I tecnics y i polizisc' de comun mess savei da rejoné ence ladin
- La Lista LADINS de Urtijei se à damané che al vegne respeté la lege 574/88 sun la doura dl lingaz
La mozion dla lista LADINS de ghiré da la provinzia de Bulsan che ala mane tla comiscion urbanistica n tecnich che sae ence ladin é vegnuda deda pro a l'unanimité dai conseiers dl comun de Urtijei. L art. 32 dl DPR 574/88 veid dantfora che i ladins à l dert de rejoné sie lingaz ti organs colegiai ti comuns ladins.
L conseier di LADINS te comun, Georg Moroder.
"Sce la maioranza rejona ladin, él dret che ence i tecnics manés da la provinzia sae da rejoné y da entene ladin. Pensede demé cie che an dijessa te n comun todesch, sce la provinzia ti manassa n tecnich che rejona demé talian. Al ne é nia dret che la maioranza te na comiscion mess rejoné todesch o talian, ajache al é n component che ne rejona nia o ne enten nia ladin ", dij Georg Moroder dla lista LADINS.
Per stravardé l dert a l'adoranza dl ladin él ence vegnù prejenté al Consei la mozion de retré la delibera dl comun de Urtijei n. 29/04 che ti ova deleghé competenzes a la comunité de Val Salten-Scilier per cie che reverda l barat temporar de polizisc'. Chesta delega va tamben contra l DPR 574/88, sce i polizisc' ne sà nia ladin. L DPR 574/88 veid dantfora che duc i empliés publics tles valedes ladines à l'oblianza de savei da rejoné ence ladin.
Per cherdé ite l Consei se á la lista Ladins, raprejenteda te consei con 4 conseiers, nuzé dl art. 12, coma 9 dl T.u.o.c. che veid dantfora la facolté dles frazions de clamé ite l Consei, sce la frazion fej fora 1 n cuint di conseiers.
