benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Aiut Alpin Dolomites: l elisocours mitich
scrit ai 25 January 2003 da les 18:56:49 da noeles

Desvalives

 

Les tecniches de intervent dl joler dl Aiut Alpin Dolomites - Vigni imprezijion di deidacreps po ester fatala

de Mateo Taibon

Ti ultims 15 agn zirca àn abù n mudament fondamental tles tecniches de socours alpin; na bona pert dl socours vegn fata encuei con l joler, les azions de socours con porì/blot tecniches tradizionales é pueces. L cost dl joler é aut (da za. 40 euro al menut ensù), ma l socours alpin tradizional con na trupa che va a pé su per i creps, é bonmarcé demé enfina che i socoridours laora debant. Sce an mess jì su alaut a tó n ferì con na barela él almanco cater, la maioura pert cinch socoridours sun troi per almanco mez n dì de laour - sc'an mess i paié do n tarifar da meinacrep ésen tost a les somes dl joler. Per nia rejoné dl fat che l aiut ruva de ores plu tert, con de gran pericui per vita y sanité dl ferì y di deidacreps, entratant che l joler é sun l post do puec menuc. Perchel s'à l joler svilupé al enjin plu important tl socours alpin.

L Aiut Alpin laora con l "Ecureuil" AS 350 B 3 (la "schirata") dla Eurocopter, na mascin da 7 posc' con 850 ciavai che arjonj na asvelteza de 250 km/h. La mascin é dret adateda per les monts per via de sia manovrabilté.



L Aiut Alpin Dolomites, l elisocours tles Dolomites fondé ofizialmenter l ann 1990, ma operatif bele dal 1987 encà (con esperienzes de elisocours bele dai agn 70 encà), é l pionier dl elisocours tles montes. Stazioné él sun la mont de Souc, a zirca 2000 metri, a na moda che al arjonj les pizes (y les pistes) dles Dolomites te puec menuc.
L Aiut Alpin laora con l "Ecureuil" AS 350 B 3 (la "schirata") dla Eurocopter, na mascin da 7 posc' con 850 ciavai che arjonj n slum de 250 km/h. La mascin é dret adateda per les montes per via de sia avisabelté.

Les tecniches dl elisocours tles monts é cater:

la pruma y plu saurida é l'arsì dlongia l post dla desgrazia; la turbina dl joler vegn la majera pert destodeda per lascé che i deidacreps se pò cruzié dl ferì zenza stres y zenza pericui. L Aiut Alpin Dolomites ciala da pratiché chesta modalité tant gonot che ala va: vigni intervent, olache l joler é en azion dantdaldut canche al é toch dlongia socoridours y ferì), é n risch en plu. Minimé i riscs tant inant ch'an ciafia é n credo de Rafael Kostner, diretour tecnich dl elisocours: "Gonot portonse n ferì con na barela ence 50 metri plutost che laoré con l joler en moviment", dìjel. Rodunt tles monts fàlel endere tres endò chesta poscibelté de intervent; enscì mess l elisocours sovenz apliché d'autres modalités per porté aiut.

La seconda tecnica, chela che va l plu debota (y che vegn ence conscidreda la plu rischenta) é l hovering: l joler se lascia ju, zenza arsì, dretamenter sun l post dl intervent, con n liuester che dà soura: chest per i dé plu stabilité ala mascin, ma ence per dejciarié tenjions eletrostatiches. L maiour ert dl post per l hovering é de zirca 40, con deplù ne po l joler nia plu permez. L hovering va debota, ma é ence dret zite, ajache l rotour dl joler é en moviment dretamenter dlongia i socoridours y toch soura tera; i socoridours laora tl vent dl rotour, cie che fej vigni ativité de prescia ciamò plu stressenta.

Entratant l hovering mess l pilot ester particolarmenter conzentré; vigni imprezijion pò provoché n desaster. Mete averda méssel dantaldut al vent, che pò i dé strufedes al joler - tles montes ne é l vent gonot nia costant, ma a bofs; ence les azions di socoridours, sciche mete la barela te joler, pò i dé strufedes. L joler ciàlen da mete, tant inant che les carateristiches dl post l conzed, aldò che la coda mostra tla direzion dl vent; enscì sparàgnen potenza che la mascin se damanassa per l rotour de coda.

