-
- Gran coalizion a Urtijei: SVP-Lista Zivica
-
- Les tratatives con la lista LADINS fova ruvedes a conclujion - Lista LADINS: la SVP ne é nia steda senziera
En vender seira á l ombolt nuef de Urtijei, Ewald Moroder, metú ofizialmenter les chertes sun meisa, fajan la declarazion programatica y i inoms di assessours. La SVP é juda ite na coalizion con la Lista Zivica, defora resta la lista LADINS con chela che la SVP ova tamben sclut ju tratatives de coalizion con na acordanza che dessova vegní firmeda en mercui da mesdí da les 14.00. La Lista Zivica, savan dles tratatives y dl resultat, á arbassé sun chela sies ghiranzes (da 3 assessours a 2,5, pona a 2), per jí con si esponenc te jonta. Les chertes é vegnudes mescededes da nuef; n "juech paze" comenteia l conseier di Ladins Georg Moroder.
La jonta nueva ciala fora enscí: Ewald Moroder (SVP, ombolt) sourantol finanzes, laours publics, protezion zivila, frabiché slesiré y privat, Alfred Mulser (SVP) urbanistica, Martina Demetz (SVP) cultura y Martina Goller (SVP) laour con i joegn. Elisabeth Bauer (SVP) sourantol les ativités soziales, la sanité, problematiches dles eles, familia y personal y Peter Stuflesser (SVP) agricoltura, bosc y patrimone comunal, Armin Lardschneider (SVP) comerz, industria, turism y trafich y Rabanser Paul ará soura l cantier comunal, l parch di juesc, la organisazion dl despalé la neif, l sport y ti sté do a la recostruzion dla Ciasa dl Circolo.
Vize ombolt deventa Leo Moroder (Lista Zivica) che ará soura stredes, canalisazion, iluminazion publica y ega da beive. Leander Moroder (Lista Zivica) fajará la muda amesa legislatura con Tobias Dellago (Lista Zivica): chestions ambientales, artejanat y artejanat artistich.
La declarazion programatica y la jonta é vegnuda deda pro da la SVP y da la Lista Zivica, de nò á dit la lista LADINS, che se á sentí dret ofenuda per la maniera dla SVP de conduje les tratatives per la formazion dla jonta. Georg Moroder, esponent dla lista, dij che la SVP á carté con chertes tarochedes y á trapolé. Al rata ence che al sie ruvé n "diktat" dai vedli esponenc dla SVP de Urtijei. Leteralmenter entant che an fova per jí al termin per firmé la acordanza arjonta, él vegnú la desdita.L ombolt Ewald Moroder (SVP) á defenú sia dezijion, dijan che sie program se cuer miec con chel dla Lista Zivica y che na jonta che respiedla na majera maioranza é miecia.
Resultac dles lites comunales a Urtijei
-
S.V.P. - Südtiroler Volkspartei 1.408 oujes - 50,3% 10 scagns
-
LISTA URTIJEI 878 oujes - 31,4% 6 scagns
-
LADINS 511 oujes - 18,3% 4 scagns
-
Liams a les plates internet:
