benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Provinzia Autonoma de Trent: sostegn plen a la USC y al Ladin Standard
scrit ai 04 July 2005 da les 20:21:49 da noeles

Politica

 

La provinzia de Trent reconesc la Generela y l Ladin Standard

Trent ti reconesc  a la USC na gran valuta tl ciamp dla informazion ladina - la provinzia de TN sostegn l projet SPELL y à ofizialisé l Ladin Standard

Luigi ChiocchettiEn venders, ai 10 de jugn 2005, á la jonta provinziala dla provinzia de Trent dé pro la convenzion anter la Provinzia Autonoma de Trent y l’Union Generela di Ladins dles Dolomites per envié via iniziatives de comunicazion y de promozion dla mendranza linguistica ladina aldò dl art. 6-bis, coma 2, letra b) dla L.P. 30 aost 1999, n. 4. Al se trata de na mesura bendebot emportanta y che sarà de gran porteda per duta la comunité ladina enciaseda entourn l Sela.

L Conseier dla UAL, Luigi Chiocchetti.



Dantfora auden da recordé l cheder giuridich da chel che chesta mesura peia via, la lege provinziala n. 4 di 30 de aost 1999 (normes a sconanza dles popolazions de lingaz de mendranza tla provinzia de Trent) dij al art. 6 bis che la provinzia se oblieia de enjigné ite n fond per la sconanza dles mendranzes linguistiches y che al vegn determiné tres delibera dla jonta provinziala, danterauter, "les cuotes per corí les speises per mesures enviedes via diretamenter da la provinzia". Chesta repartizion vegn fata do avei audí la Conferenza dles Mendranzes linguistiches. La lege nazionala di 15 de dezember 1999, n. 482 (lege cheder per la sconanza dles mendranzes linguistiches) ti sourandá a la provinzia la facolté de "determiné, en basa a criteres obietifs, sostegns finanziars a la editoria, ai organs de stampa y ai trasmetidours radio-televisifs a carater privat che adora un di lingac ametus a sconanza, desche ence sostegns a unions reconesciudes y enraijedes sun l teritore che à desche fin la sconanza dles mendranzes de lingaz".

Al se trata de mesures che peia via da la Costituzion (art. 6) y dal Statut de Autonomia che veid dantfora tl art. 102 "l dert dles mendranzes de podei valorisé sies scomenciadives y sies ativités culturales, de stampa y recreatives y tamben l respet dla toponomastica y de sies tradizions". Tl cheder de chestes coordinates cleres él da entene la mesura dla jonta provinziala de Trent. Tamben clers é i elemenc che é vegnus valutés da la jonta de Trent desche "criteres obietifs" per individué l organ de stampa a ben de chel che al ti vegn juté fora l sostegn finanziar. I criters obietifs é: a) la doura dl lingaz de mendranza per almanco l 75% dles plates stampedes; b) l gre deslariament dl foliet anter la populazion de mendranza; c) la cumpeida dles plates efetives de test plu les imagines.

La Union Generela di Ladins dla Dolomites é la union che raprejenteia l'unité culturala, linguistica y storica di ladins dolomitans che é deventeda tres sie organ de stampa "La Usc di Ladins" y les desvalives iniziatives culturales, linguistiches, editoriales y recreatives la union de liam linguistich y sozio-cultural de duta la jent ladina aciaseda tl raion dolomitan entourn l Sela, spidiceda su sun trei provinzies (Trent, Bulsan y Belun) y te does regions (Trentino-Südtirol y Venet). L edemanal La Usc di Ladins arjonj con sies 3.800 copies stampedes amplamenter les families y  i zitadins dles valedes dolomitanes. Al ne é nia rie da vedei ite che avei n organ de informazion te sie lingaz vuel dí avei tles mans na massaria emportanta per la valorisazion de sia cultura, che porta pro a la esprescion de n popul y a strenje i liams de pertegnenza. En plu él na garanzia de sconanza y de democrazia.

La provinzia de Trent rata perchel che al sie de gran emportanza de ti garantí continuité y stabelté al servisc de informazion tl lingaz ladin tres la "Usc di Ladins" per duta la jent ladina y en particolar per chela aciaseda tla provinzia de Trent.

