benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Certes unions tla Val de Non reclama ladinité
scrit ai 24 June 2005 da les 15:57:14 da noeles

Politica

 

Florian Mussner benedesc l "ladin-noneis"

Te sia enciaria desche Assessour Regional a les mendranzes ál tout pert a la prejentazion dla "Grammatica Ladino-Nonesa" y contradij les posizions fascianes te chesta chestion
 
de Riccardo Zanoner

I volesse scomencé via chest mie articul con chest titul cassoura che é praticamenter cie che i trentins à entenù, sorauldut aldò de cie che al é vegnù scrit sun i sfueis enstadì, do che l assessour ladin dla Region, Florian Mussner, à tout pert a la prejentazion dla gramatica noneisa-ladina, ence drucheda con l deidament finanziar dla Region Trentin-Südtirol.


 



Al someia donca che al se trate de na sort de reconesciment a la ladinité noneisa, dò che alencontra i fascians fej de dut per se paré y per mantegnì sia identité ladina ben despartida y per ti fé capì a Trent che i fascians y i ladins dles Dolomites ne à nia a che vedei con i noneisc.
A dì la verité méssen ti reconesce a Mussner che al ne à nia rejoné de ladinité noneisa, ma al à rejoné dl’emportanza dl lingaz dla mere (oma) per na comunanza, che apede a ester l’esprescion plu autentica dl sentiment personal, é ence na caraterisazion che deida la comunanza a se defene contra l’omologazion linguistica de encueicondì. I sfueis a dí l veira messessa tó at y reconesce che Mussner ne à nia tout posizion sun la chestion che ti stà plu a cuer ai noneisc, plu avisa la "ladinité dla val de Non". Aboncont á per ei volù dí la prejenza dl assessour ladin, fosc con strumentalisé la chestion, che cie che i fascians dij ne à degun valour ajache en verité i ladins dl Südtirol la pensa autramenter, y ilò vegn i noneisc conscidrés apontin ladins.
Personalmenter ne vuei con chest articul porté dant deguna critica personala en cont de dut chest; aboncont volesse envié la jent ladina a pensé miec y bel dalvers a nosta ladinité. Al me sà de podei dí che encueicondì vivonse te n mond olàche an se fej saurì da se taché endos na sort de "eticheta" per volei ester zeche, o ciamò miec per creie y fé creie de ester zeche. Te chest cheder é mia imprescion chela che ence la ladinité é deventeda, almanco per zachei, na sort de "eticheta". I on i neo-ladins che vegn inant dut entourn: la chestion é dret senestra souraldut tl Venet, ma ala se fej sentì tres de plù ence tl Trentin.
I ne vue fé deguna critica donca al assessour Mussner per avei tout pert a chesta prejentazion dla gramatica noneisa, olàche, i vue ciamò n iade l recordé, ne àl nia rejoné de ladinité-noneisa, ma al à demé palesé apontin l’emportanza dla rejoneda de ciasa. Aboncont volessi depierpul porté mia atenzion al titul de chest liber che é "Grammatica Noneso-Ladina": donca, chest titul con la parola "ladina" é ence na sort de "eticheta"? Sce la resposta é sci, me damani, sce al é etich per i ladins de lascé adoré l inom de sia identité desche na "eticheta"?
Ence ie personalmenter ne é net nia decontra al fat che na popolazion de valeda posse fé sies enrescides y che ala posse publiché libri sun sie lingaz, sun sia cultura o sia storia. Aboncont, desche ladin diji ence che al me essa fat plajei che i noneisc essa publiché la "Gramatica Nonesa" zenza ti enjonté la parola "ladina".

 

 Lites 2003: Caro elettore noneso ....


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Certes unions tla Val de Non reclama ladinité (ponc: 1)
da travers ai 03 July 2005 da les 10:18:00
(Infos sun l utilisadour | Ti mané n messaje privat)
Tant de lingac ladins onse pa sen perdret? Ladin de Gherdëina, Ladin dla Val Badia, ladin fascian, ladin fodom, ladin de Anpezo, ladin de Bonora, ladin-noneis:vignun con sia grafia, sia gramatica, sie dizionar, siei libri de scola, y n valgugn de chisc ence adorés sciche lingaz dles aministrazions publiches (comuns, provinzies y regions). Ma deguna "Schriftsprache" comuna; dal pont de veduda soziolinuistich à vignun l status de "lingaz"y no de "dialet". I cent agn de revendicazions politiches-culturales à porté a la ofizialisazion ence linguistica dla dejunité di ladins. N tema per les manifestazions dla UGL?



Re: Certes unions tla Val de Non reclama ladinité (ponc: 1)
da giatfosch ai 04 July 2005 da les 20:10:30
(Infos sun l utilisadour | Ti mané n messaje privat)
la tatica pur mai avei UN n ladin
pur che l ladin romagnes a livel del foltlor y dialet



Re: Certes unions tla Val de Non reclama ladinité (ponc: 1)
da nones ai 13 October 2008 da les 01:34:17
(Infos sun l utilisadour | Ti mané n messaje privat)
No se ciapìs chel che i giabia da avergin contra i Fascians su nta olontà dla popolazion nonesa de descoertar le so rais lenghitice ladine. Ancueialdì, ntel cader dle lenghe "reto-romanze", se baia de ladin Grigiones, Dolomitich e Furlan senza ce nzuni auzia la os o i se sentia ofesi da la doura de sta "eticheta". Gi 's vuel distinguer ntrà ladin dourà tant entel senjo "etnich" e ntel significiat demò lenghisitich. Lè clar che entel prum cajo la parola "ladin" la raprejenta no demò la lenga, ma ancia la partegnenza ale zinch valade dolomitiche ladine. Da l'autra man giatàn en mucel de studioji de lenga che i gi dis "Ladino Orientale" al Furlan, ancia se chesti òutemi no pensi i se sentia etniciament tant ladini no. Ntel caso ve'l fusseu desmentegiadi volevi recordarve che per chel che revarda el nones ladin, el prim a parlarnin l'è sta n zert Graziadio Isaia Ascoli (che de segur seu ci ci lè) da pu de n secol, e che i noneji i è nta comunanza ladina del bouzan enfin dal 1978. Tant par far doi ejempli...Donca no me sin enventadi alièri l'auter de tirar fuer sta "eticheta". E par ruar vuei far n'outema considerazion: da n eticheta noi no magnan gio ngot no, chel che volen lè che 's fagia vergot ancia par la nosa lenga parché no la mueria e la nigia parlada amò ente nose ciase e ancia fueroutra. Sarues ora che en calche aiut e contribut el nigia ancia su par el nos, e mia demò su par l'avis! El forsi che el nones l'è na lenga de "serie B" e el facian (o el mochen o el zimber) de "serie A"? Ancia noi autri voruessen na calche ora de nones a scuela, sc'iartabièi con dopla segnaleticia, etc...tut chel che n'te vose valade el suzet zamai da ani!
Donca no ste a domandarve se le etich o no lagiar dourar l'inom ladin ancia a verguni autri al de fuer dle vose valade, domandave nveze aboncont si no val la pena en aidarne en migol ntra de noi.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.414 seconc