Coche la SVP de Urtijei á trapolé

Les tratatives fintes anter SVP y Lista LADINS -  De nuet mudé partner - Auter che valours cristians y tiroleisc

I volon ti fé alsavei a la jent de Gherdeina coche nos son vegnus trapolés da la SVP per la formazion dla jonta a Urtijei: 1) do che la SVP nes ova tl prum pité demé un n assessour, onse dit che i ne podovan nia azeté chesta condizion, pona nes él vegnú pité doi assessours, paroles dl ombolt Moroder Ewald: "Con chestes condizions podonse ben vive".

2)  do la terza tratativa à dit l ombolt che la SVP à finé de traté con la lista zivica ajache chisc volova trei assesours, d'autri details ne nes él nia vegnú dit;
3)  inant dij l ombolt: da chest moment tratonse demé plu con vos y i on scomencé  la discuscion sun l program;
4)  do che an fova ruvés a una sun l test todesch, an rejonova dles competenzes che vegnissa dedes ai assesours: Demetz Adi essa tout artejanat, industria y ciamò valch autra competenza. Moroder Georg essa tout duc i laours publics ( Tiefbau) y stredes. Souraprò dessova Demetz Adi deventé vize-ombolt;
5) en mertesc, ai 31 de mei da les 4 domesdi, nes él vegnú dé la man y dit che i dessovan ruvé en mercui ai prums de jugn, da les 14 h, a sotescrive l contrat de coalizion che messova ciamò vegní scrit ju per Ladin.

L di do, da mesa les 8  dadoman, vegnonse cherdés dal ombolt che nes dij che al é vegnú firmé de nuet con la lista zivica l contrat de coalizion. Sun nosta domanda: "Ciuldí pa chest?" díjel che la SVP á fat fora de tegní na certa strategia a livel de Val. Nos on snel capí cie che chest vuel dí y i l on ence dit: bel en curt, smaché fora la Lista Ladins da dutes les jontes de Gherdeina, i vedon pu cie che ai à fat a S. Cristina.
Una na cossa é sen ben clera, chest é dut sté na strategia studieda per arbassé la posta dl veres dla lista zivica.
Nos dla Lista Ladins proteston dadaut contra chesta maniera de comportament puech reidl y nia degn de jent che á scrit sun sia bandiera de tegnì alauta i valours cristians y les tradizions tiroleises. Chestes é demé de  beles paroles per pié en valgunes stimes y basta.

Demetz Adi
Moroder Georg
Goller  Ulrica
Großrubatscher Dr.Raimund