benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Conzert a Oies/Badia: Cianté adum unesc!
scrit ai 17 May 2005 da les 15:58:44 da noeles

Cultura

 

L cor "Cantus iuvenis" da Viena con dirighent ladin

Al tegn conzert tla gliejia dl pater O. Freinademetz a Oies/Badia en sabeda, 21 de mei, da les 20.00, cianties sacrales y cianties popolares - Dirighent é André Comploi de Al Plan de Mareo

Viena / Oies: L cor “cantus iuvenis” da Viena envieia en sabeda ai 21 de mei a na seira de melodies sot al moto: “Singen macht Freu(n)de / Cianté adum unesc”. Per chesta gaujion él vegnú chirì fora la gliejia dl “Sant Ojöp Freinademetz” su Oies a Badia. L cor “cantus iuvenis” che é dagnora sté aciasé a Viena, fej pert dl "Südtiroler Sängerbund", che à envié l cor a cianté entratant n conzert a Bornech da la festa "Ann di Cors 2005".  L  cor é vegnú fondé l’aisciuda dl 2003 da André Comploi, 23 agn, d’Al Plan che é ence l dirighent dl cor. Atualmenter stúdiel Scienza dla musiga, Scienza dl Teater tla université da Viena, desche ence Musiga Sacra tl conservatore dla diozeja a Viena.


Da otober dl 2004 inant é l cor aćiasè tla “Katholische Hochschulgemeinde Wien (KHG)”, olache al vegn tegnì un n iade a l’edema na proa da ciantè.
L inom dl cor “cantus iuvenis” vegn dal latin y vuel dì: - cianté joen-. L inom latin vuel mostré su la fondamenta tla tradiziun. Dl auter vers móstrel su, che l cor é metú adum da ciantadours/es joegn y joenes y che l program é dret fresch y dinamich.
L cor “cantus iuvenis” é metú adum da studenc de vigni direzion de stude che se dedicheia te sie temp lede, con gran pascion, al cianté. I ciantadours vegn da vigni pert dl’Austria, enchinamai da la Germania, na gran pert da Sudtirol; y ence cinch ladins cianta pera.
L cor “cantus iuvenis” ne é nia demé n grup de ciantarins che cianta deberieda, al é na union che se veid nia demé sciche colegs, ma dantadut sciche compagns. Via per l'ann végnel organisé messes ciantedes (p.ej. tl “Wiener Stephansdom”). Dlongia l cianté végnel ence organisé ativités sciche gites su per mont, griliades, y.i.i.
N aveniment fondamental tla storia dl cor é la gita fata a Desproch tl auton dl 2004, oláche l cor á tout pert a n “Wertungssingen” (cianté a valutazion), sclujan ju con na bona valutazion da pert dla giuria.
 
Conzert a Oies
L conzert vegnirá tegní en sabeda, ai 21 de mei da les 20.00h tla gliejia dl “Sant Ojöp Freinademetz” a Oies. Te na pert dla seira prejentará l cor cianties sacrales combinedes con tesć meditatifs. Tla seconda pert vegnirál porté dant cianties popolares a livel europeich, passan da la Ungheria enfin a su tl’Irlanda. Samben ne manciaràl nia valch ciantia ladina che i ciantarins, ence sce dret na gran pert ne é nia dla Val Badia, á emparè ite con gran bravura y motivazion. L repertore mondial dl cor, pieta operes che vá da la Renaissance enfin a tl 21eisem secul. En valgugn ejempli: “Ich denke dein” (Goethe/Dapoz), “Bist du nit ba mir” (Stimpfl/Gerdej), „Come in and stay a while“ (Polay), „Strike it up Taylor“ (Weelkes), “Tábortűzél” (Miklós)...
L program spiritual dl cor é basé sun musiga sacrala de cultures desvalives y de lingac desvalifs (p.ej. todesch, talian, ingleis, ladin, latin, ungareis,…). En valgugn ejempli: “Good news” (Kelber), “An Irish Blessing” (J. E. Moore, Jr.), “Ave Maria” (A. Moling, A. Comploi), y.i.i.
Per scluje ju la seira en compagnia sarál n pice buffet a desposizion per duc.

 

 Liam a la plata dl Cor "cantus iuvenis" con deplù informazions:

 


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.398 seconc