benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

En sabeda tla Tageszeitung - paroles grieves dl president nuef dla Generela
scrit ai 12 June 2005 da les 22:13:57 da noeles

Persones

 

Michil Costa ti dá dl "Taleban" ai litadours dla lista LADINS 

Na bomba splundra sotissoura la Union Generela - Propi na bona preparazion ai 100 agn Union Ladina

L parados ne podessa nia ester majer: Michil Costa, president dla Union Generela, pò sen ti toché la man a Erich Demetz y a valch esponent dla Svp de Gherdeina, duc dla medema minonga che i litadours di Ladins é "talebans", la seta islamica di "puriscisms" dla religion che copova y martorjova tl Afganistan ti agn '90, sinonim de fondamentalism totalitar, de terorism y de represcion inumana. Michil Costa á fat chestes declarazions te na intervista fata da Florian Kronbichler sun l foliet "Die Tageszeitung"  vegnuda fora en sabeda. Michil Costa: "Ie ne vue nia ester n taleban".



A la domanda de Kronbichler: "Eise valch contra i LADINS?" respon Michil Costa: "I ne vue nia ester n taleban, al é valch de nia-ladin. Certa jent a chi che al ti sta a cuer la cultura ladina veidi te chest cianton. Ie me festidieie plu dl'autra pert dl'anima ladina". Florian Kronbichler: "Dla pert de persona de mond mineise?", Michil Costa: "Scí, nos Ladins son truep plu daverc coche an nes descriv y i ne me stance mai de ti consié a mi compaejans: jide fora per l mond! Jide!". Florian Kronblicher: "Jide fora, olá?", Michil Costa: "Al me plej per ejempl dret la zité de New York, un n iade al ann messi jí, zenza me máncel zeche".

 

Comentar

Adoré na tel terminologia , "talebans", "fondamentalisc'" desmostra naouta n gran senn, n debujegn de se destanzié, da cie? Él mo chest l priesc per giaté i scioldi da Durnwalder che ne vuel nia reconesce la Generela, depierpul che Trent l á fat. A definí con na terminologia tant desprijenta, fora de vigni cheder y fora de uega, n moviment per i derc zivics y politics di Ladins* fova demé ruvé valch esponent dla Svp de Gherdeina, chela formazion politica che á dagnora combatú contra vigni dert spezial di Ladins, da dagnora en pruma linia contra l reconesciment dla Generela, per na ladinité de fassada, ma dovia dut doi, dut l contrar de cie che la Generela se á tout dant. Ence la Union Autonomista Ladina con l conseier Luigi Chiocchetti te Fascia (UAL) donca Talebans che "copa y martorjeia per na ideologia". Sce an ti và do a chesta logica ence la SVP, davia che ence ela á y preten na raprejentanza politica autonoma dl grup todesch.

Sce an tegn cont dla bona colaborazion che al fova sté anter lista Ladins y Generela ti agn che Carlo Willeit fova tl Consei Provinzial y Regional, ruvé al pont de adoré na tel terminologia, él cler che la SVP sofla sotite per renforzé la divijion y ruvé n puech al iade al comand dla Generela. É chest l gran frut dl candidat volú da Hilda Pizzinini y da valch member dla Uniun Ladins Val Badia? Él mo veramenter n ciaval de Troia per desdruje la Generela desche zachei se ova bele damané con festide dant la lita dl president nuef? Les paroles dites da Michil Costa é dret grieves y envieia da ti damané les demiscions. (uc/is)

* liam atif

 



 

