benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Convegn di media ladins a Cianacei, 19 - 21 de mei 2005
scrit ai 22 May 2005 da les 11:30:44 da noeles

Politica

 

L'informazion se ghira encuei tres plu organisazion y profescionalité

Bernard Cathomas: defata program radiofonich de 24 ores ti Grijons - L assessour Mussner á endò n iade anuzé la ocajion per dí de nò a la "Kunstsprache" ladin standard/ladin dolomitan

Na enduneda garateda chela dl seminar di jornalisc´ dl raion ladin: Bulsan, Trent y Belun con la prejenza de n raprejentant di Grijons, na personalité conesciuda, Bernhard Cathomas, atualmenter diretour dl radio y dla televijion rumancia. Na enconteda voluda y organiseda dal "Servisc per la promozion dles mendranzes linguistiches" locales dla provinzia autonoma de Trent.  Coordinadour dla iniziativa Mario Viola.
 


La pruma pert é vegnuda tegnuda tl salf dl comun de Cianacei en juebia passeda da les 15.00 inant. L servisc per les mendranzes á volú n iade lascé audí la minonga dl conseier provinzial de Trent, Luigi Chiocchetti y chela dl assessour regional Florian Mussner. Chiocchetti á recordé che l convegn é organisé dal servisc per la valorisazion dles mendranzes dla provinzia autonoma de Trent deberieda ai jornalisc´ dla Usc di Ladins de Trent y de Bulsan. An é dant a n'asciuda di media ladins y perchel él dret de se cruzié dla colaborazion de chisc media per garantí tres n maiour svilup dl lingaz ladin, che é ence te Fascia tl florí da nuef. L seminar é miné desche n confront y n impuls a colaboré per fé conesce y ensegné l lingaz, la cultura y la storia. Al é na mendranza che se fej audí, che scriv, che adora i strumenc nuefs dl'informatica per svilupé miec la informazion che encuei deventa tres plu emportanta. L convegn reverda i mass-media de informazion che se damana encuei competenza, profescionalité y responsabelté. L jornalism á encuei na funzion dassen emportanta y al ghira na organisazion, propi per daidé de chest vers él vegnú damané na colaborazion di rumanc che nes á mané adalerch n espert te chest ciamp: l diretour dl radio y dla televijion rumancia Bernard Cathomas. Al pò ence nes informé sun la valuta y la funzion dla Agentura de informazion rumancia. Al é endertura conesce la relazion anter la Usc di Ladins y Radio Gherdeina, coche ales vegn anuzedes les paroles, d'utl ence valch parola rumancia. An mess tegní cont de nosta realté linguistica y culturala y prové de garantí finanziamenc per sie svilup da pert de dutes les istituzions publiches. Les prospetives ladines sará dessegur garantides, sce an é datant de mioré l sistem informatif y de comunicazion nia demé anter nos, ma ence con i autri grups etnics.
Florian Mussner á naouta dit dilan per la bona partezipazion al convegn che se damana dantaldut coche ala dess ester "nosta rejoneda", coche ala dess vegní adoreda ti media de comunicazion. I nes aodon duc canc na bona colaborazion y cooperazion anter les persones che laora tl ciamp dla comunicazion y dagnora benvedudes les scomenciadives desche chesta dl convegn che vuel ester n confront anter les valedes y dantaldut i idioms adorés tla comunicazion-informazion. Per se fé capí miec da duc canc, emprumadedut dal organisadour dl convegn Mario Viola é ju inant Mussner rejonan per talian, defenan con forza i idioms de val che é la "dreta esprescion de nosta identité". L lingaz scrit unifiché ne ti plej propi nia. Ala se trata de n lingaz che vegn comané dal aut, na cossa sforzeda su, n mescedoz de dialec che fej perde la originalité di idioms. Al basta pensé al ingleis che é garaté na multiformité de esprescion, degugn ne sá plu ciun che é l dret ingleis. Pretene, á dit Mussner, de crié tres l ladin standard na "lingua pura" é na utopia. N lingaz net, autentich, unfat per duc ne esisteia nia. L dret lingaz, chel tipich, é chel di pici mutons che rejona do natura l lingaz dla oma. Chest lingaz é sentiment, é identité, al é l lingaz original che vá sconé y defenú. Aldò de chest lingaz déssen rejoné y scrive deplù. Chest lingaz é ence la mostra, l viere de nosta cultura locala. Nost dovei é chel de mantegní "nosta rujeneda", chela originara dla oma.
Dedò ésen passés a la prejentazion di media ladins. Vigni organ: la Usc di Ladins, Radio Gherdeina, Radio Studio Record de Cianacei, la RAI ladina y valch jornalist che laora pro l Adige y la Plata Ladina á prejenté sie laour. N bel clap de joegn laora encuei pro i media ladins, joegn motivés y samben paiés che á sourantout per na pert la funzion dl volontariat dl jornalism ladin. Mussner á dit che les cosses vegn fates profescionalmenter y che an pò ence se gode de biei resultac che fej plajei: p.ej. i servisc de TRAIL, dl radio dla RAI, i biei servisc documentés con fotografies che an pò lieje sun la USC. Samben, ál enjonté, se merita n laut y n dilan l volentariat che se á festidié denant di mass-media ladins, metan la basa per l suzes de encuei. Ence l president dl Comprensore C11 (Fascia), Fortunato Bernard, reconesc con plajei che l ladin fej de gran varesc inant ti scric, tla rejoneda y tla toponomastica. (uc)
 
