benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

II. Vera Mondiala - 60 agn da la liberazion
scrit ai 25 April 2005 da les 10:29:01 da noeles

Storia

60 agn da la Seconda Vera Mondiala

60 agn da la liberazion - Ence les valedes ladines é vegnudes trates ite: empruma con les opzions, spo con cherdé ite saudés - I doi obietours ladins: Merch Dapunt sclopeté a Schlanders y Vijo Alfreider brujé vif a Buchenwald

L "Drittes Reich" Todesch sot a Hitler á scomencé de setember dl 1939 con les ermes y terour a trapone ti fac sies ambizions: ruvé a d'ester na potenza mondiala y venje permez "Lebensraum" tl Ost dl'Europa per la "raza" todescia. Te chest plan fòvel sclut ite la sterminazion y/o la sclavisazion de popui entiers, classifichés da la ideologia nazista desche "Untermenschen". "Endlösung" y "Endsieg" fova les paroles clef de na matité che ne reconesciova plu deguna regola umana y morala, jian rodunt devers l'autodesdruzion. La 2. Vera Mondiala á scomencé de setember dl 1939 con la baujia dl assaut a la Polonia y á duré enfin a mei dl 1945 con la capitulazion totala dla Germania. Ala ti á costé la vita a soura 55 milions de persones anter saudés y zivils. Ti ciamps de conzentrament todesc él vegnú copé sistematicamenter 6 milions de judiers, cenc de milesc perjoniers politics, zingaindri. Ence les valedes y la jent ladina é vegnus trac ite te chisc fac de vera, empruma con les opzions dl 1939 y dedò con la vera. Foto: l ciamp de conzentrament nazist a Bulsan, str. Resia, atira do la vera.



I oms y joegn ladins á messú jí empruma pro i saudés talians y do la capitaluzion dla Talia dl 1943 (l armistize), ései vegnus cherdés ite a ries, te Südtirol, pro i saudés todesc. I recordon doi de chisc, Merch Dapunt de Sotrú/Badia y Vijo Alfreider dl Tistler d'Antermeia, che á messú lascé chest mond sun la plu bela flour de sia vita. Ti ultims agn méten ence man te Südtirol de ti cialé plu damprò y avisa a chisc fac dassen desplajoui y aricioui: a Bulsan él vegnú descurí tofles a recordanza dles vitimes dl ciamp de conzentrament de Bulsan (l enscidit "Durchgangslager"), che an á trat ju do la vera y oláche al manciova enfin a dant a puec agn n segn o na tofla. Te chest ciamp de conzentrament, en funzion da l'aisciuda dl 1944 enfin al 3 de mei 1945, él vegnú saré via y é passés entourn 11.500 perjoniers, en pert per fé laour a ries y en pert per vegní straportés inant ti ciamps de conzentrament de Dachau, Flössenburg, Ravensbrück, Mauthausen, Buchenwald y Ausschwitz. 13 trasporc de perjoniers con ferata é piés via da Bulsan devers ciamps de conzentrament ti Paisc Todesc.
La mascin de vera nazista á laoré enfin a enultima, enfin a la capitulazion totala. I perjoniers di ciamps de conzentrament, dantadut judiers, án fat jí a pé ciamò anter jené y auril  dl 1945 sun i "Todesmärsche" encantourn per i Paisc Todesc, cenc de chilometri con truepiscims morc puech dant la liberazion.
 
Sun disposizion dl SS-Reichsführer, Heinrich Himmler, án ciamò ti ultims dis de vera fat jí perjoniers di ciamps de conzentrament sun "Todesmärsche" devers l intern di Paisc Todesc. An volova desfé vigni fustia.
 
La plaia dles opzions dl 1939
Dl 1939, condut che l'Italia fascista aratova i Ladins de nazionalité taliana, é les valedes ladines, tout fora Fascia, paradossalmenter vegnudes toutes ite tl teritore de acordanza de Hitler-Mussolini sun les "Opzions" sigleda a Roma ai 21 de otober dl 1939. En basa a chesta acordanza podova ence i Ladins declaré, sce ai optova per la zitadinanza taliana o per chela todescia con trasferiment tl "Reich". Te Gherdeina á l 81% opté per l "Reich", tla Val Badia l 31,7%, te Fodom l 34%, a Col Santa Lizia l 18% y a Ampez l 4%. Sceben che Fascia ne fajova nia pert dl teritore de acordanza sun les opzions, él empò vegnú azeté za. 300 optanc fascians, ma zenza paiament per i bens lascés endò. Endut á 7.027 Ladins opté per la zitadinanza todescia dl "Reich", ma efetivamenter s'á demé entourn 2.000 trasferí lafora, davia che i fac de vera á mudé les condizions.
 
