benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Festa de benefizenza sun Mont de Pana, n gran suzes
scrit ai 01 June 2005 da les 17:48:17 da noeles

Manifestazions

 

"Se tripé, fajan dl ben"  

Passa 2000 persones á tout pert al Dí de cultura, sport y mujiga a fins de ben - "Vigni centejim metú ite tles scatoles daidará a salvé vites"

Monte Pana - 29 de mei 2005 n suzes. Passa 2.000 persones à giaudù n bel di de mujiga, de cultura, de sport y de sensibelté. Dut alalergia te na contreda de marevueia. Adele Moroder la prejentadoura. Anter la jent truepes autorités dla politica, dla scola y dl sport.

Egon Vinatzer y Manuela Piazza, president y vize presidenta dla U.L.G. premieia i prums trei classifichés de vigni catergoria.



Dalonc soura vigni previjion fora da pert dl comité de organisazion él sté l suzes dla festa de benefizenza metuda a jí da la Scola de rait a Ciaval "Monte Pana" y da la Union di Ladins de Gherdeina (U.L.G) deberieda al Sporthotel Monte Pana y dla "Scola da rait de Vich de Fascia". La festa à arjont duc i fins y i criteres touc dant dai trei promotours Evi Riffesser, presidenta dla Lia amatoriala raitadours a ciaval de Südtirol, Egon Vinatzer president dla Union di Ladins de Gherdeina y Klaus Malsiner patron dla Scola de rait a ciaval Monte Pana. La truepa jent y l bon ciaut à premié l fin de ben dla festa oláche la cultura ladina, l’amour y la conescenza dla vita di ciavai, la bela mujiga de autour y dantaldut la bona opera, à merité sia gran lerch tl cuer de Mont de Pana. L ciantautour de Selva Mark Alexander, che arà dessegur n gran davegnì tl ciamp dla mujiga, à daurì la festa con gran suzes tiran adalerch n publich spes dantaldut de joegn. Debota dadedò é vegnus premiés i miours laours, anter dessegns y scric dés ju en gaujion dl concurs per les scoles de Gherdeina metù a jí da la U.L.G.. Tl medem temp é vegnus trac fora 20 fortunés anter i passa 200 che à responú dret al juech "Nostes tradizions - Nosta identité".
Entant dut l di él sté meso audì inant de bela mujiga porteda dant da d'autri ciantautours de gran inom desche: Belsy, Sepp Messner Windschnur, Anton Aus Tirol, Oswald Sattler y Alexander dal Plan. Duc se à prejenté debant, dan enscí n gran contribut y n segn emportant de ejempl de sensibelté per l fin de benefizenza. Sciche te chest caje ti végnel dé l davagn a la ADMO. (Assoziazion dunadours dl miol dl os) la "Lebenshilfe Südtirol" y al « Sustëni a la Vita Gherdëina »

Canche la cultura y ciavai é tl zenter per na bona opera a fins de ben. Chilò n bel ejempl de colaborazion dant la meisa di libri dla ULG. Dovia da m.c. Günther Pitscheider, Vinzenz Peristi y Eugen Senoner conseiers dla ULG y dant ca Laura con sia compagnia.

Gran paruda à ence fat les beles performances sportives y artistiches portedes dant da deplù esperc de jí a ciaval sciche : Godele von der Decken, Sandro Mosna, Lukas Großrubatscher y Benno Costabiei, che à demostré la bona colaborazion y la gran armonia de entenuda anter ciaval y persona. Defata do les does domesdí é vegnudes cherdedes su sun palch n valgunes dles gran autorités prejentes a la festa, a testimonié la volenté de sostegní les ativités che à desche fin la sensibilisazion de fé dl ben, anter chisc: l assessour dla provinzia per la Cultuta Ladina Florian Mussner, l ombolt de S.Cristina Bruno Senoner en raprejentanza dl ombolt de Urtijei Ewald Moroder ence el prejent a la festa, l plovan de S.Cristina Sn. Raimund Perathoner: anter i gran atlec fòvel: Isolde Kostner, Peter Runggaldier, Michela Ponza, Lisa Demetz prejent ence l president dl ADMO Gregorio Tranquillini. Anter la jent enteresseda ence l mede spezialist de traplanc dl miol dl os y dla trasfujions dl sanch, dotour Oswald Prinoth.
Na festa ence dedicheda a les families: per trueps mendri y cherscius é chesta steda na bona ocajion de podei avei tles mans n ciaval y de fé valch raida. Entant dut l dí fòvel meso podei jí a ciaval sibe con i majeri che ence con i ponies. Per i manco dasnait él vegnú sport la poscibelté de furné con na bela cales trata da doi de biei ciavai blanc.
Entant la festa fòvel ence meso giaté debant La Usc di Ladins, entant la U.L.G. prejentova sies ultimes publicazions de majera empurtanza.
Trueps volentars á judé pera per garantì segureza, da beive y da mangé per duc.
De chest viers à fat n bon laour de servisc de orden publich, de segureza y de prum aiut i oms di Destudafuech de S.Cristina y dla Crousc Cuecena. Does lies desferentes per n bon fin «Vigni centejim che é tomé ite tles scatoles de benefizenza sarà n ziedl scialdi de valuta per la salveza de truepes vites", rata l’organisazion.
«Con chesta festa onse n iade rot la glacia, la proscima sarà ciamò majera y la jent podarà fé pera ciamò plu ativamenter. Nost slogan restarà inant se tripé, fajan dl ben".
L comité de organisazion rengrazieia dutes les autorités, duc i atlec, duc i ciantautours y dantaldut duc chi che a judé pera y nia per ultim la truepa jent prejenta.
N gré a nosc sponsours:
Buteiga Maciaconi, Cassa Raiffeisen de Sëlva, Chip Ware, Geier sport Diffusion, HF Eugen Pitschiller, Scola de ji a ciaval "Monte Pana", La USC di Ladins, La Union di Ladins de Gherdëina, Radio Gherdëina Dolomites, Butëiga Klaus Malsiner, Spice Light de Klemenz Rigler, Sporthotel Monte Pana, Scola de ji a ciaval "Vigo di Fassa, Mascins da paur Malfertheiner Kristian de Ciastel, Tipografia Typak y la società "Secëda"."
(ev)

