benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lizé scientifich La Ila: na tragedia greca per scluje ju l ann de scola
scrit ai 20 May 2005 da les 14:28:45 da noeles

Cultura

 

Prometeus: l om corajous che ti à robé l fuech ai Dis

La tragedia vegnirà jobleneda dai studenc dla 4. classa dl lizé scientifich da La Ila sot a la regia de Simon Kostner - Raprejentazions en juebia, ai 26 de mei y en sabeda, ai 28 de mei, da les 20.30 tla Ciasa dla Cultura a La Ila

de Daria Valentin

Sun scomenciadiva dl regist Simon Kostner, en colaborazion con l ensegnant de leteratura Carlo Suani, él vegnù enjigné ca entratant l ann de scola che é tl laour de jì a piz na opera teatrala classica dl tragediograf grech Eschilus (525-456 dant Crist), che vegnirà porteda dant da la cuarta classa dl Lizeum linguistich da La Ila. Ala se trata de na tragedia scrita entourn l ann 470 dant Crist y ambienteda ai confins dl mond conesciù tl'antichité. L toch conta dl mit de Prometeus che ti à robé l fuech a les divinités y ti l à dé ai umans per mené inant l progres dla zivilté.

Prometeus: Zeus l ciastieia y l lieia con ciadeines. N variuel (valtoi) ti beca fora vigni dí l fié.



Ma l pere di dies, Zeus, s'à dessené y l'à fat taché con morones (ciadeines) sun n pedron. Per l scintiné ciamò deplù, él enfinamai n variuel (valtoi) che ti mangia fora vigni di l fié che recresc spo entratant la nuet. L inom "Prometeus" vuel dì "chel che conesc dantfora, chel che sà" y belavisa é l protagonist prinzipal a conescenza de n secret che reverda Zeus; chest ti scincassa la liberté, sce al ti vegnissa dit dantfora la verité sun sie destin, ma Prometeus ne se lascia nia compré. N clap de ozeanines - che fossa tant che les fies dl titan Ozean - prova da l consolé, depierpul che l pere de chestes ciala da fé rejoné l perjonier, per che al dije cie che al sà.

Sciche an pò vedei, prejenta la tragedia n grum de ponc de reflescion y la intenzion dl regist é chela de mostré su l'atualité che la tragedia classica mantegn ence aldidancuei ciamò.

L toch vegn en pert joblené y en pert liet dant dramaturgicamenter. Sceben che la scenografia sie plutost scempla (sciche Eschilus se l damanova), él da auzé fora la regia bendebot sperimentala de Simon Kostner, con i biei efec de lum y de mujiga che acompagneia l toch realisés da
Benedikt Valentin.

Per enjigné ca chest toch él ju debujegn de truepes bries, ence da pert dles families di scolés, che à anter l'auter cujì i guanc ideés da la ensegnanta Barbara Tavella.

L projet é vegnù a se l dé tres l sostegn dla Intendenza dles scoles ladines (con n bel contribut da pert dla cassa Raiffeisen Val Badia) tl program educatif che passa tres l teater te scola.

Dutes y duc i interessés é dret bel enviés da vegnì a ti cialé a la raprejentazion, en juebia, ai 26 y en sabeda ai 28 de mei da les 20.30 tla ciasa de cultura da La Ila.


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.357 seconc