benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lites comunales 2005 te Mareo: program dla lista zivica La Plì
scrit ai 20 April 2005 da les 17:51:28 da noeles

Politica

La Pli de Mareo: "n paisc per tie davegní!"

La lista de paisc "La Plì": "nos on na gran volenté de pié via y de laoré per l ben dl paisc"

Desche a Al Plan de Mareo candideiel ence a La Pli does listes en concorenza. "Nosta lista La Plì é daverta a duc, unfat de cie ideologia, mestier o stat sozial che zacai é, na lista de paisc zenza colour politich; da empruma encà nes onse nos prové che al vegne metù su demé una na lista per l paisc. Ma l'autra lista te paisc n'à nia volù tegnì adum con nos per podei ester plu stersc deberieda y chest fossa sté l prum vare per la “pesc interna y la colaborazion” che ei ghira te sie program", enscí enchedra la lista "La Pli" la situazion, sen pueces edemes dant les lites.

 

Les listes che essa interes de mete si candidac y sie program sun noeles.net é priedes de nes i ortié. La publicazion é debant.

 



Prejentazion dla lista de paisc "La Pli"
   
 
 
Te n tel pice paisc desche l nost ne déssel nia ester listes de colour, ajache cheles despartesc  l paisc y la jent. Al dess ence vegnì recordé che i scioldi per contribuc vegn da les mans dles istituzions (comun, provinzia, …) y nia da valch lista politica, desche al vegn valch iade dé da capì.
 
La Plì
Nos on na gran volenté da pié via con na sburla frescia y con n grum de candidac nuefs per laoré per l ben de dut l paisc. I nes on tout dant da traté te comun nia demé  cosses che à da en fé con la frazion de La Pli, ma ence che reverda l comun de Mareo entier.  Derc y  doveis dess valei per duc unfat. Nos tegnon adum y ston con Vos.
 
La Plì  - Nos volon dantaldut che al vegne giaté na bona soluzion per passé per La Pli fora Brach aladò che ala vae da passé zenza fadies con de vigni sort de auti y per nia ruiné i biei fabricac vedli sot a sconanza sun plaza de gliejia. Nia dinrer él vegnù laoré chilò decontra. La streda da sen dess romagne daverta dantaldut per podei jì a pé y jì a spazier.
Na soluzion va debujegn ence per ne mete nia en pericul i mutons dla scola sun plaza de gliejia. La plaza te paisc dess vegnì anuzeda miec y plu gonot per festes, manifestazions y iniziatives de paisc.
Sce al vegn araté che al vae debujegn da fé na outa per fé na streda nueva per ruvé a Cianoré y plu inant spo déssen cialé da giaté na soluzion che vae ben a duc.
 
Paurs - Nos volon defene i derc, i aveis y les proprietés dai patrons de terac y de autri bens che vegn adorés dal comun, da valch autra istituzion publica o ence da gran interessenzes de servisc publics. Sce i patrons di terac é contra l troi per les rodes fora per pres y bosc spo déssen i defene. Les rejons arjontes per i paurs ne dess nia jì perdudes.
Sce al dess vegnì fat n telesciaudament per l paisc d’ Al Plan dess l material da sciaudé vegnì tout dai paurs, ence per daidé enscì remoné su i bosc.
 
Coutes - Nos volon nes dé da fé tl ciamp per l sozial. Les coutes dal cioment, dles eghes pazes y per la pruma ciasa (ICI) dess vegnì trates ite con maiour giustizia y con manco peisc per i plu debli (jutedes minimes). 
 
Unions - Nos volon daidé inant les unions no demé con contribuc ordinars, ma ence con straordinars, ajache eles é n gran arichiment per l paisc.
 
Religion - Nos tegnon sun la religion catolica che nes é vegnuda metuda te cuna y al é chela che nos volon defene. I volon daidé nosc prevesc y nosta ploania, ence a mantegnì les gliejies y la calogna.
 
Cultura - La cultura y l lingaz ladin é patrimone che nes sta a cuer. Chisc va daidés te si debujegns.
 