 


Chilò dessot i resultac dl concurs y dl quiz "Nostes tradizions, nosta identité".
Resultac dl concors "Nostes tradizions nosta Identité"

Scoles Elementeres dessenies (doi prums a la pèr)
1 classifiché Sofia Stuflesser (V tlas Elemetera de Runcadic) venc 3 ëures de curs da ji a ciaval scola Monte Pana
1 classifiché Mara Pitschieler (V tlas Elemetera de Runcadic) venc un n pèr de schi da Klaus Malsiner
3 classifiché Carmen Bernardi (V tlas Elemetera de Urtijëi) venc n bon da 20 € da compré ite tla biblioteca dla ULG
Scoles Mesanes Gherdëina (tesć)
1 classifiché Martin Mussner (2. B. Scola Mesana Sëlva) venc n bon da 60 € da compré ite tla biblioteca dla ULG
2 classifiché Markus Crepaz (1. D. Scola Mesana Urtijëi) venc n bon da 50 € da compré ite tla biblioteca dla ULG
3 classifiché Karin Bernardi (1. D. Scola Mesana Urtijëi) venc n bon da 30 € da compré ite tla biblioteca dla ULG
Scoles Autes
ITC (tesć)
1 classifiché Marco Demetz Plesdinatz - venc n bon da 100 € da compré ite tla butëiga Maciaconi
2 classifiché -Deborah Polonio str. Mëisules Urttijëi .venc n bon da 50 € da compré ite tla butëiga Maciaconi
3 classifiché Patrick Bertuol Str. Mureda Urtijëi venc n bon da 30 € da compré ite tla biblioteca dla ULG


I premiés dal quiz "Nostes tradizions - nosta Identité é:
Gideon Mussner de Sëlva venc dal Chip Ware un n juech per computer. - Armin Moroder de Urtijëi venc dal Geier sport Diffusion na malieta. - Manuel Walpoth de Urtijëi venc dal Geier sport Diffusion na malieta sportiva. - Carmen Seifart de Urtijëi venc dal Geier sport Diffusion na malieta sportiva. - Frieda Werdaner de Runcadic venc da TV HF Eugen Pitschiller un n fon, Ernst holzknecht de Urtijëi venc da la USC di Ladins 1 n abo a la Usc. - Veronica Caterisano de Urtijëi venc da la USC di Ladins 1 n Abo a la Usc. - Maximilian Comploy de Urtijëi venc da la Union di Ladins de Gherdëina un n CD Gramofon. - Matteo Insam de Urtijëi venc da la Union di Ladins de Gherdëina un n MC "Ntëur l Sela". - Markus Crepaz de Urtijëi venc da la Union di Ladins de Gherdëina un n MC "Ntëur l Sela". - Alexander Piazza de Urtijëi venc da la Union di Ladins de Gherdëina un n MC "Ntëur l Sela". - Helmuth Senoner de Sëlva venc da la Union di Ladins de Gherdëina un n MC "Ntëur l Sela". - Melanie Rifesser de Urtijëi venc da la Union di Ladins de Gherdëina un n MC "Ntëur l Sela". - Diego Kostner de Urtijëi venc da la Union di Ladins de Gherdëina un n MC "Ntëur l Sela". - Diego Mahlknecht de Urtijëi venc dal Chip Ware un n juech per computer,,. - Nina Stuflesser de Urtiëi venc da la Union di Ladins de Gherdëina un n MC "Sën se arleva l surëdl". - Marcello Rella de Urtijëi venc da la Union di Ladins de Gherdëina un n MC "Sën se arleva l surëdl". - Evelyn Grossrubatscher de Urtijëi venc da la Union di Ladins de Gherdëina un n MC "Sën se arleva l surëdl". - Samuel Senoner de Urtijëi venc da la Union di Ladins de Gherdëina un n MC "Sën se arleva l surëdl". - Karin Bernardi de Urtijëi venc da la Union di Ladins de Gherdëina un n MC "Sën se arleva l surëdl"
I pesć pòn vegní a se tò enchin ai 10 de jugn 2005 tla Cesa di Ladins a Urtijei tl ofize dla Union di Ladins de Gherdeina. De gré per avei fat pera.


 
Liams emparentés
· Deplú sun l tema Manifestazions
· Chier te noeles


L articul plu liet te chest tema Manifestazions:
Festa de benefizenza sun Mont de Pana, n gran suzes


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.434 seconc