L majer interes án per "Liejendes y conties ladines" 

Da na enrescida metuda a jí dal Istitut Pedagogich Ladin tles scoles todesces y talianes resulteiel truep interes de savei deplù sun i Ladins

Al suzed for plu sovenz che scoles de rejoneda todescia o taliana damana do material de informazion sun la storia, sun cultura, sun usanzes y sun la rejoneda ladina.  Acioche al vegne ence laoré dl dret vers, à l IPL fat dantfora na enrescida tles scoles mesanes de rejoneda todescia y taliana. Dr. Theo Rifesser, diretour dl Istitut Pedagogich Ladin. L IPL laorará fora n conzet y metará a desposizion mesi didatics per talian y todesch.

"L Istitut Pedagogich Ladin ova bele tla previjion dl programm dl ann passé fat fora de laoré fora material didatich per les scoles todeses y talianes" à declaré l diretour dl IPL Theodor Rifesser. L IPL à entant bele tout su contat con i Istituc Pedagogics talian y todesch che metará a desposizion si colaboradours laoré pera. Tles edemes passedes ova l IPL mané fora formulars per enrescì plu avisa l interes. Chisc formulars é ruvés derevers y te na pruma analisa él resulté cler che l interes é dant man y bendebot gran. Danterauter ti án damané ai maestri te cie argomenc che ai á interes: a la storia di ladins, al model dla scola ladina, a la leteratura, a les liejendes y a les conties, a les usanzes, al artejanat o al svilup turistich tles valedes ladines. La gran maioranza s'á declaré interesseda a les liejendes y a les conties ladines. Encroujés é ence vegnus argomenc sciche les tradizions y l artejanat. Informazions sun la rejoneda ladina é damanedes dantaldut da pert di ensegnanc, depierpul che informazions sun l turism ne é nia tant damanedes da les scoles de lingaz talian. Tla valutazion dles respostes de enrescida ál dé tl uedl che al é de majeres desferenzies de interes per cie che reverda l model de scola paritetich, interes che é mender tles scoles todesces a paredl con cheles talianes. L Istitut Pedagogich Ladin laorará sen fora n conzet didatich y scomenciará a chirì adum l material. I documenc didatics vegnirá laorés sibe tl lingaz todesch che talian. L prum vare sarà chel de enjigné l material didatich per les scoles mesanes, plu inant, sce al ven mostré interes, pòn spo ence pensé a les scoles elementeres y a les scoles autes. (fontana: osp)

Istitut Pedagogich Ladin (IPL)