Merch Dapunt (1923-1944)
Al é passé 60 agn dai avenimenc dla seconda vera mondiala, canche duta l'Europa messova sté fora de vigni sort de patimenc y de dificoltés. A chi temps fòvel i nazisc' che comanova y ai fajova cie che ai volova. Enscí cherdòvei ite te Südtirol pro i saudés todesc oms y joegn, scemiache ai ne essa nia abú l dert desche al fova prevedú dal dert internazional. Chest ti á ence toché a Merch Dapunt de Sotrú a Badia, nasciú ai 24 de merz dl 1923. Do che Merch á fat la scola, ál fat per zacotant de agn l fant enfin a che al é vegnú cherdé ite pro i saudés talians pro la verdia de confin inanter l'Italia y la Iugoslavia dlongia Triest. Do la capitulazion dl'Italia dl 1943 s'en ál podú endò vegní a ciasa, ma bele l ann do vegnível cherdé ite dai todesc a fé l saudé pro l Regiment dla polizia a Schlanders, condut che sia familia ne ova nia opté per l "Reich". Desche duc i autri ál fat l poch y é ruvé a Schlanders a fé l servisc che ti vegniva damané. Ma tl moment che al s'en á anadé che al vegniva metú fora desche volontar da sorví l rejim de Hitler ne ál nia plu volú savei y á fat fora con n sie compagn da s'en sciampé demez dai saudés: chest é suzedú ai 10 de messel dl 1944. Bonamenter savòvel te cie pericui che al se metova da fé chest, ma sia convinzion religiousa y sie amour per la patria l á fat tó la dezijion. I doi joegn minova da ti la fé franca, davia che al vegniva bele rejoné che la vera fova tant che finida. Pernanche ai é stés fora de caserma, ái mudé la uniforma da saudé con guant zivil y é ruvés enscí zenza dificoltés a ciasa.
Davia che ai ne se la vedova empò ne nia de bela da sté a ciasa, se ái pensé de jí fora en Puster a chirí laour pro n paur. Tl post oláche ai é storc pro, él tost sté zachei che s'en á capí fora y s'en á entenú che al messova se traté de tai che s'en fova sciampés dai saudés (desertours). Chisc ne á nia pesimé die y á cherdé la polizia dl orden publich (SOD - Südtiroler Ordnungsdienst). Tramidoi i badioc é vegnus sarés via atira y spo conduc a Bulsan. L compagn de Merch Dapunt ne ova nia ciamò complí i 21 agn, perchel fòvel vegnú condut tl ciamp de conzentrament de Dachau. A Bulsan á messú sté fora i doi joegn truepes striches y tichinedes, da mangé ne giatòvei prest nia. Do da 10 dis án condut Merch endò a Schlanders, oláche l tribunal dla polizia y dla SS de Verona l á condané ai 31 de messel 1944 a mort. Al vegn conté che Merch ae azeté con coraje y rassegnazion sia condana a mort, condut che al fova con si 21 agn sun la plu bela flour de sia vita. Tles 4 edemes che ti restova ciamò da vive, ál scrit deplù letres. A sie curat de Badia ti scrivòvel che al vegniva sclopeté y che al podova passé da chesta tera via te n auter mond, oláche al podova vedei si genitours y che al vegniva acompagné da n pater capeziner, Euseubius. A sie fré Angel: "Vos ne eis pa nia bria avei festide de me, ciuldiche mia anima é dret ben conzilieda con Chel Bel Die ..". Les medemes paroles manòvel ence a sia sor Maria y al ti dova dant la ora avisa che al dova vegní sclopeté, da les 7 dadoman. Al provova de la consolé, scrivan che an giata la pesc do la mort: "Chest mond é na tribolazion" y al sclujova sies paroles con: "A nes vedei tla gloria dl ciel". Sot a la letra á l pater capeziner ciamò scrit: "Vost fré é mort dret ben enjigné ca y dut rassegné a la volenté de Die; i podeis ester segurs che al é sun paravisc, oláche al priará per vos duc canc, fredesc y sorans". Al pater Eusebius ti ál ciamò dé chesta testemonianza dant sia mort: "Volontar che ai á volú me fé vegní fora ne sonsi ie degun, perchel refudeii l servisc da saudé. Al é miec morí." Al á ence refudé la domanda de grazia, dijan: "Ie ne adori deguna grazia da Vos" (dai nazisc'). Ai 29 de aost dl 1944, toché da les bales di sclops, él tomé via per tera y é sté atira mort. L corp é vegnú sepolí tla cortina de Schlanders. A sie parenté ti él vegnú proibí de publiché valch notizia de sia mort ti foliec da enlaouta.
 
