benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lites comunales: n gran problem dlonch
scrit ai 27 April 2005 da les 12:53:46 da noeles

Politica

L comun pò fé n grum per arferé ju l vene fora de terac y de ciases

Degugn ne perduj plu con l ritm che n turism souramené a porté ite

L temp da zumpré adum les listes per les lites de comun é passé y duc pò vedei chi che sta sun lista, ma ence chi che n’à nia volù se mete a desposizion dla comunité, scemia che ai ova giaté cotant de oujes da les prelites. Les gaujes sarà deplù, vignun porta sia responsabelté, demé che dedò él per puech da brontolé ju per l comun, sce an n’à enstesc nia volù se dé ca per la comunité. Al é veir: aluesc é la lista tomeda fora megra. Chest desmostra che chel paisc se tira sotfora canche ala va da sté ite per daidé la comunité, per i fé n servisc. "Vigni paisc giata chi oms y cheles eles de comun che al se merita", végnel dit y enscì saràla pa spo.



Sen ésen tl laour da mete ju l program de lista. Ben dret, sce al fossa per valch. Tant de listes ti ciala al program ciamò do les lites de comun ne sán. Da ilò végnel laoré su y deliberé cie che al capiteia damprovia. Desche ladins audìssen da avei n program che veid dantfora y afronteia i problems de nosta comunité ladina y chisc n’é nia pici. Un n gran problem é chel dla speculazion da fabriché. I son tl vene fora nosta tera ai foresc’ y chest gonot ence con l aiut di comuns. Na pert dij che l comun ne pò fé nia contra la speculazion, la venuda de terac y de cuatiers ai foresc’. Nia veir! Sce an rejona con de chi de comun da La Val, dìjei che l comun pò fé n grum, al pò arferé de vigni vers. Bel avisa, a La Val él apeina arsì un n forest, scemia che deplù à prové da se compré ite. Con l fabriché giata jent laour, segur, ma cie jent pa? L 80% dai laours ti và a dites forestes, nia demé ajache ales sarà ence miourmarcé, ma ajache nosta jent ne perduj nia.  Chest sourasvilup é dret melsan, al desdruj na picera comunité desche i ladins é, al i tol a trueps la sanité, i portan te na busia da temei. Nia debant n’é i ambulatores do la sajon plens de pazienc pueresc dal stress, plens de mei dlonch, con i nerfs a tera, con deprescions. Puc se fej pensiers, tant de persones che s’amala per gauja dl gran laour y di festidesc che ne messessa nia ester. Ala jissa con cotant de manco. L svilup souramené à crié na mentalité de afarism, de materialism, al conta demé fé scioldi, fé su y tré ju y endò su te curt temp. Jent ne perduj nia plu, firmes y artejans messessa sauté fora dla pel, ajache te doi meisc vuel na pert avei la ciasa enjigneda per la sajon nueva. I priesc che vegn paiés da foresc’ per albercs vegn duc chi de paisc a nen sentì; nosc laoranc mess a chesta moda paié strambaries per terac da fabriché; da compré apartamenc ciafia demé un che à l muet o n forest. Enscì ne pòla nia jì inant, sce i volon salvé nosta comunité ladina. O volonse ti fé do a paisc che é forza de vene y vene ruvés a tré a la curta, a ester mendranza te sia valeda, a n’avei nia da dì plu de sia tera? Chela fossa la fin. Nia da creie, plu derc che i ladins se strita decà sun l ciamp politich y plu che ai ven fora si paisc! Na contradizion majera ne ciàfiel nia da ester. I scioldi ne pò nia valei dut, al é d’autri valours che tira dant. Manco VIPs fajessa demé ben ai ladins, plu umilté fossa cotant plu sana. Tant de records negatifs volonse pa ciamò arjonje pro chel dal afarism, dla speculazion? Chest problem dess ester un di ponc stersc tl program de vigni lista.

Lois Trebo
 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Lites comunales: n gran problem dlonch (ponc: 1)
da travers ai 28 April 2005 da les 00:11:44
(Infos sun l utilisadour | Ti mané n messaje privat)
Propi pervia che "pecunia non olet" vàl debujegn che les istutuzions publiches fere ju la speculazion con i mesi a sia desposizion. Perchel él da mete averda che te comun ne ruve nia ite i speculanc; al en é nia puec ence chilò da nos.



Re: Lites comunales: n gran problem dlonch (ponc: 1)
da giatfosch ai 27 April 2005 da les 21:03:09
(Infos sun l utilisadour | Ti mané n messaje privat)
Lois, t'as begn rajun, mo:
"pecunia non olet"
y avei scrupoi é na virtù de mâ valgügn


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.347 seconc