Deguna tria entourn la Cesa di Ladins y deguna resposta ciamò dla SVP "Ladina" al envit a l'enconteda
Al ne vegn plu dè deguna tria tla chestion Cesa di Ladins a Urtijei. N comunicat politich ciacia l'auter. Al semeia che la chestion devente un di ponc de confrontazion politica ence dles lites provinziales 2003. Mussner y Perathoner (SVP) sostegn l ombolt da Urtijei Konrad Piazza y sia ghiranza che tl caje dla conzescion de n contribut dess na pert dl frabicat (l museum) passè tla proprieté dla provinzia. Deguna resposta dla SVP Ladina ciamò al envit de Mischì dla Lista LADINS a na enconteda sun chesta chestion y sun d'autres che ti é vegnù ortié dan valgunes edemes a Mussner y Dejaco.
Sul retrat, l gran model original per la derturazion dla Cesa di Ladins che se meritassa de vegni realisé per l ben dla cultura interladina. Trueps se damana: "Sce la provinzia po finanzié cun mez milion de euro vigni ann la televijion todescia Suedtirol Heute, a cie moda ne pola pa nia dé ca cheles trei lires per la realisazion de chest model, zenza ghiré atira na pert dla puscion"
L raprejentant di ladins y vizepresident dl Consëi provinzial, Carlo Willeit, confermeia te n comunicat dè fora encuei (22.01.2003) "che n finanziament provinzial n cont dla derturazion oduda dantfora per la Cesa di Ladins a Urtijei ne dessa nia vegnì lié a la condizion che an dae ju la pert dl Museum de Gherdeina (pert dla Cesa di Ladins). Coche truepes d’autres unions y lies dla provinzia à ence la Union di Ladins de Gherdeina y la Lia dl Museum l dert de se organisé autonomamenter cun l fin de porté inant y de svilupé enstesses sies ativités culturales". I LADINS, enscì stal inant tl comunicat "apeleia perchel al Comun de Urtijei y a la Provinzia de Bulsan de odei l ressanament dla Cësa di Ladins coche chestion de prescia per les lies culturales y de se cruzié che la chestion ne devente nia n stritoz bonmarcé per fins politics".
