benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Media Ladins: la minonga de n letour
scrit ai 16 May 2005 da les 13:24:54 da noeles

Politica

 

Nia demé cronaca,  i media mess ence comenté y splighé 

Media ladins: an ne pò nia ester politicamenter neutrai canche ala se trata de debujegns fondamentai 

L Servisc per la valorisazion dles mendranzes dla provinzia de Trent met a jì a Cianacei n "Seminar di jornalisć ladins" dediché a les chestions y ai problems dla informazion per ladin. Ti titui dles comunicazions végnel rejoné tamben de media "per ladin" che de media "ladins"; se tràtel de esprescions sinonimiches o de cosses desferentes, de bisineles zenza emportanza o de cosses de sostanza?

Erwin Valentini.

 



La pruma esprescion é clera, ala indicheia i media che adora l ladin (plu avisa na varianta dl lingaz ladin) sciche lingaz de redazion/prejentazion dles informazions. La segonda é plulere ambigua ajache la cualificazion de "ladin" pò vegnì interpreteda te plu manieres. L agetif "ladin" pò fé referiment al lingaz ma ence plu en general a la cultura, a la realté, al mond di ladins. Sce an peia via da chesta definizion plu ampla dla ladinité pòn se aspeté che i media "ladins" ne adore nia demé l lingaz ladin ma ence che ai trate dla realté (economica, soziala, culturala, politica), di enteresc, di bujegns di ladins, con d’autres paroles, che ai rejone y scrive per i ladins.

Per i jornalisć y i editours se tràtel de capì ciugn che é chisc enteresc y bujegns, compit nia tant saurì pervia che i ladins ne é nia na comunité coerenta o monolitica ma plutost na "union de desvalivanzes y contrasć". La geografia y la storia à despartì y despartesc les valedes a na moda che vignuna no demé rejona autramenter ma ti va ence a modei culturai valgamia desvalifs. Per ejempl, l cianté fodom ne é nia l medem che l cianté badiot y la scola "ladina" de Fascia ne à nia i medems bujegns che la scola "ladina" de Gherdeina. Ma propi da chesta dejunité sautel fora n bujegn comun che determineia o dessa determiné la politica y l’azion dles organisazions politiches y culturales y ence chela di media ladins. La ladinité à debujegn, sce ala vuel souravive, dantaldut de unité; la stampa, la radio y televijion pò dé n contribut sostanzial de chest vers "reclamisan" les scomenciadives inter- o panladines che mira a lié adum les valedes ladines. Al ne se trata nia de mete sun na pert o de banalisé les spezifizités locales - les desferenzies pò ester na gran richeza tant inant che ales é na varieté dla medema unité - ma de se bate contra les "soluzions" locales che despartesc, che scluj fora d’autri ladins, che renforza o met su confins nuefs anter les valedes dl Sela.

Sun les chestions che reverda i bujegns, i enteresc y i derc fondamentai dla jent ne pò i media ladins nia resté neutrai ma dess tò posizion te na maniera clera y sterscia, auzan fora cie che é bon y denunzian cie che é sclet per i ladins, zenza se lascé condizioné da autorités forestes o magari da "partic de referiment". La neutralité y l’obietivité dla stampa é na virtù che vegn perdicheda aldò che ala ti va d’uega ai patrons. Propi chi che ghira dai jornalisć de se cruzié demé de cronaca o de cultura locala é i prums a se anuzé di media per reclamisé se enstesc. La cronaca dl "taié vetes", a chela che ence i media ladins ti dà na gran lerch, é na bela desmostrazion: les festes dl taié la veta de operes publiches vegn sistematicamenter adoredes da chi dla politica per se laudé y se lascé laudé dant la televijion.

Nos savon che i jornalisć y i editours ne à nia la vita saurida y che i media ladins vegn metus sot a prescion a vigni moda da chi che à tles mans l podei. La stampa ladina, dantaldut chela scrita, depen dai finanziamenc publics y chisc vegn adorés sistematicamenter dal podei politich per condizioné y magari ence per manacé; ciamò dant da puech ti à l president Durnwalder "consié" al president dla Union Generela di Ladins (UGL) che "l foliet edemanal "La Usc di Ladins" dess ti dé ciamò plu lerch a argomenc che reverda la cultura y l lingaz ladin, dlongia les informazions d'atualité. Te vigni caje déssela resté n medium independent y nia lié a la politica de n partì, àl sotrissé". N envit cler a ne se ficé nia ite tla politica o critiché i partic; chi che al é miné chilò él saurì de capì. La Usc di Ladins à reporté l’enconteda anter les does personalités te na maniera neutrala y "obietiva", sciche n fat de cronaca, zenza n comentar o na touta de posizion da pert dla redazion.