Alois Alfreider (1926-1945)
Alois Alfreider, Vijo per ladin, fova fi soul de n tistler a d'Antermeia (l Tistler), nasciú dl 1926. Con 11 agn, dl 1937, é Vijo ju a studié tl Vizentinum a Persenon. Al volova deventé preve. Do la capitulazion dla Italia dl 1943 ne ova l seminar nia plu podú jí inant con les lezions. Vijo é ju a ciasa. L ann do, d'isté dl 1944, él vegnú cherdé ite a fé l saudé pro i todesc, l medem che ova cherdé ite Merch Dapunt de Badia, l regiment de polizia a Schlanders. Al á giaté na lizenza de stude y á tout la dezijion de ne jí nia plu te caserma. Al ne volova nia combate chela vera y se á asconú sun somas. Te paisc él vegnú fat rodé la ousc che al fova vegnú pié da partesans. La polizia, la SOD-Südtiroler Ordnungsdienst, s'á endere prejenté dai genitours y á manacé de i straporté ei te n ciamp de conzentrament, sce sie mut ne se fossa nia prejenté de sia bona. Enscí se á Vijo prejenté al Comand militar de Bulsan. An l á acusé de deserzion y ai 11 de november él vegnú metú te perjon. Ai 22 de dezember él vegnú saré via tles perjons dla SS a Bulsan y ai 9 de jené 1945 él vegnú straporté tl ciamp de conzentrament de Buchenwald y ilò él mort con la matricola 85.501. Vijo Alfreider - desche i autri perjoniers - é vegnú martorjé y umilié fora de vigni mesura a Buchenwald. Al messova se despié d'invern y an ti sprinzova ados n pion de ega dret freida enfin a che al tomova via per tera da nescia. De merz ál giaté na fioura altiscima y el ne fova nia plu datant de "olghé ai ordens" di vardians nazisc' dl ciamp de conzentrament. Un de chisc ti á sclopeté sun chela al uf. Les condizions de Vijo Alfreider s'á pioré y la ferida s'á encent. Al fova entrant tant debl che an l á selezioné per vegní metú tl fourn crematore, ence sce al fova ciamò vif. Vijo Alfreider é mort ai 17 de fauré dl 1945, ofizialmenter per "problems al magon". Si genitours, informés empermò meisc plu tert, ne á mai sapú cie cruedia mort che al á messú patí sie soul mut. Sun l mur de gliejia d'Antermeia án descorí ti agn '90 na tofla a recordanza.

 

 Liams d'interes a d'autres plates tla rei:

Shoah.de
YadvaShem
Ausschwitz.de
 

 

 

 

 


 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: II. Vera Mondiala - 60 agn da la liberazion (ponc: 1)
da giatfosch ai 25 April 2005 da les 12:57:52
(Infos sun l utilisadour | Ti mané n messaje privat)
al foss gran ora da recordé ince ofizialmenter les vitimes dal nazism tles valades ladines. Y al foss gran ora ince da fà löm sön i nazisc tles valades ladines. Al n'è sté tröc, ai é stês crödi, mo dant a signoria n'ési nia roês. Te Südtirol él sté tröc nazisc, y dô la vera ài podü fà söa cariera politica (mantignin n bona pert ince söes idees); al nazionalism todesch (ince sce criminal) i él dagnera gnü lascé dô düt.





Re: II. Vera Mondiala - 60 agn da la liberazion (ponc: 1)
da giatfosch ai 26 April 2005 da les 10:50:26
(Infos sun l utilisadour | Ti mané n messaje privat)
der da aconsié l'editorial dla Neue Südtiroler Tageszeitung da incö.

Der interessanta l'intervista con E. Pichler-Rollle tl medem foliet, che se fej ert cun la "liberaziun" y arata ch'an ne sides te Südtirol nia gnüs liberês ...



Re: II. Vera Mondiala - 60 agn da la liberazion (ponc: 1)
da Claudio ai 26 April 2005 da les 14:50:20
(Infos sun l utilisadour | Ti mané n messaje privat)
Encer valch ál rejon Pichler-Rolle, passa le 80% di sudtiroleisc á opté forapert, canche i todesc é vegnus con i ciars armés ései vegnus saludés con jops de ciofs desche an veid sun valch fotografies ... y te Südtirol á i todesc empermò dé ju ai 20 de mei 1945 l comand desche ai á dit enier tla televijion.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.348 seconc