Per cie che reverda l'amonta (60.000 euro per l ann 2005, Iva scluta ite) y tegnan cont di contribuc dla Region per la Usc (92.000 euro per l 2005) y dla provinzia de Bulsan (52.000 euro per l ann 2005) se trátel de n contribut plenamenter giustifiché en relazion al bilanz dla Usc; bilanz che ruvova dl 2004 a 597.000 euro y che ruva en previjion a 600.000 euro chest ann. Chest vuel dí che l sostegn publich (contribuc dla region, dla provinzia de Trent y dla provinzia de Bulsan) se la roda entourn al 33/34% dles speises dl foliet ladin.

Ma al é ciamò valch deplù da enjonté: tla convenzion deda pro da la jonta trentina pòn ence lieje che la Provinzia Autonoma de Trent ti reconesc a la Union Generela di Ladins dles Dolomites na funzion de partner da ne podei nia avei mancia tl cheder dla promozion dla mendranza ladina, ajache ala raprejenteia la unité culturala y linguistica dla Ladinia. Al se trata perchl da una na pert dl reconesciment dla Generela desche esprescion dla unité culturala y linguistica dla jent ladina y da l'autra pert dla individuazion y dl reconesciment dla Generela desche "union de referiment de chela che an ne pò nia fé a manco y che tol ite na valuta ezezionala" per les politiches enviedes via da la provinzia a ben dla jent ladina. Al va debujegn recordé che la lege 482/99 preveid la istituzion de organisms de coordinament y de proposta che i enc locai pò reconesce. Sot a chest profil ti deura la Provinzia de Trent l troi a la Generela y te chest cheder messarál vegní rejoné inant. Ence les provinzies de Bulsan  y de Belun messarà dé n vare inant tla previjion dla istituzion dl comité di ombolc dles valedes ladines che l president dla provinzia de Bulsan á plu iadesc encundé.

Tla mesura dla jonta provinziala de Trent él ence da auzé fora l coma 2 dl art. 3 dla convenzion che dij: "La Union Generela se tol soura te mete ju te ladin dolomitan la corespondenza y i ac damanés da la provinzia".

Al se trata de na passaja emportanta che reconesc y sostegn l'ativité de archirida y de elaborazion dl lingaz ladin tres l projet SPELL con chel che la Generela, con l aiut dl Istitut Cultural Ladin de Fascia, á bele porté inant la elaborazion de strumenc linguistics de aut prestije desche la gramatica y l dizionar dl Ladin Standard.

Archirida a livel scientifich y academich dl lingaz ladin é na condizion fondamentala y strategica per la promozion dl lingaz. Pro l SPELL se trátel de n projet che á abú bendebot de reconesciment, de aprijament y de laut a livel academich y da pert dla Comunité Europea. La provinzia de Trent vuel a chesta maniera ti dé na sburla a jí inant tla elaborazion de n lingaz ladin scrit unifiché che vele per dut l raion dolomitan y che vegne reconesciù da duc i ladins. N lingaz scrit unfiché ne sfreia demez degun idiom de val, ma al raprejenteia na sintesa per conduje adum i ladins y dantadut per tré na lingia de svilup dla Ladinia tl davegní a na moda che ala posse ciamò se reconesce desche tala.

Al se trata donca de na mesura dret emportanta dla jonta provinziala de Trent che trapon tla pratica un de si doveis statutars, chel dla sconanza, dla valorisazion y dla promozion dles carateristiches etniches y culturales dles comunités linguistiches.

L conseier provinzial de Trent

Dr. Luigi Chiocchetti


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Provinzia Autonoma de Trent: sostegn plen a la USC y al Ladin Standard (ponc: 1)
da Claudio ai 04 July 2005 da les 22:47:44
(Infos sun l utilisadour | Ti mané n messaje privat)
Al basta demé ence pensé, desche al é vegnú recordé tla ultima Usc di 2 de messel (sot a letres), che tl comun de Urtijei ova fat la lista Ladins la proposta de mete su dlongia les bandieres internazionales (che vegn metudes su te duc i luesc turistics) ence chela ladina dlongia a les autres. La SVP y la lista Luech y Natura (sen lista zivica Urtijei), y anter chisc ence Leander Moroder, che cuer la enciaria de diretour dl Istitut Ladin, á tout la dezijion de les tó demez dutes per ne messei nia dé pro de mete su dlongia ence chela ladina!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.396 seconc