La tecnica de intervent plu gonot reporteda (ma nia la plu adoreda dl Aiut Alpin) é la binda. L joler sta chiet tl aier soura l post dl intervent; tachés tla corda dla binda làscen ju i socoridours y i tira depò endò su con les persones ferides. I vantajes dla binda é che les preparazions per l intervent é tost fates (ence sc'al ne é per n dotour nia dagnora saurì da se lascé ju te n canalon amez i creps), che l joler n'é nia toch dlongia la jent (sciche tl hovering), y che an pò permez a la jent che adora aiut ence te posc' , olach'al fossa massa ert per n hovering o massa rie per n intervent a pe. Tres endò fej l Aiut Alpin plutost n intervent con la binda che n hovering. L desvantaje prinzipal dla binda é endere rodunt anter i creps essenzial: l joler giata n contrapeis che comporta n semdriment dl ecuiliber, davia che l brac é zirca 1,5 metri danciarà dal barizenter. Te operazions de socours dret damprò da pareis de creps aumenteia l descuiliber (che l pilot mess contrabalanzé con l rotour) cotanz la dificolté de manovrazion prezisa. A aumenté la dificolté rùvel permez l problem dl vent, tles montes la maioura pert nia costant ma a bofs, y tres endò na zircostanza fondamentala tla mont: la binda porta 204 chili, vuel dì does persones. Canche zachei va a crep, te na cordeda sciche an dij, ései gonot de doi; con dotour y deidacrep vuelel enscì ester does bindedes per trè su endò la jent. Na desfidenza generala dl vers dla binda àn ciuldì che "la binda é na mascin sun na mascin", desche Rafael Kostner spliga la chestion.

La tecnica de socours che l Aiut Alpin Dolomites adora l plu gonot anter i creps é chela dla corda fissa o corda barizentrica. Sot l joler ite, tl rampin dla ciaria, végnel taché na corda da jì a crep. Le B 3 pò porté endut 2250 chili te cabina; 2800 é i chili sce n peis vegn taché tl barizenter sot joler ite, aldò che stabilité y manovrabilité dla mascin romagn perfetes. Odù l peis dla mascin (1250 chili) y de pilot y tecnich vuel chest dì che an pò taché ite 1400 chili a livel dl mer (che vegn 950 chili a 3000 metri con prescion y temperatura standard, mo con -10 él 1100 y con + 20 ciamó 850 chili). Per les cater persones tachedes ite tla corda àn a vigni moda n gran our de segurté. La limitazion a cater persones é preoduda per l'assigurazion (l joler é asseguré per 7 persones). Les cordes adoredes é la maioura pert anter 20 y 80 metri longes, zirca doi iadesc al ann féjen, dantdaldut ti pareis, intervenc con na corda de 100 metri. La corda tegn 3000 chili y à laprò does segurtés, la pruma l rampin sot joler ite, che é chel dl trasport de material, l'autra l tacament te joler. Sce l rampin essa da se rompì (puech probabel, ma poscibel), àn ciamò la cabina dl joler a tegnì. Entratant l'operazion con corda barizentrica ciala n tecnich-socoridour da joler ju per controlé a uedl l intervent. L socoridour taché tla corda con l dotour é colié via radio al pilot per avisé les manovres, laprò él segns visifs con les mans. L pilot veid en plu tl spiedl cie che al sozed. Da enjigné ca la corda àn zirca doi menuc; gonot lascia l Aiut Alpin ju dotour y socoridour con la binda y met spo la corda fissa per porté demez duc te na cordeda soula.

Anter pareis de creps é la corda barizentrica gonot la soula modalité che an sciafia da emplié. Te caji particolars, con sporjenzes o straploms, làscen ju socoridour y dotour echin a al'auteza dles persones che adora aiut y i sciura na corda con chela ch'ai tira depò ite i socoridours. N'autra varianta é che l joler naina plan plan permez i socoridours, enchin a che ai ruva permez al parei - na operazion poscibla demè con l'esperienza ezezionala de pilot y socoridours.

Per dutes les tecniches vélel n prinzip de operativité emportant: D'isté empleneien l tanch a zirca 50-60% (250 litri) per avei manco peis y consumé demanco. Can che l joler é permez a la mont àl ciamò bon 30% te tanch - ideal per na bona manovrabilité. De invern méten ite deplù - zirca le 70% (350 litri, zirca does ores de autonomia).

Per la dezijion: cie tecnica de socours él pa da tó? mess la trupa valuté te curt temp na lingia de criters. Vigni dezijion é frut de ponderazions complesses che reverda na lingia de elemenc , sciche les carateristiches dl post (prum criter), les condizions atmosferiches, l numer di feris o la carateristica dl inzident. Con l'asvelteza dl intevent y la profescionalité te sia esecuzion, per la veduda y ence per la cualité di piloc, s'à l Aiut Alpin Dolomites davagné n gran prestige tl mond dl alpinism y n gran respet tl'opinion publica, tant che chesta organisazion de elisocours é oramai n mit.


 
Liams emparentés
· Deplú sun l tema Desvalives
· Chier te noeles


L articul plu liet te chest tema Desvalives:
Aiut Alpin Dolomites: sajon da d'isté dant porta


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.405 seconc