Comentar
  Mussner ne á endò nia arjumé via la ocajion per dí de nò a la "Kunstsprache", desche el y si amisc partit dla Svp de Gherdeina tituleia l ladin unifiché scrit, ladin standard o ladin dolomitan, na definizion che Lois Craffonara, vedl diretour dl Istitut Ladin, á definí damprò da la demagogia (Volksverführung) te chesta relazion. Per sclarí la fauzité de de tel afermazions méssen demé trapone la medema politica sun i todesc te Südtirol: cie díjessen pa, sce ai metessa te n piz l lingaz de scritura (l "Hochdeutsch") che i lieia duc adum te una na esprescion scrita soula y ti dess te n iade la preferenza ai dialec de valeda, ései pu ei la "dreta esprescion de identité, la rujeneda dla oma, la 'Muttersproch' ": fora de uega. Dut tla dreta mesura y tl dret spirit, desche Craffonara dij: cie che an pò dí de positif de na ortografia unificheda, méssen moltipliché cent outes, sce al se trata de n lingaz scrit unifiché. L "Hochdeutsch" é n sostegn fondamental al todesch y ai dialec todesc te Südtirol, belavisa desche l ladin standard é/pò deventé n sostegn y n pont de referiment fondamental per i idioms ladins entourn l Sela. Ence sce i Ladins é empermò ruvés do rata tert pro n lingaz de scritura unifiché (dal 1997 végnel scrit y publiché empera), ne vuelel nia dí che al ne vae nia debujegn. Chest prozes storich taca adum con sia "emanzipazion" y ofizialisazion tardiva. Cie che al và debujegn é avisa l contrar de cie che Mussner dij, l ladin standard auda da vegní promovú, davia che al renforza dassen l status y la valuta (ence economica) dl ladin desche lingaz regional, sibe deforavia che daitepert. Chest fova perauter bele vegnú fissé te n pont programatich da la medema Svp y da la jonta provinziala de Bulsan dl 1985 (da lieje do tl sfuei dla jonta provinziala en gaujion dl "Ann di Ladins") oláche an se tol dant de: "fé varesc concrec per elaboré n lingaz de scritura unifiché ladin/Konkrete Schritte zur Ausarbeitung einer gemeinsamen ladinischen Schriftsprache". Defat án enciarié dl 1988 l prof.univ. dr. Heinrich Schmid de elaboré les regoles. Mussner laora contra. 
 
  Per cie che reverda la informazion scrita, eniann él 15 agn che la Usc vegn fora n iade a l'edema. Can l saut a n foliet da vigni dí ladin? Can na agentura de novités ladina do l ejempl ti Grijons? Chisc podessa ester i proscims gran obietifs. Seguré n finanziament a de tel iniziatives tres lege fossa l dovier de na politica ladina responsabla.  Cie n'él pa di projec che podessa vegní metus a jí aldò dla lege cheder 482/99, propi tl ciamp dla informazion, cenc de milesc de euro che i Ladins perd y arjuma via vigni ann, davia che la SVP se emponta a ne ti reconesce nia na funzion ofiziala a la Union Generela di Ladins desche organism de coordinament souraprovinzial (che ala ademplesc bele de facto)? (is)
 
 
Coche an ti và permez a la elaborazion dl lingaz te d'autri raions:
 
 
 
 
 
 Liams a media ladins tla rei:
 
 
 
 
 
 
 
 
 
 
 
 
 
 

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Ladin Standard

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.412 seconc