Lege litala: la Svp se enjigna a porté dant na proposta nueva
scrit ai 29 April 2005 da les 16:38:57 da noeles |
|
A vedei, sce la SVP va contra na sentenza costituzionala
Do les lites comunales vuel la SVP endò mete al orden dl dí l dessegn de lege litala per les lites provinziales 2008
 La FF-Südtiroler Illustrierte (n. 17/2005) á dé la noela: pernanche les lites comunales é do l spinel vuel la SVP, per la terza outa, tré fora de ciazuela l dessegn de sia lege litala. Sce l Consei Provinzial la dá pro, déssela sostituí chela regionala che veid dantfora - aladò dl statut de autonomia - n sistem proporzional de partizion di scagns tl Consei Provinzial de Bulsan. La intenzion é chela de introduje na lege litala con mecanisms che ti segureie a la maioranza (te chest caje la Svp) samben deplù scagns y lerch tl Consei. Ma al é sen bendebot de rampin: na sentenza dla autorité giudiziara plu auta dl Stat, na sentenza dla Court Costituzionala che la lista LADINS se á pluré decá dl 1998, dij che n sbarament lital é contra les rejons di ladins y contra l statut de autonomia.
Al intern dla Svp rejónen ence dla proposta de tó ju les oujes de preferenza per jí contra les gran speises de reclam. I litadours essa demé plu da chirí fora l partí. La FF sá da scrive che an sighita tamben de chirí na maniera de cují ite tla lege n lintrin lital, n sbarament procentual, per ruvé te Consei.
La lege litala dl 1998 dla SVP fova vegnuda sentenzieda sun recurs dla lista LADINS contra l statut de autonomia y contra les rejons di Ladins da la plu auta Court giudiziara a livel statal. En basa a la lege dl 1998 ova messú la lista LADINS se lié con la DPS per superé l sbarament. Ence la Court Costituzionala ova raté n sbarament dl 2,9% massa aut per na populazion che fej demé fora l 4,3% a livel provinzia. La lege fova enscí anuleda. Da les lites provinziales dl 2003 á i scagns endò messú vegní partis su aldò dl vedl sistem proporzional, n sistem che la Svp ne vuel nia a livel local, ma che ala se damana a livel nazional per les mendranzes linguistiches:  La SVP: la lege litala y i Ladins .
Chesta sentenza ne ti scusa nia a la maioranza y ala vegn perchel demé d'inrer y melgen trata ca a livel provinzial. Enfinamai Florian Mussner, esponent ladin tla Svp y sen assessour, á dit atira do les ultimes lites dl 2003 de ester plenamenter a una con n scialier lital proponú da la SVP, conescian avisa la sentenza dla Court Costituzionala.
Pro la elaborazion dla lege litala nueva ne podarán nia souravedei chest particolar, chesta sentenza, ma dut é poscibel. La facolté de fé recurs a la Court Costituzionala é restrent, ma ala podessa ester la brancia da pert de n candidat ladin o de na lista che se sent ofenus da la introduzion de n sbarament, de fé n recurs y arjonje tres provediment de prescia dl Tribunal la sospension de na tel lege dant che ala vae en doura.
L esponent di LADINS, Willeit Carlo, dij n iade: "I vedaron, i messon vedei les clausoles dla proposta, sen él ciamò massa adora de dí zeche". (is)
 D'autri articui comparus sun noeles.net sun la medema tematica:
-
-
-
-
-
| 