La Usc di Ladins se pieta de trueps versc sciche n ejempl raprejentatif dl comportament dejengajé de trueps media ladins. Pervia che ala é l organ de informazion semiofizial dla Union di Ladins y ne depen nia da ghiranzes editoriales forestes plu autes, sciche p. ej. i programs ladins dla RAI, messéssen perdret podei se aspeté da chest foliet na informazion plu engajeda per ne dì nia militanta en cont de dut cie reverda les chestions ladines. Con la vertola che la UGL é na assoziazion apartitica - che vegn gonot veduda daite y defora sciche na assoziazion apolitica - ne pesimeia La Usc nia demé a critiché dezijions politiches antiladines ma ala se fej enfinamai fadia a reclamisé les dezijions politiches de sie editour, la UGL.
N valgugn ejempli rezenc pò documenté plu avisa chest comportament passif y do mie vedei nia da azeté. L ofize de presidenza dla UGL da denant ova anter l auter:
 
(a) dezidù de crié n Ofize linguistich con l’enciaria de mené inant, te na forma plu scempla, i laours de SPELL y
(b) aprové y sourantout "Les undesc teses per na politica linguistica interladina" sciche document de strategia politica-linguistica ofizial dla UGL. La Usc se à contenté de reporté chestes dezijions te n per de righes publican l test dles "Teses" tel quel zenza spligazions o comentars.
 
Con d’autres paroles, fac emportanc per la comunité ladina é vegnus scutés via tant ben che la maiour pert di letours ne s’en à nience anadé. De dut n auter colour é steda la reazion dla plata "noeles.net"  y la "Plata Ladina" dla Union Scritours Ladins Agacins: chestes à ne á nia demé publiché atira l test dles "Teses" ma à ence envié via na azion de sotescrizion online per sostegnì y reclamisé l "Manifest Ladinia 2005"(l invit a sotescrive é tres ciamò sun la front dla plata y les 11 teses é vegnudes sotescrites fina sen da feter duc i ladinisć che conta). Sceben che la provinzia de Bulsan ti ae tout i contribuc ne à "La Plata Ladina" y noeles.net nia bazilé a critiché dezijion ratedes faledes y à sostegnì scomenciadives che ala conscidra giustes y de utl per i ladins.

N auter ejempl olà che la UGL y con ela La Usc à zedù a les prescions politiches se tiran zeruch te na posizion de neutralité plu comota (o oportunistica) vegn da les ultimes lites provinziales. La Usc se à ence chilò contenté de publiché i programs litai di partic zenza tò posizion, tratan duc unfat, ence chi che ti ova dé l colp de grazia al projet de lingaz unifiché, un di ponc essenziai dla politica linguistica-culturala dla UGL, o ova prové de scluje fora dal Consei provinzial de Bulsan na raprejentanza ladina autonoma con na lege ad hoc (lege declareda spo incostituzionala da la Court Costituzionala de Roma). Y no demé chest; la UGL y La Usc à enfinamai scuté via la dezijion de n assessour de Bulsan de tegnì zeruch i finanziamenc bele empermetus enfin a do les lites, te cheles che el fova samben candidat. L fat é vegnù venù sciche "diplomazia" ma al someia plutost a na colujion involontara con i prepotenc. Ma al é ence veir, sciche al dijova Don Abbondio, che "un l coraje - y an podessa enjonté la convinzion - l’à o ne l’à nia".

Un di temesc dl seminar de Cianacei é: "La informazion per ladin: chance per la valorisazion dl lingaz". Ie pò demé ester a una con chesta intenzion pedagogica di media ladins tl ciamp dl lingaz y i me aode che ai sourantole na tel funzion ence tl ciamp dla politica culturala y dla politica tout court. La neutralité, l cialé pro, l fé finta de nia ne paia nia alalongia tla politica, anzi al é dessegur de dann a la gauja ladina. Al é sté temps olache i ladins ova n maiour snait a defene si derc y si enteresc a livel politich. Rejoné y scrive per ladin ne basta nia al vuel ence ester rejoné y scrive per i ladins.