Fabriché - Nos volon che nosta jent  posse sté a vive sun nostes beles pertes da soredl. Enscì volonse che al posse vegnì fabriché tamben te paisc che da les pertes fora (p.e. de pices zones) per che jent ne messe nia jì foradecà. Per les viles volonse cialé che al posse vegnì fat les infrastrutures primares, entres cialan da chirì les mioures soluzions adum con la jent che viv tla vila. La ploania dess vegnì daideda da fé fora dla ciasa dal mone abitazions per jent de temp.
L comun che vegn dess festidié per lercs da lascé ju i auti, ma ence sensibilisé la jent che ala scone da i tò ca.
 
Valours - Dantdaldut empermetonse che nos son contra l vene fora ciases, cuartiers, bosc o pres a jent foresta, che fej auzé massa dassen i priesc per nosta economia. Nos volon cialé de nosta tera che nes é vegnuda tramaneda da nosc peresc y cialé de nost davegnì y per chel dles generazions che vegn. La jent dal post dess se sentì a ciasa chilò da nos. Nos respeton la jent che vegn dalonc da foradecà, ma no nes lascé ciapé sot da chesta.
 
Aministrazion - Nos volon che la ciasa de comun sie n post per podei tó conseis y informazions. I oms de comun dess fé sie laour y respone a les domandes dla jent, no fé adascousc, no laoré per sies gaiofes o baraté demeztroi colour per se fé vedei. Perchel propononse da publiché a dreta ora deliberes y regolamenc sun internet.
Nos volon che l’aministrazion nueva se prove da laoré plu adum ence con d'autri ofizes per podei ti dé cheles grum de informazions che la jent à debujegn (forestala, provinzia, interessenzes, autri comuns,…).
 
Respeté la jent  - La jent dal post dess vegnì respeteda y touta sun l scer te nosta comunité. Al ne dess nia plu ester does categories de persones te chest comun: chi che pò fé dut y chi che ne pò fé nia.
 
Modernité - Nos volon che i ne vegnonse nia scluc fora dal svilup. Les linies dal telefon y per internet modernes y plu asveltes (ADSL) che costa demanco y va miour dess ester ence te nostes ciases. Comuns desche Badia y Corvara les à bele.
 
Artejanat - Nos volon che i laours che l comun fej vegne scric fora aladò che al sie plu firmes dl post che giate i laours.
 
Remoné su - Les plazes adentourn dess gnì remenedes su plu gonot y dut dess vegnì tegnì plu net. Les eghes dles pluevies dess jì tai tombins che dess vegni remonés fora plu gonot.
 
Nos empermeton che i saron dagnora chilò per la jent. Vignun pò vegnì da nos per fé domandes o per avei informazions. Cie che i dijon fajonse y cie che i fajon, dijonse ence. Nos tegnon adum. Chest empermetonse y perchel
 
Ves prionse do Vosta ousc y i ves dijon dilan.
 
Desche al vegn lité:
Vignun giata does zedoles per lité: una per la enciaria da ombolt, l’autra per lité l consei de comun.
 
Sun chela per lité l ombolt méssel vegnì scrit l inom dl candidat che an vuel lité.
Sun chela per lité l consei méssel vegnì fat na crousc sun n stema de na lista y al pò vegnì scrit enfin a 4 inoms de candidac tres de chela medema lista. Scrive numeri ne vel nia.
 

La Plì

 
 
 
 
 
 
 
 
 
 
 
Inoms dai candidac
 
David Brandlechner (Sotrú)
Giuseppe Ellecosta (La Costa)
Angela Palfrader (Ion)
Johann Willeit (Plazores)
Alois Taibon (Gran Ciasa)
Otto Ellecosta (Gogn)
Raimund Ellecosta (La Costa)
Robert Palfrader (Pré)
Stefo Palfrader (Ion)
Davide Pedevilla (Soröa)
Sabine Pezzei (Mone da Pliscia)
Anton Rindler (Nichele)
Lois Willeit (Sach)
Monika Willeit (Ansele)
 
 
(c) Lista La Plì 2005
 
 

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Politica

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.361 seconc