Na plaza virtuala nueva sun internet: Valbadia-Online
- L Gader-Snauzer nen sá dagnora una deplù - L sit é interatif y pieta n grum de informazions
-
„ValbadiaOnline“ é n portal internet nuef, da puech crié da la Cassa Raiffeisen Val Badia, che volessa en fé adenfora na plataforma emportanta per duc chi dla Val Badia y ence da foradecà che navigheia gen te internet. Sun iniziativa de n valgugn funzionars y dla direzion dla Cassa Raiffeisen Val Badia él vegnù svilupé idees sun co che chest portal podessa cialé fora. Do truep laour y deplú proes, él sauté fora chest sit, che é sen on-line. L Gader-Snauzer meina vigni di valch coienaria.
I responsabli à un en gran obietif: chel de ti pité a duc, persones privates, unions y grups d’interes, la poscibelté de giaté y de dè inant informazions de vigni sort. Tl sot-menù „Community“ él da giaté deplù servisc: n liber dl telefon digital, na tofla virtuala, per vene y cumpré de dut, informazions y novités sun manifestazions y noeles en general. L potenzial per ti dè vita a n barat busient de informazions y de idees sun ValbadiaOnline é dessegur dant man.
Al é ence meso dé ti na odleda al mond dla informazion te Südtirol: programs dla televijion, miscions de utl, contac, previjion dl temp. Laprò él informazions che reverda manifestazions culturales y les plates dles ploanies. Dret de utl é la publicazion di programs di conseis de formazion culturala dla valeda. Al é na plaza de paisc virtuala, olàche an s’enconta, se rejona, se barata fora idees y informazions.
La grafica recorda n portal d’informazions: n articul de cronaca, de sport, de politica o de economia deura la plata. De mendres noeles giáten da na pert ju, entratant che ju da pé él da vedei les informazions dl Südtirol-Journal. Al é interessant da vedei desche ValbadiaOnline s’anuza dla colaborazion de d'autri portai, fajan da moltiplicadour per si servisc y per sies informazions.
Desche l foliet Dolomiten à sie Snauzer, à ValbadiaOnline l Gader-Snauzer, che ti someia n pue al logo dla Cassa Raiffeisen. Chesta figura dij vigni di, ence te na maniera ironica, la sia. Duc chi che vuel pò dè ite sia proposta per les "batudes" dl Gader-Snauzer. La plu interessanta vegnirá publicheda i dis do.
An spera che ValbadiaOnline posse cresce con la cumpeida de si anuzadours, che fej vigni di na roda sun la plaza virtuala. Te feter duc i sot-menus ciafia i users de mete ite si articui, comentars o informazions, a na moda che la plata devente tost la plata de duc.
Samben che al é ence da giaté informazions de carater bancar, ma chestes se tegn viadedò a na maniera dret dezenta, davia che la cossa plu emportanta é che chi che a sun l sit de ValbadiaOnline se sente da ciasa, che al ti sae bel y che ai vegne tres endò a vedei chi che an podessa enconté sun plaza.
L lingaz prinzipal é l ladin-badiot ence per fé cresce nost bel lingaz dla oma; samben ne é chest nia saurì, ma con la colaborazion de jent competenta y con truepa bona volenté da pert de duc sarál meso de tegnì chest portal per ladin.
L projet é destiné a cresce tl temp y a se adaté a les esigenzes di anuzadours per ester tres ajorné y atual.
L team de ValbadiaOnline
Cassa Raiffeisen Val Badia
Tel.: 0471 831400
contact@valbadiaonline.it
Sottara Hubert
Tel.: 0471 831422
Cell.: 348 8213959
Fistill Günther
Tel.: 0471 8315
La redazion de Noeles.net ti aoda truep suzes al portal ladin nuef.