Erwin Valentini

 

 
D'autri articui comparus sun noeles.net sun la medema tematica:

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Ladin Standard

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Media Ladins: la minonga de n letour (ponc: 1)
da giatfosch ai 17 May 2005 da les 00:35:19
(Infos sun l utilisadour | Ti mané n messaje privat)
l'analisa toca l funz, ara toca la problematica de basa, la fondamenta etica dl jornalism.
can che l jornalism se fej moltiplicadù de baujies, deventl aiütant dles baujíes.

Nüsc media messass se tó n ejempl da Heute journal, o ince da Die Zeit, o dala Neue Zürcher Zeitung, o dal Mittagsmagazin dl Sender Bozen - olache jornalism ne se limiteia nia a cité la podesté!

l taié vetes ciafa dagnera söa gran lerch. "taié vetes", "fand-statt-berichte" - chesta sort de jornalism ân begn ince tl Uniun sovietica.



Re: Media Ladins: la minonga de n letour (ponc: 1)
da Jancarlo ai 17 May 2005 da les 18:28:04
(Infos sun l utilisadour | Ti mané n messaje privat)
Desche al é vegnú dit dai responsabli dla Usc cuer i contribuc publics za. l 27% dl costiment dl foliet. Da parenté él che la provinzia de Bulsan vuel fé prescions (Durnwalder), chest ne é nia da azeté. Ai se damana dagnora "obietivité", ma samben chela che ai miena. Sia obietivité ái pu tla plata da la "Ladinia" dles Dolomiten, foliet todesch che giata dal stat talian de beles gran somes, entourn 1 milion de euro al ann, zenza che l stat ti feje tresfora ann per ann da zensor desche Durnwalder vuel fé con la Usc di Ladins.



Re: Media Ladins: la minonga de n letour (ponc: 1)
da giatfosch ai 18 May 2005 da les 08:46:15
(Infos sun l utilisadour | Ti mané n messaje privat)
la Dolomiten gaita scialdi plu de 1 milion de euro!
y por l ORF á Durnwalder fat na lege aposta por i assüghré contribuc, belai 1 milion de euro al ann. y pra l'usc di ladins vegnel for recaté.



Re: Media Ladins: la minonga de n letour (ponc: 1)
da travers ai 18 May 2005 da les 12:08:52
(Infos sun l utilisadour | Ti mané n messaje privat)
Al é na vedla storia, la SVP, les "Dolomiten" y siei amisc y parenc se à dé da fé per se profilé tamben tla Talia che tla UE sciche portaousc dles mendranzes y, nebenbei, se garantì finanziamenc da vigni pert. I raprejentanc dles "mendranzes" regionales se comporta encuei sciche na outa i stac nazionai, con l resultat che "piove sul bagnato" dles gran mendranzes depierpul che le mini-mendranzes resta al sut o mess jì a petlé valch contribut da siei gran fredesc "protetours".



Re: Media Ladins: la minonga de n letour (ponc: 1)
da travers ai 18 May 2005 da les 17:27:26
(Infos sun l utilisadour | Ti mané n messaje privat)
La tema de Jancarlo à plu de una na fondamenta. Aciasé La Usc sot l medem tet che de autres organisazions controledes y/o finanziedes da istituzions politiches vuel dì la mete ciamò de plu sot "la protezion" de chi che dà ca i scioldi. Ma l condizionament fossa ence ideologich-cultural: l pericul é chel de na integrazion de La Usc tla politica culturala (strutures culturales, de informazion y formazion, etc.) de Sudtirol. La consecuenza fossa n auter colp a l'unité ladina: chi da Souramont essa la alternativa o de se uniformé al model made in Tirol o de se ouje dldut ju pert, dl vers de Trent y Belun. N model autonom ladin? Tertium non datur.



Re: Media Ladins: la minonga de n letour (ponc: 1)
da Jancarlo ai 18 May 2005 da les 16:32:39
(Infos sun l utilisadour | Ti mané n messaje privat)
La problematica dla USC deventará pa ciamò maioura, sce ala trapineia veiramenter a San Martin tla na Ciasa fata su da la provinzia, perauter tla medema Ciasa dl Istitut Ladin "Micurà de Rü", massa damprò per garantí na distanza critica ence devers chesta istituzion che - desche an á vedú pro l ladin dolomitan - ne fej nia i dagnora i interesc di Ladins, ma di patrons politics; en plu é l capo-redadour president dl EPL, union che viv ence de contribuc da la provinzia, per todesch ti díjen a de tel caji "Befangenheit". Les istituziuns publiches dess sté da una na pert, i media autonoms da l'autra. An é bele ruvés a situazions ries da manajé.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.396 seconc