdina à dè fora n comuniché sun la medema lingia .... cosses che tla Val Badia él ert da se imaginé, al contra: la SVP tla Val Badia ova dit che n standard fova nezessar te na comunicazion ti prums agn '90 .... ciunes po pa ester les raijes plu sotes de chest comportament tant desvalif te Gherdeina do vosta minonga? E i gherdeines o miec na pert dlongia a la SVP, tan apascionés de sie idiom? (le portaousc, la SVP de Gherdeina ne po ester nia tan apascioneda do le mote, davia che ala dà fora si comunichès dagnora per todesch) .....
Demarevueia me feji che i Conseis dles istituzions ofiziales (p.ej. Micurà de Rü y IPL) ne tol net deguna posizion, nience defront a de tel ataches (dla SVP de Gherdeina) y ne fej net deguna promozion .... cie sozèdel pa?
L argoment tolarà n'autra direzion canche an veid fosc che ala va ence con le standard, i fosse corious sce l material per les lites (placac da tachè fora y e.i.) vegn chesta outa publichés per LS, saveise ceze?



Re: Ladin standard: odù con simpatia tla Val Badia, manco te Gherdeina (ponc: 1)
da EValentini ai 26 January 2003 da les 15:09:09
(Infos sun l utilisadour | Ti mané n messaje privat)
La enrescida Iannàccaro-Dell'Aquila podarà dé n valgunes respostes a les domandes de Jandaniel; aspeton la publicazion di resultac.
Les inovazions de politica linguistica à dagnora y dlonch fat levé su critiches y ence contrareazions violentes. Te n clima de vera de religion ne végnel nia baraté fora argomenc ma slogan, paroles y azions de vera, an defen n prinzip!
A cie moda é pa l'oposizion al ladin standard tant sterscia te Gherdeina y dantaldut a Urtijei? Bah, rie da dì, na spligazion pò vegnì chirida tla sanité dla rejoneda gherdeina che, sciche i savon, n'é nis bona a Urtijei. La defendura a vigni priesc dla "gherdenité" contra la "ladinité" dla valeda me per n segn de debleza, n fat essenzialmenter folcloristich y n fatour de marketing dl "made in Gredine".
L fat spo che la SVP "ladina" seghita a mané fora si comunicac per todesch é la desmostrazion che ala conscidra l todesch sciche "Hochsprache" di ladins de Sudtirol (i autri, chi da souramont ne conta nia). Te n tel cheder perd l ladin standard sia rejon d'ester, i idioms deventa na sort de viesta da zacan da adoré tles zerimonies sacres, profanes y mondanes per fè paruda. Per les cosses sceries, canche an rejona de afares, pàssen spo zenz'auter al lingaz standard, l Schriftdeutsch.



Re: Ladin standard: odù con simpatia tla Val Badia, manco te Gherdeina (ponc: 1)
da giatfosch ai 26 January 2003 da les 15:14:58
(Infos sun l utilisadour | Ti mané n messaje privat)
ei, la SVP conscidra l ladin n lingaz de mender valur, porchel fossel sté da l meter te velin: le baié ma te familia. aministraziun publica, scora, radio etc: la SVP n'ess orü ingnó l ladin.

La Hochsprache é Deutsch.
Mo ci Deutsch, gonot en Deutsch da fa pieté.
urei ester deutsch can che an n l'é nia é mefo na cossa che fej gni plütosc nevrotics ala fin. Y insciö vegn fa chesc partì metüs fora sciöche fanatics, estremisc, talebans (dunque terroristi nota bene) chi che n'ô nia se lascé to so lingaz.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.416 seconc