 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: En sabeda tla Tageszeitung - paroles grieves dl president nuef dla Generela (ponc: 1)
da travers ai 13 June 2005 da les 00:01:56
(Infos sun l utilisadour | Ti mané n messaje privat)
Scandalous. I conesciove Michil Costa sciche filosof y predicadour angelich su La Usc y sun la plata de "La maratona dles Dolomites" ma nia sciche zensour politich che mess jì n iade al ann a New York a tò ispirazion.....da Bush? Vignun pò avei sies idees politiches, ma ne fova nia la Union di Ladins na assoziazion apartitica? Michil Costa fova a Cianacei olache al à podù audì endò n iade la campagna contra l ladin unifiché (politica definida da Ilda Pizzinini "antiladina") dl antitaliban F. Mussner. Ne à l president dla Generela nia da dì? Chi tace acconsente?!
Se cruzié di derc dles mendranzes pò parei na cossa talibana tl zenter turistich de Corvara, olache la persona vegn valuteda aldò dl peis dl tacuin, ma l om de mond che vuel eter Michil Costa messessa empò savei che i derc dles mendranzes fej pert di derc dl om che vegn reconescius tamben da l' UNO a New York che da la UE a Bruxelles. Sce i ne me fali nia ne à i "Ladins" mai adoré les bombes per fé valei siei derc, sciche à fat enveze d'autri nia cis da giut te Sudtirol.
I ladins - chi con la picera letra - essa gen n scalairment da sie President.

PS: Ne podessa nia noeles.net publiché l test integral dla intervista a MC sun la
"Tageszeitung"?



Re: En sabeda tla Tageszeitung - paroles grieves dl president nuef dla Generela (ponc: 1)
da giatfosch ai 13 June 2005 da les 01:39:10
(Infos sun l utilisadour | Ti mané n messaje privat)
scior Michil Costa,
la lista Ladins n'á mai copé, saré ia o martorjé degügn!

ci basseza criminalisé chi che se damana pur i ladins ches rajuns fondamentales che todesc i taliagn à da agn! ci basseza criminalisé chi che defenn rajuns dla mendranza (i todesc à metü bombes can che ai â bele 100 iadi ci che i ladins à segn y vegn metüs fora sciöche "Freiheitskämpfer")

Chest ô dì sostenì l spirit nazionalist dla maioranza che ô fà tres mendra la mendranza (Michil, lì mo i essays y les relaziuns de Cathomas).
Y impara ladin danco te fà fatn de na ideologia che n gran jornalist á definì "Stahlhelmfraktion". sperun che te capesces. Y impara ladin impede farfulié incerch de angiui y angiui. la cultura ladina n'é nia n "sfizio" alla sassicaia, nopa.



Re: En sabeda tla Tageszeitung - paroles grieves dl president nuef dla Generela (ponc: 1)
da Claudio ai 13 June 2005 da les 13:56:13
(Infos sun l utilisadour | Ti mané n messaje privat)
Na tel terminologia, "taleben", ne vegn nience adoreda tla politica provinziala y nazionala, oláche an é perdret usés a critiches y paroles stersces, davia che al é na terminologia che pò conduje a na plura dant dal Tribunal.



Re: En sabeda tla Tageszeitung - paroles grieves dl president nuef dla Generela (ponc: 1)
da travers ai 13 June 2005 da les 14:50:35
(Infos sun l utilisadour | Ti mané n messaje privat)
Les plures ne conduj eniò, plulere fòssel da envié M. Costa a splighé publicamenter sie pensier, sia vijion y sia strategia per defene la ladinité, cie che fossa perdret sie compit aldò dl statut dla Union Generela di Ladins. Fina sen onse audì puech de chest vers ma ben n valgunes esternazions de sia "Lebensphilosophie" predicheda tres l raisplais de La USC sciche medejina generala contra i mei dla Ladinia.



Re: En sabeda tla Tageszeitung - paroles grieves dl president nuef dla Generela (ponc: 1)
da Jancarlo ai 14 June 2005 da les 14:02:58
(Infos sun l utilisadour | Ti mané n messaje privat)
Na tatica conesciuda, canche an ne á nia n argoment tles mans végnen con titulazions desprijentes: taleban, fondamentalist, estremist .... che chest vegn dit da n President de na Union Generela é propi de n livel plu che bas, a n partí democratich ... Nience a Mussner ne ti tomássel ite de dí valch de tel publicamenter.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.362 seconc