benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La Val: n clavier a coda nuef per abelí les festes de paisc
scrit ai 01 June 2005 da les 15:23:01 da noeles

Cultura

 

N clavier  per l paisc de La Val

Al é vegnú enaudé con la partezipazion de n grum de musizisc' dl paisc 

En domenia, ai 22 de mei à l Consei dles Unions da La Val envié via la festa de enaudazion dl clavier a coda nuef. Entratant la bela festa él vegnù pité n program musical dret rich y al é vegnù rengrazié ofizialmenter duc chi che à daidé corì les speises de chest investiment. Deplù grups de ciantarins y de musizisć à porté dant cianties o toc strumentai. L scomenciament à fat l cor de gliejia da La Val con anter l’auter la ciantia « Terdeca », componuda dal compaejan Franz Comploi do n test popolar. Siour Iaco Ploner à spo benedì l clavier y ti à aodé truepa legreza y truepes de beles ores a chi che adora chest strument ence  per soné a gloria y laut a Die. Elisabeth y André Schuen acompagnés al clavier da Franz Comploi.

 




En chesta ocajion él vegnù rengrazié duc chi che se à dé da fé, per che al podessa vegnì compré y finanzié l clavier a coda. Souraldut Iaco Schuen sciche assessour ala cultura y president dl Consei dles Unions se à cruzié de abiné adum i finanziamenc. N gran contribut él sté la Consulta Ladina con l assessour a la cultura ladina, dr. Florian Mussner che à dé. Sostegnì con manies lerges é l projet ence  vegnù da la fondazion dla Cassa dl Sparagn, raprejenteda a la festa dal dr. Heinrich Huber. L rest é spo ciamò vegnù metù a desposizion dal Comun da La Val.
Entant l domesdì à l cor de gliejia de La Val porté dant d’autres cianties en pert componudes da artisć da La Val, enscì la ciantia « Flus de munt » de Felix Dapoz y n’autra « Liendes » con l test de siour Iaco Ploner y la melodia de Franz Comploi. Dret plajù ai amanc dla mujiga dl paisc y a chi vegnus da foradecà à la prestazion dl orghenist dl Dom da Persenon, ma ence  ensegnant dl’université da Persenon y Salzburg, Franz Comploi, che se à lascé ciarcé en valgugn toc sun l clavier nuef. Dret bela é ence  steda la Sonatina de A. Diabelli a cater mans che al à porté dant adum al orghenist da La Val Nagler Gottlieb. Na legreza particolara él sté de podei ascuté su i ciantarins joegn Elisabeth y André Schuen, che studia a l'université da Salzburg y che con gran bravura à interpreté cianties de Schumann, Gunod y de Dvorak samben tres acompagnés dal clavier. I doi fredesc à porté dant ence  doi duec fora dles operetes “Don Giovanni” y “Le Nozze di Figaro” de Mozart.
Edith Ploner, che à condut tres l program, à con rejon auzé fora l talent musical de trueps chi da La Val y ence  la legreza che an pò avei con joegn y joenes che và fora per l mond a studié, ma che vegn zeruch a fé mujiga con y per la jent dl paisc. La pert musicala é vegnuda scluta ju con la ciantia “Por munts y po valades” acompagneda a cater mans son l clavier.
Che l clavier vegne anuzé ben y che al posse vegnì tout ca te n grum de ocajions per fé mujiga, chest se aoda do l bel domesdì ben vignun.

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.433 seconc